Shivsena Vs NCP : तळकोकणात सत्तेची थरारक लढत? शिंदेंची शिवसेना विरुद्ध दादांची राष्ट्रवादी, पाच माजी सभापतीही मैदानात

Ratnagiri News : सचिन माळी

पंचायत समिती निवडणुकांच्या पार्श्वभूमीवर तालुक्यात राजकीय तापमान वाढत चालले आहे. आरक्षणानुसार तालुक्यातील दोन्ही जिल्हा परिषद गट सर्वसाधारण प्रवर्गाकरिता खुले झाल्याने राजकीय पक्षांमध्ये आनंदाचे वातावरण निर्माण झाले आहे. सत्तेच्या संघर्षाची खरी चुरस पंचायत समितीच्या मैदानातच दिसून येत असून, सभापतिपदासह दोन महिला आरक्षण जाहीर झाल्यानंतर मोर्चेबांधणीला वेग आला आहे. तर येथे सभापतिपद भूषवलेल्या वैशाली चारगे, प्रेरणा घोसाळकर, अमिता शिंदे, प्रणाली चिले, स्नेहल सकपाळ या पाच महिला माजी सभापतीही पुन्हा रिंगणात उतरण्याची शक्यता आहे. यामुळे पंचायत समितीच्या निवडणुकीत रंगत वाढणार आहे.

एकीकडे जिल्ह्यात पंचायत समितीच्या सभापतीसह आता गणांचे आरक्षणही जाहीर झाले आहे. त्यामुळे आता दुसरीकडे राजकीय पक्षांसह इच्छूक उमेदवारांची भाऊ गर्दीही पाहायला मिळत आहे. याचा फटका राज्याचे उपमुख्यमंत्री एकनाथ शिंदे यांच्या शिवसेनेला बसण्याची शक्यता आहे. सध्या तालुक्यात सर्वाधिक मजबूत पक्ष म्हणून शिवसेना उभी आहे. एकट्याच्या बळावर विजयाची दावेदार मानली जाणारी शिंदे सेनेत सध्या चार जागांसाठी तब्बल 24 इच्छुक उमेदवार आहेत. यामुळे शिवसेना इच्छुकांच्या भाऊ गर्दीच्या स्पर्धेत अडकलेली दिसतेय.

त्यातील अनेक कार्यकर्ते आपापल्या गणात आणि गटात सक्रियपणे कामाला लागले आहेत. यामध्ये दोन जागा महिला प्रवर्गासाठी राखीव असल्याने, चार माजी महिला सभापतींपैकी एक किंवा दोन महिलांना पुन्हा संधी मिळण्याची शक्यता राजकीय वर्तुळात व्यक्त केली जात आहे. आरक्षण अनुकूल असल्यास अधिकाराने आणि प्रतिकूल असल्यास नव्या तोडीजीडीच्या भूमिकेतून काम सुरू असल्याचे स्पष्ट दिसते.

दुसरीकडे, उबाठा सेनेतही उमेदवार शोध सुरू आहे. या पक्षातील एक माजी महिला सभापतीला अनुकूल गणात आरक्षण मिळाले असून, त्यांच्या माध्यमातून मजबूत आव्हान उभे करण्याची तयारी सुरू असल्याचे संकेत आहेत. उबाठा सेना अन्य जागांवर उमेदवार देण्यासाठी सज्ज असली तरी, स्वतंत्र लढा देणार की, युतीच्या माध्यमातून निवडणुकीला सामोरे जाणार, यावरच त्यांचे राजकीय गणित अवलंबून आहे.

अजित पवार गटाचे सध्या तालुक्यात जुन्या आणि नव्या काँग्रेसी विचारसरणीच्या कार्यकर्त्यांना एकत्र आणून मतदारवर्ग वाढवण्याचे प्रयत्न सुरू आहेत. त्यामुळे या निवडणुकीत शिंदे सेना आणि उबाठा सेना यांच्यातील संघर्षाबरोबरच काँग्रेस व राष्ट्रवादीतील नव्या हालचाली तालुक्यातील राजकारणाचे समीकरण अधिकच रंजक बनवतील, असे चित्र सध्या दिसत आहे.

समन्वयाचा अभाव

दरम्यान, राष्ट्रवादी काँग्रेस (अजित पवार गट) आणि शिंदे गट हे राज्यात महायुतीचे भागीदार असले तरी तालुक्यात स्थानिक पातळीवर या दोन्ही गटांमध्ये सहकार्य समन्वयाचा अभाव दिसून येतो. मंडणगड नगरपंचायतीतील अनुभव पाहता स्थानिक सत्ताकारणात हे दोन्ही गट एकमेकांसमोर उभे ठाकण्याची शक्यता आहे.

FAQs :

1. तळकोकणात कोणते दोन प्रमुख पक्ष आमने-सामने आले आहेत?
→ शिंदे गटाची शिवसेना आणि अजित पवार यांच्या राष्ट्रवादी काँग्रेस आमने-सामने आल्या आहेत.

2. किती माजी सभापती पुन्हा रिंगणात उतरण्याची शक्यता आहे?
→ पाच माजी सभापती पुन्हा निवडणुकीत उतरण्याची शक्यता आहे.

3. कोणत्या कारणामुळे शिंदेंच्या शिवसेनेत अडचण निर्माण झाली आहे?
→ उमेदवारांच्या अंतर्गत स्पर्धेमुळे पक्षात तणाव वाढला आहे.

4. या निवडणुकांचे प्रमुख रणांगण कोणते आहे?
→ पंचायत समिती आणि जिल्हा परिषद निवडणुका हेच प्रमुख रणांगण आहे.

5. या निवडणुकीत सत्तेची लढत कोणत्या पातळीवर पाहायला मिळणार आहे?
→ तालुका आणि पंचायत समिती स्तरावर तीव्र सत्तासंघर्ष दिसून येणार आहे.