Kankavli News : कणकवली नगरपंचायतीच्या उपनगराध्यक्षपदी शहर विकास आघाडीचे सुशांत नाईक यांची निवड झाली आहे. नगराध्यक्ष संदेश पारकर यांनी एक मत सदस्य म्हणून दिले. समसमान मते झाल्याने नगराध्यक्षांनी आपले निर्णायक मत नाईक यांना देत असल्याचे जाहीर केले. त्यामुळे 10 विरूद्ध 9 अशा फरकाने सुशांत नाईक हे उपनगराध्यक्ष निवडणुकीत विजयी ठरले.
स्वीकृत नगरसेवक म्हणून माजी उपनगराध्यक्ष बंडू हर्णे आणि शिंदे शिवसेनेचे शहराध्यक्ष बाळू उर्फ सत्यजित पारकर यांची नियुक्ती करण्यात आली आहे. कणकवली नगरपंचायतीची पहिली सर्वसाधारण सभा आज नगरपंचायत सभागृहात पार पडली. अध्यक्षस्थानी संदेश पारकर, मुख्याधिकारी गौरी पाटील तसेच भाजप आणि शहर विकास आघाडीचे नगरसेवक उपस्थित होते.
सभेत सर्वप्रथम नवनिर्वाचित सदस्यांचे, नगराध्यक्षांचे स्वागत मुख्याधिकारी गौरी पाटील यांनी केले. यानंतर उपनगराध्यक्ष निवडणुकीचा कार्यक्रम पीठासीन अधिकारी तथा नगराध्यक्ष संदेश पारकर यांनी जाहीर केला. यात उपनगराध्यक्षपदासाठी नाईक आणि राणे या दोहोंचे अर्ज वैध ठरल्याचे त्यांनी जाहीर केले.
त्यानंतर भाजपचे (BJP) राकेश राणे यांच्यासाठी मतदान घेण्यात आले. यावेळी राणे यांना भाजपचे प्रतीक्षा सावंत, सुप्रिया नलावडे, आर्या राणे, मेघा सावंत, मनस्वी ठाणेकर, मेघा गांगण, संजय कामतेकर, स्वप्नील राणे आणि स्वत: उमेदवार राकेश राणे यांनी हात वर करून मतदान केले.
आघाडीचे सुशांत नाईक यांच्यासाठी मतदान घेण्यात आले. यात नगराध्यक्ष संदेश पारकर यांच्यासह स्वत: सुशांत नाईक, जयेश धुमाळे, संकेत नाईक, दीपिका जाधव, जाई मुरकर, सुमेधा अंधारी, लुकेश कांबळे, रूपेश नार्वेकर यांनी मतदान केले.
उपनगराध्यक्ष निवडणुकीत सुशांत नाईक आणि राकेश राणे यांना प्रत्येकी 9 अशी समसमान मते पडली. त्यानंतर नगराध्यक्ष संदेश पारकर यांनी आपल्याला निर्णायक मताचा अधिकार आहे. त्यानुसार आपले निर्णायक मत सुशांत नाईक यांना देत असल्याचे जाहीर केले. त्यानंतर सुशांत नाईक हे उपनगराध्यक्ष म्हणून निवडून आल्याची घोषणा पारकर यांनी केली. या निवडीला नगरसेवक संजय कामतेकर आणि नगरसेविका मेघा गांगण यांनी आक्षेप घेतला. नगराध्यक्षांना सदस्य आणि निर्णायक मत देता येते का याबाबत कायदेशीर बाबी स्पष्ट करा अशी मागणी केली.
यावेळी पारकर यांनी उपनगराध्यक्ष निवडीबाबत राज्य शासनाने 26 डिसेंबर रोजी काढलेल्या अध्यादेशाचे वाचन केले. यात नगराध्यक्षांना सदस्य म्हणून मतदान करण्याचा आणि समसमान मते पडल्यास निर्णायक मत देण्याचा अधिकार असल्याबाबतचा अधिनियम वाचून दाखवला. उपनगराध्यक्ष निवडीनंतर कणकवली नगरपंचायतीच्या स्वीकृत नगरसेवक पदासाठी बंडू हर्णे आणि बाळू उर्फ सत्यजित पारकर या दोहोंनी प्रांताधिकारी यांच्याकडे केलेले अर्ज वैध ठरले आहेत.
त्यामुळे यादोहोंची स्वीकृत नगरसेवकपदावर निवड झाल्याचे नगराध्यक्ष संदेश पारकर यांनी जाहीर केले. यानंतर उपनगराध्यक्ष सुशांत नाईक, स्वीकृत नगरसेवक बंडू हर्णे, बाळू पारकर यांचे नगराध्यक्ष, मुख्याधिकारी आणि इतर सर्व नगरसेवकांनी अभिनंदन केले.
सर्व कणकवलीकरांनी मिळून शहर विकास आघाडीच्याा हातात नगरपंचायतीची सत्ता दिली आहे. त्यामुळे शहराचा विकास करण्याची जबाबदारी आम्हा सर्व नगसेवकांवर आहे. लवकरच नगरपंचायतीची सभा घेऊन शहर विकासाच्या कामाला गती दिली जाईल. तसेच सर्व नगरसेवकांना सोबत घेऊन आम्ही शहराचा विकास घडवू अशी ग्वाही नगराध्यक्ष संदेश पारकर यांनी यावेळी दिली.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.
