Ashok Chavan News : अशोक चव्हाणांचा नांदेडमध्ये काँग्रेसला धक्का! अनेक पदाधिकाऱ्यांची हाती 'कमळ'

नांदेड : आगामी महापालिका, जिल्हा परिषद व इतर स्थानिक स्वराज्य संस्था निवडणुका पाहता सत्ताधारी भाजपने तयारी सुरू केली आहे. नांदेड जिल्ह्यात माजी मुख्यमंत्री तथा भाजपचे खासदार अशोक चव्हाण (Ashok Chavan) यांनी काँग्रेसच्या अनेक पदाधिकाऱ्यांना पक्षात आणून जोरदार दणका दिला आहे. कालच राष्ट्रवादीचे लोहा-कंधारचे आमदार प्रताप पाटील चिखलीकर यांनी भाजप आणि शिवसेना उद्धव बाळासाहेब ठाकरे पक्षातील आपल्या समर्थकांना राष्ट्रवादीत प्रवेश देत स्थानिक स्वराज्य संस्था निवडणुकीच्या दृष्टीने दंड थोपटले.

त्यानंतर आज दुसऱ्याच दिवशी अशोक चव्हाण यांनी काँग्रेसला दणका देत अनेकांचे पक्ष प्रवेश करून घेतले. मुंबई येथे (BJP)भाजप प्रदेश कार्यालयात प्रदेशाध्यक्ष तथा मंत्री चंद्रशेखर बावनकुळे यांच्या प्रमुख उपस्थितीत नांदेड जिल्ह्यातील कंधारचे माजी पं.स. सभापती व काँग्रेसचे तालुकाध्यक्ष बालाजी पांडागळे, लोहाचे उपनगराध्यक्ष व काँग्रेस तालुकाध्यक्ष शरद पाटील पवार, लोहा कृषी उत्पन्न बाजार समितीचे संचालक व मारतळाचे सरपंच भास्करराव पाटील ढगे.

तसेच जिल्हा काँग्रेसचे उपाध्यक्ष भास्करराव पाटील जोमेगावकर, लोहाचे काँग्रेस सेवादल तालुकाध्यक्ष उद्धव पाटील ढेपे, लोहा कृषी उत्पन्न बाजार समितीचे संचालक मधुकर डाकोरे, कंधार काँग्रेस तालुका उपाध्यक्ष नागोराव पाटील, लोहा-कंधार विधानसभेचे युवक काँग्रेसचे अध्यक्ष कमलाकर पाटील शिंदे, लोहा तालुका युवक काँग्रेसचे अध्यक्ष सतीश पाटील ढाकणीकर, शिराढोण सेवा सहकारी सोसायटीचे चेअरमन गोविंद पाटील कपाळे यांनी भाजपमध्ये प्रवेश केला.

दहीकळंबाचे सरपंच अवधूत पाटील शिंदे, मजूर फेडरेशनचे संचालक गजानन पांडागळे, काँग्रेसचे जिल्हा उपाध्यक्ष ताराकांत पाटील नरंगलकर यांनीही अशोक चव्हाण यांच्यावर विश्वास दाखवत भाजपमध्ये प्रवेश केला. अशोक चव्हाण, बावनकुळे यांनी या सर्वांचे भारतीय जनता पक्षात स्वागत असल्याचे म्हटले आहे.

नुकत्याच झालेल्या विधानसभा निवडणुकीत महायुतीला नांदेड जिल्ह्यात शतप्रतिशत यश मिळाले. महायुतीचे सर्व उमेदवार निवडून आले असले तरी जिल्ह्याला एकही मंत्रीपद न मिळाल्याची खंत नेत्यांच्या मनात आहे. आगामी महापालिका, जिल्हा परिषद निवडणुकीच्या दृष्टीने सर्वच राजकीय पक्षांनी संघटनात्मक बांधणी अधिक भक्कम करण्याच्या दृष्टीने हालचाली सुरू केल्या आहेत.

शिवसेना उद्धव बाळासाहेब ठाकरे पक्षाने नुकत्याच जिल्ह्यातील प्रमुख पदाधिकाऱ्यांच्या नियुक्त्या जाहीर केल्या. तर राष्ट्रवादी काँग्रेस पक्षाने भाजप, उद्धवसेनेच्या अनेक पदाधिकाऱ्यांना पक्षप्रेवश देत आघाडी घेतली. आता काँग्रेसच्या पदाधिकाऱ्यांना भाजपमध्ये आणत अशोक चव्हाण हे देखील कामाला लागले आहेत.