Shivsena News : शिवसेनेच्या तंबूत भाजप अन् मनसे इच्छुकांची घुसखोरी,अर्जही घेतले! चार तासांत पाचशे फाॅर्म संपले

Chhatrapati Sambhajinagar News : छत्रपती संभाजीनगर महापालिका निवडणुकीसाठी शिंदेंच्या शिवसेनेने आजपासून अर्ज वाटपाला सुरुवात केली. विशेष म्हणजे पहिल्याच दिवशी शिवसेनेच्या तंबूत शिरत चक्क भाजप अन् मनसेच्या काही कार्यकर्त्यांनीही अर्ज नेले. पहिल्याच दिवशी 536 जणांनी तिकिटासाठी अर्ज खरेदी केले. सोमवारी या सर्व इच्छूकांच्या मुलाखती होणार असून त्यानंतर नावांची निश्चिती केली जाणार आहे.

गेल्या आठवड्यात भाजपने (BJP) इच्छूकांकडून फॉर्म घेतले. तेथे इच्छूकांची संख्या हजाराच्या आसपास होती. त्यानंतरच्या काळात राजकीय हालचाली झाल्याने दोन्ही पक्षांनी स्वबळाची उबळ रोखून धरत समन्वयाने निवडणूक लढवण्याचा निर्णय घेतला. त्यातच शुक्रवारी (ता. 12) शिवसेनेने इच्छूकांना अर्ज वाटप सुरु केले. दुपारी 12 ते 5 या वेळात म्हणजे 4 तासांत एकूण 536 जण अर्ज घेऊन गेले. त्यात भाजप आणि मनसेचेही काही कार्यकर्ते होते.

अर्ज घेऊन जाणाऱ्यांमध्ये सर्वाधिक प्रमाण पश्चिम मतदारसंघातील इच्छूकांचे होते, त्या खालोखाल मध्य मतदार संघातील इच्छूकांनी अर्ज नेले. पूर्व मतदार संघात तुलनेने कमी प्रतिसाद लाभल्याचे शिवसेनेतील (Shivsena) सूत्रांनी सांगितले. शिवसेनेत शहरात दोन आमदारांच्या नेतृत्वात दोन गट आहे. पालकमंत्री संजय शिरसाट पश्चिमचे आमदार आहेत तर प्रदीप जैस्वाल मध्य मतदार संघाचे आमदार आहेत. या दोन्ही नेत्यांचे एकमेकांशी फारसे सख्य नसले तरी त्या त्या मतदारसंघातील इच्छूक त्यांच्या जोरावर तिकीट मागत असल्याचे स्पष्ट जाणवले.

दुसरीकडे, नागपुरात शिरसाट-जंजाळ वादावर तोडगा निघाल्यानंतर शिवसेनेत समन्वय समिती स्थापन झाली असून त्यात पालकमंत्री संजय शिरसाट, खासदार संदीपान भुमरे, आमदार प्रदीप जैस्वाल, जिल्हाप्रमुख राजेंद्र जंजाळ, ऋषिकेश जैस्वाल यांचा समावेश आहे. ही समन्वय समिती महापालिका निवडणुकीत पक्षात समन्वय ठेवण्याचे व नंतर भाजपसोबत जागावाटपाचे काम पाहणार आहे.

अर्जवाटपाच्या वेळी जिल्हाप्रमुख राजेंद्र जंजाळ, ऋषिकेश जैस्वाल, नंदकुमार घोडेले, अशोक पटवर्धन, विकास जैन, हर्षदा शिरसाट आणि पक्षाचे पदाधिकारी उपस्थित होते. शिवसेनेचे हे अर्ज वाटप उद्या (ता. 13) देखील सुरु राहणार असून सोमवारी (ता. 15) समन्वय समिती इच्छूकांच्या मुलाखती घेणार आहे.