Shivsena News : "आता जरांगे पाटील आणि जनताच माझा पक्ष..." शिंदेसेनेच्या जिल्हाप्रमुखाची पक्षाला सोडचिठ्ठी

Beed News, 12 Nov : 'यापुढे मनोज जरांगे पाटील व जनताच आपला पक्ष असेल'. असं म्हणत शिवसेना जिल्हाप्रमुखपदाचा राजीनामा देत इथून पुढे आपण कोणत्याच पक्षात जाणार नसल्याचं अनिल जगताप यांनी जाहीर केलं आहे.

मुख्यमंत्री एकनाथ शिंदे (Eknath Shinde) यांनी बीड जिल्ह्यातील एकमेव जागाही अजित पवारांच्या राष्ट्रवादी काँग्रेसच्या पदरात टाकल्यामुळे या निवडणुकीत जिल्ह्यात शिवसेनचा धनुष्यबाण हे चिन्ह दिसणार नाही. मात्र, बीडची जागा राष्ट्रवादी काँग्रेसकडे जाताच अनिल जगताप हे बंडखोरी करत अपक्ष निवडणुकीच्या रिंगणात उतरले.

39 वर्षांपासून शिवसेनेचे काम करणारे जगताप मागील 18 वर्षांपासून शिवसेनेचे जिल्हाप्रमुख होते. मनोज जरांगे पाटील (Manoj Jarange Patil) यांच्या मराठा आरक्षण आंदोलनात देखील ते सक्रिय असतात. शिवसेनेने मागच्या वर्षी हाती घेतलेला 'होऊ दे चर्चा' कार्यक्रम जरांगे पाटील यांचे आंदोलन शांत झाल्यानंतर घ्यावा अशी भूमिका त्यांनी पक्षप्रमुख उद्धव ठाकरे यांच्याकडे मांडली होती.

त्यामुळे आपल्याला पक्षातून काढल्याचा आरोप अनिल जगताप यांनी केला होता. दरम्यान, जानेवारीत शिवसेनेत (Shivsena) प्रवेश करताना आपण मुख्यमंत्री एकनाथ शिंदे यांना मनोज जरांगे पाटील यांच्या आंदोलनात सक्रिय राहणार व निवडणूक लढविणार या दोन अटी घातल्या होत्या.

मुख्यमंत्र्यांनी हे मान्य केल्यानंतरच आपण प्रवेश केल्याचंही त्यांनी सांगितलं आहे. तसंच आपल्यावर 2009 पासून अन्याय होत आहे. मागच्या निवडणुकीतही ऐनवेळी पक्षात आलेल्या जयदत्त क्षीरसागर यांनी उमेदवारी दिली. आता आम्ही जरांगे पाटलांकडून उमेदवारी अर्ज दाखल केला होता.

त्यांनी अर्ज काढा सांगितल्यानंतर आम्ही कायम मतदारसंघात काम करत असल्याने निवडणूक लढवावी लागणार असल्याची भूमिका मांडली होती. त्यावर त्यांनी होकार दिल्याचंही जगताप म्हणाले. शिवाय यापुढे आपण कोणत्याच पक्षात जाणार नाही आणि आपला पक्ष मनोज जरांगे पाटील व जनताच असल्याचंही त्यांनी यावेळी जाहीर केलं.