Chhagan Bhujbal : 'मग मला लढायला सांगायचं नव्हतं', छगन भुजबळांच्या निशाण्यावर अजितदादा

Chhagan Bhujbal News : छगन भुजबळ यांना मंत्रिपद मिळावे म्हणून ओबीसी संघटना आग्रही आहेत. आज मुंबईत ओबीसी संघटनांची बैठक झाली या बैठकीत भुजबळ यांना मंत्रिपद मिळाले पाहिजे, अशी मागणी ओबीसी संघटनांनी केली. ओबीसी संघटनांसोबत छगन भुजबळ यांनी देखील चर्चा केली. त्यानंतर माध्यमांशी बोलताना त्यांनी अजित पवार यांचे नाव न घेता जोरदार निशाणा साधला.

'मी लोकसभा लढण्याची तयारी करतो होतो तेव्हा निर्णय झाला नाही. आता म्हणतात राज्यसभेवर जा. मी निवडणू आलोय म्हणजे तेथे मी राजीनामा देऊ? विधानसभा निवडणुकीत तुमची गरज आहे. तुम्ही येथे हवा आहात असे सांगितले. मग तेव्हाच मला लढायला सांगायचे नव्हते ना', असा संताप भुजबळ यांनी अजित पवारांचे नाव न घेता व्यक्त केला.

ओबीसी संघटनांची जी बैठक झाली त्यामध्ये ओबीसी आरक्षणासाठी माझा पुढाकार होता. त्यामुळे मला मंत्रिपद मिळण्यात काहीतरी गौडबंगाल आहे. ओबीसींची पाठराखण केली त्यामुळे हे काहीतरी वेगळे आहे, असे मत मला मंत्रिपद न मिळण्यामागे संशय व्यक्त केला गेला, असे भुजबळ यांनी सांगितले.

पत्रकारांनी छगन भुजबळ यांना मंत्रिमंडळात स्थान न मिळाल्याने आता तुमची भूमिका काय असा प्रश्न केला. त्यावर ते म्हणाले, माझ्या भूमिकेची तुम्हाला फार घाई झाली आहे. भूमिका घेणार आहे त्यासाठीच यांच्याशी (ओबीसी संघटना) चर्चा करण्यासाठी येथे आलो होतो. मला मंत्रिपद न मिळाल्यामागे काही तरी गौडबंगाल आहे. त्यासाठी हा प्रश्न घेऊन ओबीसी संघटना राज्यभर लोकांमध्ये जाणार असल्याचे देखील भुजबळ यांनी सांगितले.

तरुणांची व्याख्या ठरवा?

पत्रकारांनी छगन भुजबळ यांना सांगितले की तरुणांना संधी द्यावी म्हणून तु्म्हाला संधी दिली नसल्याचे अजित पवार म्हणत आहे. त्यावर ते म्हणाले, तरुण कोण याची व्याख्या करायला हवी. 67 आणि 68 वय तरुण आहे का? असं म्हणत मंत्रिमंडळात स्थान दिलेल्या ज्येष्ठ नेत्यांवरून भुजबळांनी अजित पवारांना टोला लगावला. मंत्रिमंडळात तरुणांना स्थान देताना तरुण ज्येष्ठ असा समतोल साधला जातो, असे देखील भुजबळ म्हणाले.