Maharashtra Politics : जरांगेंनी फोडला 500 कोटींचा बॉम्ब : कथित ऑडिओ क्लिपवरून शिंदेंच्या शिलेदाराचा थेट भाजपलाच सवाल; षडयंत्राचा आरोप

Shrikant Shinde 500 Crore Audio Controversy News : उपमुख्यमंत्री आणि शिवसेनेचे नेते एकनाथ शिंदे यांच्यावर मराठा आरक्षण आंदोलक मनोज जरांगे-पाटील यांनी केलेल्या कथित ५०० कोटी रुपयांच्या आरोपामुळे महाराष्ट्रातील राजकीय वातावरण तापलं आहे. नारायणगडावरील दसरा मेळाव्यात बोलताना जरांगे यांनी एकनाथ शिंदे यांनी त्यांच्या नावाने भाजपकडून ५०० कोटी रुपये घेतल्याचा आरोप केला होता. या आरोपामुळे राज्याच्या राजकारणात मोठी खळबळ उडाली होती. त्यानंतर शिंदे आणि भाजपकडून या आरोपाचे पुरावे सादर करण्याचं आव्हान जरांगे यांना देण्यात आलं होतं.

या पार्श्वभूमीवर आज (२२ ऑक्टोबर) मनोज जरांगे यांनी पत्रकार परिषद घेत पैशांच्या कथित देवाणघेवाणीचा उल्लेख असलेली एक ऑडिओ क्लिप समोर आणली. त्यामुळे या प्रकरणाला नवं वळण मिळालं असून राजकीय आरोप-प्रत्यारोपांना वेग आला आहे. या कथित ऑडिओ क्लिपवरून शिवसेनेच्या नेत्यांकडून तीव्र प्रतिक्रिया उमटत आहेत. मंत्री संजय शिरसाट यांनी या प्रकरणाच्या चौकशीची मागणी केली, तर माजी मंत्री रामदास कदम यांनीही आक्रमक भूमिका घेतली. ही क्लिप आता समोर आणण्यामागचं कारण काय, असा सवालही उपस्थित करण्यात आला.

५०० कोटींच्या कथित क्लिपवर उदय सामंतांची प्रतिक्रिया

शिवसेनेचे नेते आणि उद्योगमंत्री उदय सामंत यांनीही या प्रकरणावर प्रतिक्रिया दिली आहे. कथित ऑडिओ क्लिपमध्ये खासदार श्रीकांत शिंदे यांच्या माध्यमातून मनोज जरांगे यांच्यापर्यंत ५०० कोटी रुपये पोहोचवल्याचा उल्लेख असल्याचा दावा केला जात आहे. मात्र, या संभाषणाशी श्रीकांत शिंदे यांचा कोणताही संबंध नसल्याचं सामंत यांनी स्पष्ट केलं.

या कथित क्लिपमध्ये भाजपशी संबंधित व्यक्तींची नावे येत असल्याचा दावा करत, जरांगे आणि शिवसेना यांच्यात तेढ निर्माण करण्याचा जाणीवपूर्वक प्रयत्न केला जात असल्याचा आरोप सामंत यांनी केला. श्रीकांत शिंदे यांचं नाव या प्रकरणात ओढून शिंदे आणि शिवसेनेची बदनामी करण्याचं षडयंत्र असल्याची शक्यताही त्यांनी व्यक्त केली.

ऑडिओ क्लिपची फॉरेन्सिक चौकशी करण्याची मागणी

ही ऑडिओ क्लिप खरी असल्यास हा प्रकार अत्यंत दुर्दैवी असल्याचं उदय सामंत यांनी म्हटलं. या संपूर्ण प्रकरणाची फॉरेन्सिक लॅब, सायबर पोलीस आणि विशेष तपास पथकामार्फत चौकशी करण्यात यावी, अशी मागणी त्यांनी मुख्यमंत्री देवेंद्र फडणवीस यांच्याकडे केली. क्लिपमधील आवाज संबंधित व्यक्तींचेच असल्याचं तपासात निष्पन्न झाल्यास दोषींवर कारवाई करण्यात यावी, अशी भूमिका सामंत यांनी मांडली. तसेच, या प्रकरणावर भाजपनेही स्पष्टीकरण द्यावं, अशी मागणी त्यांनी केली.

‘शिवसेना आणि जरांगे यांच्यात तेढ निर्माण करण्याचं षडयंत्र’

शिवसेना आणि मनोज जरांगे-पाटील यांच्यात मतभेद निर्माण करून राजकीय लाभ मिळवण्याचा प्रयत्न गेल्या दोन ते अडीच वर्षांपासून सुरू असल्याचा आरोप उदय सामंत यांनी केला. या संपूर्ण प्रकरणाचा छडा लागणं आवश्यक असल्याचंही त्यांनी ठामपणे सांगितलं. ५०० कोटी रुपयांच्या आरोपाचा विषय शिवसेनेसाठी संपल्याचं सामंत यांनी म्हटलं. एका जाहीर सभेत एकनाथ शिंदे यांनी आपण कोणालाही पैसे दिले नाहीत आणि कोणाकडून घेतलेही नाहीत, अशी भूमिका मांडल्याचा उल्लेख त्यांनी केला.

कथित ऑडिओ क्लिपमधील एका महिलेच्या संभाषणातून ५०० कोटी रुपयांचा विषय पुढे आणून शिवसेना आणि एकनाथ शिंदे यांची बदनामी केली जात असल्याचा आरोपही सामंत यांनी केला. त्यामुळे संबंधित महिलेची सखोल चौकशी करण्याची मागणी त्यांनी केली आहे. दरम्यान, या कथित ऑडिओ क्लिपची सत्यता आणि त्यातील संभाषणाचा नेमका संदर्भ अधिकृत तपासातून स्पष्ट होणे महत्त्वाचे ठरणार आहे. सध्या या प्रकरणावरून राज्यातील राजकीय वातावरण चांगलंच तापलं आहे.