Bharat Gogawale : निमंत्रण पत्रिकेतून नाव गायब? गोगावलेंचा हक्कभंगाचा इशारा; तटकरेंचाही पलटवार; म्हणाले, 'आधी स्वतःकडे पाहा'

Raigad News : रायगडमध्ये पुन्हा एकदा राष्ट्रवादी आणि शिवसेनेते वादाची ठिणगी पडली आहे. तटकरे आणि गोगावले आमने-सामने आल्याने राजकीय वर्तुळात चर्चा सुरू झाली आहे. नगर पालिकेतील नव्या चिंतमण देशमुख सभागृहाचे लोकार्पण सोहळ्याच्या निमंत्रण पत्रिकेतून मंत्री भरत गोगावले यांचा नामोल्लेख टाळल्याने त्यांनी नाराजी व्यक्त केली आहे. तसेच मुख्याधिकारी यांच्याविरोधात हक्कभंग आणू असाही इशारा गोगावले यांनी दिला आहे. यावरून आता माजी आमदार अनिकेत तटकरे यांनी जोरदार निशाना साधला असून टीका देखील केली आहे. त्यांनी गोगावलेंना सल्ला देताना, आधी त्यांनी आपल्या गिरेबानमध्ये झाकून पहावं, आणि नंतर हक्कभंगचा विचार करावा असे म्हटलं.

पालकमंत्री पदावरून निर्माण झालेला वाद काही दिवसांपूर्वी शांत होण्याची चिन्हे दिसत असतानाच रोहा येथील कार्यक्रमामुळे पुन्हा वाद सुरू झाला आहे. नव्याने उभारलेल्या डॉ. चिंतामणराव देशमुख सभागृहाचे लोकार्पण उपमुख्यमंत्री अजितदादा पवार यांच्या हस्ते झाले. यावेळी निमंत्रण पत्रिकेतून मंत्री गोगावले यांचा नामोल्लेख टाळण्यात आला. यावरूनच आता वादाची ठिणगी पडली आहे.

गोगावले यांनी यावर नाराजी व्यक्त करताना आपण रोहा नगरपालिकेच्या मुख्याधिकारी यांच्या विरोधात हक्कभंग आणणार असल्याचा इशारा दिला होता. तसेच आम्ही कार्यक्रम करताना सर्वांची नावे टाकतो. या पुढे आम्ही बघू, असे संकेत त्यांनी खासदार तटकरे यांचे नाव न घेता दिले आहेत.

यावर पलटवार करताना अनिकेत तटकरे यांनी, गोगवाले यांना हक्कभंग आणायचा असेल तर आधी अलिबाग नगरपालिकेच्या मुख्याधिकारी यांच्या विरोधात आणावा. ज्यावेळी अलिबागमध्ये मत्स्य एक्वेरियमचे भूमिपूजन झाले त्यावेळी झालेल्या कार्यक्रमात गोगावलेंचा अपमान त्यांच्याच आमदाराने केला. स्थानिक आमदार महेंद्र दळवी यांचेच नाव त्या इमारतीच्या कोन शिलेवर कोरलं आहे. आमचे सोडा त्यांचाच आमदार त्यांचा मानसन्मान करत नाही. त्यामुळे आधी त्यांनी थोडासा विचार करावा.

असेच काहीसे पोलादपूरमध्ये देखील आरोग्य मंत्री प्रकाश आबिटकर यांच्या उपस्थितीत झालेल्या कार्यक्रमावेळी झाले आहे. ग्रामीण रूग्णालयाच्या उद्घाटन सोहळ्यावेळी भरत गोगावले, आबिटकर साहेब यांच्यासह मंत्री बोर्डेकर यांचेही नाव आहे. पण मंत्री आदिती तटकरे आणि खासदार सुनील तटकरे यांची नावे यात टाळण्यात आली आहेत.

ज्या पद्धतीने गोगावले मंत्री आहेत. त्याचपद्धतीने आदिती तटकरे देखील रायगडच्या मंत्री आहेत. तटकरे साहेब तर याच मतदारसंघाचे खासदार आहेत. त्यामुळे एकीकडे दुसऱ्याकडे बोट दाखवण्याआधी तुम्ही काय केलंत हे पाहावं आणि मगच बोलावं असेही तटकरे यांनी सुनावलं आहे.

FAQs :

प्र.1: नेमका वाद काय?
उ.1 : रोहा नगर पालिकेतील नव्या चिंतमण देशमुख सभागृहाचे लोकार्पण सोहळ्यात निमंत्रण पत्रिकेतून मंत्री भरत गोगावले यांचा नामोल्लेख टाळल्याने वादाला सुरूवात

प्र.2 : मंत्री गोगावले यांचा कोणता इशारा?
उ.2 : मोल्लेख टाळल्याने गोगावले यांनी नाराजी व्यक्त करत नगर पालिकेच्या मुख्याधिकाऱ्यांविरोधात हक्कभंग आणण्याचा इशारा दिला आहे.

प्र.3 : माजी आमदार तटकरे काय म्हणाले?
उ.3 : मंत्री गोगावले यांनी दिलेल्या इशाऱ्यानंतर माजी आमदार तटकरे यांनी त्यांनी आधी अलिबागच्या मुख्याधिकाऱ्यांवर हक्कभंग आणावा, त्यानंतर विचार कारावा असे म्हटलं आहे.