कोल्हापुरात शिवसेनेचं ( शिंदे गट ) महाअधिवेशन पार पडत आहे. या अधिवेशनात खासदार श्रीकांत शिंदे यांनी भावनिक भाषण केलं. यानंतर भावूक झालेल्या मुख्यमंत्री एकनाथ शिंदे ( Eknath Shinde ) यांनीही 'एक्स' अकाउंटवर ट्विट केलं आहे. "शिवसेना हेच माझं सर्वस्व होतं, शिवसैनिक हेच माझं कुटुंब होतं, पण श्रीकांत शिंदेंच्या मुखातून निघालेल्या शब्दांमधून मला माझा काल दिसला," असं एकनाथ शिंदेंनी म्हटलं.
एकनाथ शिंदे म्हणाले, "'शिवसेना' या चार अक्षरी मंत्राचा जयघोष करत पक्षासाठी मी माझी वाटचाल सुरू केली होती. किसननगरच्या दहा बाय दहाच्या एकत्रित कुटुंबातून सुरू झालेला माझा प्रवास अथक प्रयत्न आणि परिश्रमाने राज्याच्या सर्वोच्च पदापर्यंत कसा येऊन पोहोचला ते श्रीकांतने आपल्या भाषणातून अगदी समर्पक शब्दांत मांडले."
(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)
"शिवसेना हेच माझं सर्वस्व होतं, शिवसैनिक हेच माझं कुटुंब होतं. आयुष्यभर मी त्यांच्यासाठी काम केलं पुढे काय होईल याची मला अजिबात कल्पना नव्हती, नेहमी पुढचा विचार करणाऱ्या माझ्या मनाने मागे वळून कधी पाहिले नव्हते, पण श्रीकांतच्या मुखातून निघालेल्या शब्दांमधून मला माझा काल दिसला," असं मुख्यमंत्र्यांनी म्हटलं.
"सगळा प्रवास झरकन डोळ्यांसमोरून निघून गेला. त्यांचे भाषण जसे संपले तसे आम्ही दोघेही मनातून मोकळे झालो. नकळत त्याच्याही आणि माझ्याही डोळ्यांत अश्रू अनावर झाले. आमच्यासह आमचे शिवसेना हे कुटुंबही पुरते हेलावून गेले. या वेळी माझ्या प्रत्येक सुखदुःखात सोबत असलेले माझे कुटुंबीय माझे शिवसैनिक हेच या क्षणांचे सोबती होते," असं भावनिक ट्विट मुख्यमंत्र्यांनी केलं आहे.
श्रीकांत शिंदे काय म्हणाले?
"मुख्यमंत्र्यांनी कधीही माझ्याबरोबर सण साजरे केल्याचं मला आठवत नाही. आमच्यासाठी कधी वेळ देणार? ही तक्रार आम्ही सतत त्यांच्याकडे करायचो. त्याचं उत्तर कधीही त्यांनी दिलं नाही," असं म्हणत श्रीकांत शिंदेंच्या डोळ्यांत अश्रू आले.
"मला माझ्या वडिलांचा अभिमान आहे. त्यांनी सर्व शिवसैनिकांना आपलं कुटुंब मानलं. म्हणून साधारण शिवसैनिक महाराष्ट्राचा मुख्यमंत्री होऊ शकला," असंही श्रीकांत शिंदेंनी सांगितलं.
R
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.