Raigad Crime : रायगड हादरलं! शिवसेना नेत्याची निर्घृण हत्या, ठाकरेंच्या नगरसेविकेची गाडीच फोडली

1. खोपोली येथे शिवसेनेचे नेते मंगेश काळोखे यांची निर्घृण हत्या झाल्याने रायगड जिल्ह्यात खळबळ उडाली आहे.

2. या प्रकरणात राष्ट्रवादी काँग्रेस (अजित पवार गट)च्या जिल्हाध्यक्षांसह 8 जणांवर गुन्हे दाखल करण्यात आले आहेत.

3. उरणमध्ये शिवसेना उद्धव ठाकरे गटाच्या नगरसेविकेच्या वाहनावर हल्ला झाल्याने परिसरात भीतीचे वातावरण आहे.

Raigad Crime News : रायगड जिल्ह्यातील खोपोलीमध्ये एकनाथ शिंदेंच्या शिवसेनेच्या नवनिर्वाचित नगरसेविका मानसी काळोखे यांचे पती मंगेश काळोखे यांची काही अज्ञात व्यक्तींनी हत्या केली. मंगेश यांचा जीव तलवार, विळा आणि कुऱ्हाडीने वार करून घेतला गेला. ज्यानंतर येथे खळबळ उडाली असून राजकीय हेतूने झाल्याचा आरोप मंत्री भरत गोगावले यांनी राष्ट्रवादीचे नाव घेत केला आहे. तर हा आरोप प्रदेशाध्यक्ष सुनील तटकरे यांनी फेटाळला आहे. या आरोप-प्रत्यारोपांमुळे रायगडमध्ये सध्या तणावाचे वातावरण असतानाच उरणमध्ये उद्धव ठाकरेंच्या शिवसेनेच्या नगरसेविकेची गाडी फोडण्यात आली आहे. यामुळे आता रायगड जिल्ह्यात कायदा आणि सुव्यवस्था आहे की नाही, असा सवाल जनता विचारताना दिसत आहे. तर या घटनेमुळे येथे चिंतेचे वातावरण तयार झाले आहे.

ही घटना उरणमध्ये घडली असून नगरपरिषदेच्या प्रभाग 4 मधून ठाकरेंच्या मशालीवर निवडून आलेल्या नगरसेविका प्रमिला पवार यांच्यासोबत झाली आहे. प्रमिला पवार या नगरसेविका म्हणून निवडून आल्यानंतर त्यांनी विजयाचा आनंद साजरा करत मतदारांच्या भेटीगाठी घेतल्या.

यावेळी त्यांनी आपली चारचाकी गाडी बोरी गावातील मध्यवरती भागात पार्क केली होती. पण ती काही अज्ञातांनी फोडली. या हल्ल्यामुळे आता परिसरात चिंतेचा सूर निर्माण झाला असून, स्थानिकांमध्ये भीतीचे वातावरण तयार झाले आहे.

या घटनेनंतर प्रमिला पवार यांनी तातडीने उरण पोलीस ठाण्यात तक्रार दाखल केली असून पोलिसांनी अज्ञाताविरोधात गुन्हा दाखल केला आहे. पोलिस तपास करत असून प्राथमिक तपासात वैमनस्य किंवा विरोधकांनी केलेले कृत्य असू शकते अशी शक्यता व्यक्त करण्यात आली आहे. दरम्यान पोलिसांनी आरोपींचा शोध सुरु केला असून पोलीस बंदोबस्त तैनात केला आहे. तसेच परिसरातील सीसीटी तपासले जात आहेत.

दरम्यान आरोपींचा शोध घेऊन या प्रकारातील दोषींवर कठोर कारवाई केली जाईल आणि नागरिकांची सुरक्षा सुनिश्चित केली जाईल असे आश्वासन वरिष्ठ पोलीस अधिकाऱ्यांनी दिलं आहे. तर निवडणूक जिंकलेल्या नगरसेविकेच्या पतीची एकीकडे हत्या होणे तर दुसरीकडे निवडणूक जिंकलेल्या नगरसेविकेच्या वाहनावर हल्ला होणे या गोष्टी स्थानिक राजकीय वर्तुळात दडपशाही किंवा दबाव आणण्यासाठीचा प्रयत्न असल्याची येथे चर्चा रंगली आहे.

FAQs :

Q1. खोपोली हत्याकांडात कोणाची हत्या झाली?
👉 शिवसेनेचे नेते मंगेश काळोखे यांची हत्या झाली आहे.

Q2. या प्रकरणात कोणावर गुन्हे दाखल झाले आहेत?
👉 राष्ट्रवादी काँग्रेस (अजित पवार गट)चे जिल्हाध्यक्ष सुधाकर घारे, प्रवक्ते भरत भगत यांच्यासह 8 जणांवर गुन्हे दाखल झाले आहेत.

Q3. या घटनेनंतर रायगडमध्ये काय परिस्थिती आहे?
👉 रायगड जिल्ह्यात भीतीचे आणि तणावाचे वातावरण निर्माण झाले आहे.

Q4. उरणमध्ये नेमकी कोणती घटना घडली?
👉 शिवसेना उद्धव ठाकरे गटाच्या नगरसेविका प्रमिला पवार यांच्या वाहनाची अज्ञातांनी तोडफोड केली.

Q5. पोलीस प्रशासनाकडून काय कारवाई सुरू आहे?
👉 हत्या आणि हल्ल्याच्या दोन्ही प्रकरणांचा तपास सुरू असून कडक कारवाईचे संकेत देण्यात आले आहेत.