Shivsena Setback : ऑपरेशन टायगरनंतर नवे राजकीय वादळ! शिंदेंच्या शिवसेनेला सलग दुसरा झटका! कारणही आलं समोर

Mumbai News : उद्धव ठाकरे यांचे एकाच वेळी सहा खासदार फुटल्याने राज्यात जोरदार खळबळ उडाली. शिंदेंच्या ऑपरेशन टायगरमुळे हा राजकीय भूकंप झाला. ज्यानंतर शिंदेंच्या ऑपरेशन टायगरसह फुटलेल्या खासदारांची राज्यासह देशात जोरदार चर्चा सुरू झाली. यादरम्यान आता उद्धव ठाकरेंनी राज्यभराचा दौरा आखत या बंडखोर खासदारांना जोरदार प्रत्युत्तर देण्याचा कार्यक्रम हाती घेतला आहे. एकीकडे आरोप-प्रत्यारोप सुरू झाले असतानाच शिंदेंच्या शिवसेनेला उल्हासनगरमध्ये मोठा धक्का बसला आहे. येथे शिंदेंच्या दुसरा नगरसेवकही अपात्र ठरला असून नगरसेविका पूजा भोईर यांचे नगरसेवक पद गेले आहे. यामुळे राजकीय वर्तुळात खळबळ उडाली आहे.

उल्हासनगरमध्ये शिवसेना नगरसेवक विक्की सिंग लबाना यांच्यावर अपात्रतेची कारवाई झाली होती. जिल्हा जात पडताळणी प्रमाणपत्र समिती, नाशिक यांनी विकी सिंग लबाना यांचे जात प्रमाणपत्र अवैध ठरवले होते. लबाना यांनी बंजारा जातीचे प्रमाणपत्र सादर करून नागरिकांचा मागासवर्ग (ओबीसी) प्रवर्गातून निवडणूक लढवली होती.

मात्र जात पडताळणी प्रक्रियेत त्रुटी आढळल्याने त्यांचे प्रमाणपत्र अवैध ठरवण्यात आले. यानंतर उल्हासनगर महानगरपालिका आयुक्त मनीषा आव्हाळे यांनी विकी सिंग लबाना यांचे नगरसेवक पद रद्द करण्यात आल्याचे जाहीर केले.

या निर्णयामुळे उल्हासनगरच्या राजकीय वर्तुळात खळबळ उडाली होती. यामुळे उल्हासनगर महानगरपालिका राजकारणात मोठी घडामोड घडल्याचे बोलले जात होते. तर एकनाथ शिंदे यांच्या शिवसेनेला मोठा धक्का बसल्याची राजकीय वर्तुळात चर्चा सुरू झाली होती.

या घटनेला फक्त महिनाच झाला असताना शिंदेंच्या शिवसेनेला दुसरा मोठा धक्का बसला आहे. येथे नगरसेविका पूजा भोईर यांचे जात प्रमाणपत्र अवैध ठरल्याने त्यांना महापालिका आयुक्तांनी अपात्र घोषित केले आहे. पूजा भोईर यांचे अनुसूचित जमातीचे प्रमाणपत्र अवैध झाल्यामुळे त्यांचे नगरसेवक पद गेलं आहे.

आधी विक्की सिंग लबाना आणि आता पूजा भोईर यांचे नगरसेवक पद गेल्याने उल्हासनगरच्या राजकीय वर्तुळात राजकारणात एकच खळबळ उडाली आहे. एका महिन्याच्या कालावधीत शिवसेनेच्या दोन नगरसेवकांना अपात्र ठरवण्यात आल्याने याचा परिणाम आगामी राजकीय समीकरणांवर होण्याची शक्यता व्यक्त होत आहे.