Chandrashekhar Bawankule: बावनकुळेंनी अजितदादांना काढला चिमटा अन् सांगितलं तिजोरीच्या खऱ्या चाव्या कोणाच्या हाती

Pune News : स्थानिक स्वराज्य संस्थांच्या निवडणुकांचा धुराळा उडाला असतानाच, सत्ताधारी युतीमध्येच निधीवाटपावरून खडाजंगी रंगली आहे. एका प्रचार सभेत उपमुख्यमंत्री अजित पवार यांनी मतदारांना थेट बजावले होते. “तुम्ही राष्ट्रवादी काँग्रेसच्या उमेदवारांना मतदान करा, तुमच्या भागाचा निधी मी कधीच थांबवणार नाही. मतदान तुमच्या हातात आहे, पण निधी देण्याचा अधिकार माझ्या हातात आहे.” अजित पवार (Ajit Pawar) यांच्या या वक्तव्यानंतर सत्ताधाऱ्यांसह विरोधकांकडून टीका होत आहे.

भाजप मंत्री चंद्रशेखर बावनकुळे यांनी यावर आता प्रतिक्रिया दिली आहे. अजित पवार यांनी बारामतीचा किती विकास झाला आहे हे सांगताना इतर शहरांच्या दुरावस्थेबाबत टीका केली होती त्याबाबत बोलताना बावनकुळे म्हणाले, अजित पवार यांचे राजकीय आयुष्य हे गेले 35 वर्ष बारामती आणि पश्चिम महाराष्ट्राच्या निगडित राहिले आहे. ते बारामतीचे आमदार तसे मंत्री म्हणून राज्यांमध्ये त्यांनी काम केला आहे.

अजित पवारांकडे फायनान्स मिनिस्ट्री, उपमुख्यमंत्री पद असल्यामुळे स्वभाविकपणे त्यांचा झुकाव विकासाच्या दृष्टिकोनातून आपल्या मतदारसंघाकडे राहिला आहे. असाच झुकाव प्रत्येकाचा असतो माझा देखील माझ्या शहरासाठी आहे. आणि त्यांनी त्या झुकावातूनच बारामतीचा विकास केला आहे. त्यात काय वावगं नाही बारामती देखील महाराष्ट्राचाच भाग आहे असं चंद्रशेखर बावनकुळे (Chandrashekhar Bawankule) म्हणाले.

अजित पवार यांच्या निधी वाटपाबाबतच्या केलेल्या विधानावर बोलताना बावनकुळे म्हणाले, निधी वाटपाचे जरी अधिकार वित्त मंत्राला असले तरी प्रत्येक फाईलवर उपमुख्यमंत्री एकनाथ शिंदे आणि मुख्यमंत्री देवेंद्र फडणवीस यांची संमती घेतली जाते.

महायुतीच्या समन्वय समितीमध्ये हे निश्चित करण्यात आलं आहे की, निधी वाटप करताना कोणताही निर्णय झाला तरी तो मुख्यमंत्री अंतिम करतील. अजित पवार यांनी कोणत्या संदर्भाने निधीबाबतचे वक्तव्य केले आहे हे आपल्याला ठाऊक नसल्याचं बावनकुळे म्हणाले.

बारामती चांगली आणि इतर शहरांबाबत जे वक्तव्य अजित पवार यांनी केलं ते बोलण्या बोलण्यात त्यांच्याकडे गेलं असेल. राज्यातील इतरही शहर चांगली आहेत, त्यांचाही विकास झालेला आहे,असे स्पष्टीकरण बावनकुळे यांनी दिले.