Padalkar vs Jayant Patil : जयंत पाटलांच्या मदतीला आख्खी राष्ट्रवादी सांगलीत उतरणार; पडळकर यांच्याभोवतीचा फास आवळणार?

Sangali News : भाजपचे आमदार गोपीचंद पडळकर यांनी माजी मंत्री जयंत पाटील यांच्या विरोधात केलेल्या वक्तव्याविरोधात राष्ट्रवादी काँग्रेस शरदचंद्र पवार पक्ष चांगलाच आक्रमक झाला आहे. सोमवारी राष्ट्रवादी काँग्रेस शरद पवार पक्षाचे राज्यातील वरिष्ठ नेते सांगलीत उपस्थित राहणार आहेत. त्यामुळे येत्या काळात गोपीचंद पडळकर यांनी केलेल्या वादग्रस्त वक्तव्यानंतर राज्यातील वातावरण चांगलेच तापणार असे दिसत आहे. शुक्रवारी राज्यभरात राष्ट्रवादी काँग्रेस शरदचंद्र पवार पक्षाच्या नेत्यांनी रस्त्यावर उतरून आंदोलन करीत निषेध व्यक्त केला.

माजी मंत्री व राष्ट्रवादी काँग्रेस (NCP) शरदचंद्र पवार पक्षाचे ज्येष्ठ नेते जयंत पाटलांवर भाजपचे आमदार गोपीचंद पडळकर यांनी पातळी सोडून टीका केली आहे. यामुळे राज्यभरात त्यांच्या वक्तव्याचा निषेध व्यक्त केला जात आहे. जयंत पाटलांच्या वडिलांचा उल्लेख करत पडळकरांनी अत्यंत खालच्या भाषेत टीका केली. टीका करताना पडळकरांनी जयंत पाटलांचा एकेरी उल्लेख केला. तसेच त्यांच्यावर गंभीर आरोपही केले आहेत.

या प्रकरणाचा निषेध करण्यासाठी राष्ट्रवादी काँग्रेस शरद पवार (Sharad Pawar) पक्षाचे राज्यातील वरिष्ठ नेते उपथित राहणार आहेत. त्यासोबतच यावेळी राष्ट्रवादीचे प्रदेशाध्यक्ष शशिकांत शिंदे यांच्यासह पक्षाचे वरिष्ठ नेते राजारामबापू पाटील यांच्या सांगलीतील पुतळ्यासमोर नतमस्तक होणार आहेत. त्यासोबतच ही नेतेमंडळी रस्त्यावर उतरून आंदोलन करणार आहेत.

आमदार पडळकर यांचा निषेध करण्यासाठी व महायुती सरकारला इशारा देण्यासाठी राष्ट्रवादी काँग्रेस शरद पवार पक्षाचे प्रदेशाध्यक्ष शशिकांत शिंदे यांनी पक्षाच्या प्रमुख नेते पदाधिकाऱ्यांसह कार्यकर्त्यांना सोमवारी सांगलीत उपस्थित राहण्याचे आवाहन केले आहे. यावेळी खासदार सुप्रिया सुळे देखील उपस्थित राहणार आहेत.

भाजप आमदार गोपीचंद पडळकर यांनी माजी मंत्री जयंत पाटील यांच्यावर केलेल्या टीकेमुळे राज्याच्या राजकारणात एक नवीन वाद निर्माण झाला आहे. विशेषतः या वादानंतर मुख्यमंत्री देवेंद्र फडणवीस, उपमुख्यमंत्री अजित पवार यांनी प्रसार माध्यमांना प्रतिक्रिया दिली आहे. त्यामुळे अनेकांच्या भुवया उंचावल्या आहेत. आमदार पडळकरांच्या या वक्तव्याचा सर्वस्तरातून निषेध व्यक्त केला जात आहे.