Chandrakant Khaire News : सुषमा अंधारे तुमचीचं लफडी मतदारसंघात येवून बाहेर काढतील..

Shivsena : आमदार संजय शिरसाट हे मंत्रीपद न मिळाल्याने अस्वस्थ आहेत आणि त्यामुळे ते काहीही बोलतात. सुषमा अंधारे या शिवसेनेच्या उपनेत्या आहेत. प्रखर भाषण करतात, कायद्याने बोलतात म्हणून यांची टरकली आहे. एखाद्या महिलेबद्दल लफडे वगैरे भाषा वापरणं यांना शोभत नाही. उलट मतदारसंघात येवून सुषमा अंधारे (Sushama Andhare) तुमचीचं लफडी बाहेर काढतील, असा इशारा ठाकरे गटाचे नेते चंद्रकांत खैरे यांनी संजय शिरसाट यांना दिला.

अंधारे यांच्याबद्दल काय लफडे आहे, असे म्हणतात, पण तुमची किती लफडी आहेत, हे बाहेर काढले तर काय होईल? त्यापेक्षा मिळालेल्या खोक्याचे पैसे आहेत, त्यात शांत बसा असा टोला देखील खैरे (Chandrakant Khaire) यांनी लगावला. शिंदे गटाच्या पदाधिकारी मेळाव्यात आमदार संजय शिरसाट (Sanjay Shirsat) यांनी ठाकरे गटाच्या उपनेत्या सुषमा अंधारे यांच्यावर त्यांची नक्कल करत टीका केली होती.

यावरून शिंदे विरुद्ध ठाकरे गटाच्या नेत्यांमध्ये जुंपली आहे. चंद्रकांत खैरे यांनी तर शिरसाट यांची किती लफडी आहेत, ती बाहेर काढली तर काय होईल? असे म्हणत या वादात उडी घेतली आहे. खैरे म्हणाले, शिरसाट यांनी आपण आधी काय होतो, आणि बाळासाहेब ठाकरे, उद्धव ठाकरे यांच्यामुळे काय झालो? हे एकदा तपासून पाहिलं पाहिजे.

गद्दारी करून तुम्ही पन्नास खोके कमावले आहेत, त्यामुळे आता शांत बसलं पाहिजे, कशाला उद्धव ठाकरे व इतर नेत्यांवर टीका करता. अंधारेताई या आमच्या उपनेत्या आहेत, प्रखर, मुद्देसूद आणि कायदेशीर पद्धतीने त्या बोलतात म्हणून तुमची टरकली आहे. याच सुषमा अंधारे उद्या तुमच्याच मतदारसंघात येवून तुमची लफडी बाहेर काढतील, असेही खैरे म्हणाले.