Ashok Chavan News : 'तुमचे आमदार आमच्या जिवावर निवडून आले!' अशोक चव्हाणांचा शिवसेनेवर प्रहार; 'लेना ना देना...' म्हणत उडवली खिल्ली

Nanded News : नांदेड महापालिकेत स्वबळावर लढणाऱ्या भाजपचा आत्मविश्वास कमालीचा वाढला आहे. शिवसेनेसोबत युती न करण्याचा निर्णय अशोक चव्हाण यांनी घेतला तेव्हापासून या दोन्ही पक्षांमध्ये कमालीचा तणाव आहे. एका सभेत अशोक चव्हाण यांनी 'लेना ना देना, फुकटकी शिवसेना', अशा शब्दात अशोक चव्हाण यांनी शिवसेनेची खिल्ली उडवली.

नांदेड जिल्ह्यात शिवसेनेला युतीमध्ये भाजपने तिकीटं दिली, आम्ही मनापासून त्यांचे काम केले म्हणून ते निवडून आले. शिवसेना आमच्या जीवावर निवडून आली, असा दावाही चव्हाण यांनी केला.शिवसेनेचे लोक मला टाईट मारू लागले, मी त्यांच्या बंदोबस्त केला. माझ्याकडे सगळ्यावर औषध आहे, जसा आजार तसा उपचार, असे म्हणत अशोक चव्हाणांनी शिवसेनेवर हल्ला चढवला.

ज्यांना इकडे तिकीट मिळाले नाही ते लोक शिवसेनेत गेले, पण जो गया वो बरबाद हो गया. लाडक्या बहीणींनी पण हे लक्षात ठेवावे की त्यांचा पक्ष हा भाजप आहे. राज्याचा मुख्यमंत्री हा राजा असतो अन् ते आपले देवाभाऊ आहेत. नांदेडच्या विकासासाठी ते काहीही कमी पडू देणार नाही.नांदेडकरांचा माझ्यावर आणि माझा तुमच्यावर विश्वास आहे.

तुम्ही मला आमदार, खासदार, मुख्यमंत्री केले. मी नांदेडच्या विकासासाठी धडाधड सह्या करायचो. देवाभाऊही आता नांदेडला निधी देतांना त्याचप्रमाणे सह्या करतील, असा विश्वास अशोक चव्हाण यांनी व्यक्त केला. देशात, राज्यात आणि नांदडेमध्येही आता फक्त कमळच आहे, हे लोकांनी लक्षात घेतलं पाहिजे.

मी जे बोलतो ते करतो, याचा अनुभव नांदेडकरांनी घेतला आहे. आपली कामं, योजना मार्गी लावायच्या आहेत. लोकं माझ्याबरोबर आहेत, त्यांची मला साथ आहे. माझे वडील शंकरराव चव्हाण यांनीही नांदेडला कधी काही कमी पडू दिलं नाही. आता राज्यात ट्रिपल इंजिनचं सरकार आहे. पहिलं इंजिन मोदीजींच, दुसर देवाभाऊंच आणि तिसरं अशोक चव्हाणांच. डी.पी. सांवत हे शेवटच्या डब्ब्यात गार्ड म्हणून हिरवा झेंडा दाखवतील, अशी मिश्किल टिप्पणीही अशोक चव्हाण यांनी केली.