Women's Day : महिला आमदारांनाच 'महिला' प्रश्नांचे वावडे; विधिमंडळातील 'वुमेन्स डे स्पेशल' चर्चा रद्द

मुंबई : महाराष्ट्र विधिमंडळात शनिवारी (8 मार्च) रोजी होणारी एकदिवयी 'महिला दिन विशेष चर्चा' रद्द करण्यात आली आहे. महिला आमदारांनी मुख्यमंत्री देवेंद्र फडणवीस आणि विधानसभा अध्यक्ष राहुल नार्वेकर यांना विनंती केल्यानंतर हा निर्णय घेण्यात आला आहे.

अधिवेशनादरम्यान, शनिवार आणि रविवारी विधिमंडळाचे कामकाज बंद असते. पण, यावेळी 8 मार्च रोजी महिला दिनी कामकाज घ्यावे असे अधिवेशनापूर्वीच्या कामकाज सल्लागार समितीच्या बैठकीत ठरले होते. या दिवशी फक्त महिलांच्या प्रश्नांवर विधिमंडळात चर्चा व्हावी आणि त्यावर ठोस निर्णय व्हावेत अशी संकल्पना होती.

मात्र, महिला आमदारांनी आपापल्या मतदारसंघातील महिला दिनाच्या कार्यक्रमांना हजेरी लावायची होती. त्यामुळे ही एकदिवसीय चर्चा रद्द करावी आणि पुन्हा कधी तरी ठेवावी अशी विनंती या महिला आमदारांनी मुख्यमंत्री देवेंद्र फडणवीस (Devendra Fadnavis) आणि विधानसभा अध्यक्ष राहुल नार्वेकर यांना केली.

त्यानुसार आता 8 मार्चला विधिमंडळ कामकाज होणार नाही. यामुळे अधिवेशन कामकाजाचा आणखी एक दिवस कमी झालाच आहे. पण या निमित्ताने महिलांच्या प्रश्नांवर पूर्ण दिवसभर चर्चा होण्याची संधीही महिला आमदारांनी गमावली आहे, असे म्हणायला हरकत नाही.

25 वर्षे पूर्ण करणारा ई-सकाळ आता कॉमस्कोअरमध्ये नंबर 1. डिजिटल माध्यमांच्या क्षेत्रातली नवी झेप