Pune BJP: पुणे महापालिकेची निवडणूक लढविण्यासाठी भाजपतर्फे तब्बल 2 हजार 350 इच्छुकांची तयारी; उद्यापासून धडधड वाढणार

Pune News: पुणे महापालिकेची निवडणूक लढविण्यासाठी भाजपतर्फे सुमारे 2 हजार 350 कार्यकर्त्यांनी तयारी दर्शविली आहे. या इच्छुक उमेदवारांची छाननी करण्यासाठी भाजपच्या शहर कार्यालयात शनिवारी (ता. 13) आणि रविवारी (ता.14) कोअर कमिटीतर्फे मुलाखती घेतल्या जाणार आहेत, अशी माहिती निवडणूक प्रमुख गणेश बिडकर यांनी दिली. यानिमित्ताने एकाच प्रभागातील अनेक स्पर्धक एकमेकांच्या पुढे येणार असून, यावेळी शक्तीप्रदर्शन होण्याचीही शक्यता आहे.

पुणे महापालिकेची निवडणूक जानेवारी महिन्यात होण्याची शक्यता आहे. त्यामुळे शहरातील राजकीय पक्षांमधील घडामोडींना वेग आला आहे.भाजपने सोमवार आणि मंगळवार या दोन दिवसांत इच्छुक उमेदवारांना पक्ष कार्यालयातून अर्जाचे वाटप केले होते. त्यानंतर त्यांचे अर्ज हे प्रदेश कार्यालयाकडे पाठवले जाणार असे सांगितले जात होते. पण आता त्यांच्या मुलाखती घेतल्या जाणार असल्याचे स्पष्ट झाले आहे.

शनिवारी सकाळी 10 वाजल्यापासून इच्छुक उमेदवारांच्या प्रभाग निहाय मुलाखती घेतल्या जाणार आहेत. शहरप्रमुख धीरज घाटे, निवडणूक प्रमुख गणेश बिडकर यांच्यासह अन्य पदाधिकारी या मुलाखती घेतल्या जाणार आहेत.

कार्यकर्त्याचे काम, जनसंपर्क, संघटनेत, पार पाडलेल्या जबाबदारी, आरक्षण यासह अन्य गोष्टींची पडताळणी या मुलाखतींमधून होणार आहे. त्यानंतर या अर्जांची छाननी होऊन हे इच्छुकांची नावे प्रदेश कार्यालयाकडे पाठविले जाणार आहेत.

पुणे महापालिकेची निवडणूक भाजप स्वबळावर लढण्याच्या तयारीत आहेत. भाजपकडे इच्छुकांची संख्या देखील प्रचंड मोठ्या प्रमाणात आहे. प्रत्येक प्रभागांमध्ये चार जागांसाठी तब्बल वीस जण इच्छुक असल्याचे पाहायला मिळत आहे .त्यासोबतच पक्षांमध्ये इन्कमिंग करण्यासाठी ही मोठी लाईन भाजपकडे असल्याची पाहायला मिळत आहे. त्यामुळे भाजपकडे निवडणूक लढवण्यासाठी इच्छुक आणि पूर्ण तयारी केलेल्यांची संख्या तब्बल 1 हजार इतकी आहे.

भाजपमध्ये निवडणुकी लढण्याच्या तयारी असलेल्यांची संख्या एक हजारवर असताना काँग्रेस, राष्ट्रवादी काँग्रेस, शिवसेना यांच्याती मोठे पदाधिकारी आणि माजी नगरसेवक असे 21 जण भाजपमध्ये येण्यास इच्छुक असून त्यांना देखील उमेदवारी हवी आहे. इन्कमिंगसाठी वेटिंगवर असलेले हे नेते देखील त्रस्त झाले असून एकदाच काही तो निर्णय घेऊन टाका, असा तगादा त्यांनी भाजपच्या वरिष्ठ नेत्यांकडे लावत आहेत.