Abdul Sattar : मुलाला आमदार करण्यासाठी अब्दुल सत्तारांची नवी खेळी!

छत्रपती संभाजीनगर : शिवसेनेचे माजी मंत्री अब्दुल सत्तार (Abdul Sattar) यांनी यापुढे आपण विधानसभेची निवडणूक लढवणार नाही, असे काल मतदारंसघातील एका कार्यक्रमात बोलताना जाहीर केले. राजकारणात विकासापेक्षा जातीयवादाला अधिक महत्व दिले जात असल्याने सिल्लोड नगरपरिषदेची निवडणूक ही आपली शेवटची निवडणुक असेल, असे ते म्हणाले. मी मुलाला तुला निवडणूक लढवायची असेल तर लढवं, असे आपण त्याला सांगितल्याचे सत्तार यांनी यावेळी सांगितले.

याचाच अर्थ अब्दुल सत्तार आता हा मतदारसंघ मुलासाठी सोडून स्वतः मागच्या दाराने राज्याच्या राजकारणात जाऊ पाहत आहे, अशी चर्चा या निमित्ताने होत आहे. मंत्री असून मी, सावे काठावर पास झालो. नाना पटोल दोनशे आठ मतांनी निवडून आले. मुख्यमंत्री पदावर दावा करणाऱ्यांचे हे हाल झाले. बाळासाहेब थोरात, बाबा हे तर पडले, असे सांगत सत्तार यांनी काल उद्विग्नता व्यक्त केली.

अब्दुल सत्तार यांनी विधानसभा लढवणार नाही, हे आज जाहीर जरी केले असले तर ते आपल्या निर्णयावर ठाम राहतीलच, असे नाही. मंत्रीपद न मिळाल्यामुळे अडीच वर्ष मी थांबू शकत नाही, असे सांगणारे सत्तार निवडणूकच लढवणार नाही, हे पचनी पडत नाही. सत्तार यांचे राजकारण ज्यांनी जवळून पाहिले आहे, ते यावर विश्वास ठेवायला तयार नाहीत. 'मी मुलाला सांगितले तुला लढायचे असेल तर तू लढ' या त्याच्या विधानाकडे गांभीर्याने पहावे लागेल.

अब्दुल सत्तार हे आपल्या मुलासाठी सिल्लोड-सोयगाव मतदारसंघ सोडून मागच्या दाराने राज्याच्या राजकारणात सक्रीय राहतील, असा अंदाज आहे. राजकारणातील घराणेशाही हा काही नवा विषय राहिलेला नाही. राज्यातील अनेक राजकीय कुटुंबामध्ये ही परंपरा सुरू आहे. अगदी मराठवाड्यात लातूरचे देशमुख, नांदेडचे चव्हाण, जालन्याचे दानवे, लोणीकर अशा किती तरी नेत्यांची नावे देता येतील.

अब्दुल सत्तार यांना कौटुंबिक अशी राजकीय पार्श्वभूमी नसली तरी, पुढच्या पिढीला म्हणजे मुलाला ते या क्षेत्रात उभे करण्याच्या प्रयत्नात निश्चित आहे. सिल्लोड नगरपरिषदेवर एकहाती सत्ता असल्यामुळे सत्तार यांच्या पत्नी नगराध्यक्ष झाल्या होत्या, त्यानंतर मुलगा समीर हा देखील नगराध्यक्ष होता. अब्दुल सत्तार यांच्या पावलावर पाऊल ठेवत राजकारणाचे धडे गिरवणाऱ्या या मुलाला आमदार करण्यासाठीच सत्तार यांनी पुढची निवडणूक आपण लढवणार नसल्याचे जाहीर करून टाकले.

जातीयवाद वाढला, मी विकास कामे करूनही कमी मतांनी निवडून आलो ही कारणे त्यांच्या राजकारणाचा भाग म्हणून दिली गेली असावी. मुळात मुलाला आमदार आणि स्वतः मागच्या दाराने प्रवेश करून घराणेशाही चालवण्याच्या दृ़ष्टीने सत्तार याचे हे पाऊल असल्याचे म्हणावे लागेल. पैठणचे पाचवेळा आमदार आणि आता छत्रपती संभाजीनगर जिल्ह्याचे खासदार असलेल्या संदीपान भुमरे यांनी मुलासाठी मतदारसंघ रिकामा केला.

आता भुमरे खासदार आणि त्यांचा मुलगा आमदार आहे. जालन्यात रावसाहेब दानवे हे केंद्रात मंत्री, पाच वेळा खासदार तर मुलगा संतोष दानवे भोकरदन मतदारसंघातून तिसऱ्यांदा आमदार आहे. हाच प्रयोग आता अब्दुल सत्तार आपल्या सिल्लोड-सोयगाव मतदारसंघात करू पाहत आहेत, एवढाच त्यांच्या निवडणूक न लढवण्याच्या निर्णयाचा अर्थ तुर्तास निघू शकतो.