Shiv Sena internal dispute : मंत्रिपद नाकारलेल्या तानाजी सावंतांची एकनाथ शिंदेंच्या सभेकडे पाठ : दीड वर्ष झाले तरी नाराजी दूर होईना...

Mumbai News : राज्यात आगामी काळात होत असलेल्या जिल्हा परिषद व पंचायत समितीचा निवडणूक प्रचार अंतिम टप्प्यात आला आहे. मतदानाला तीन दिवसाचा अवधी असल्याने आता मोठ्या नेत्याच्या सभा होत आहेत. अजित पवार यांच्या निधनानंतर सीएम फडणवीस यांनी प्रचार न करण्याचा निर्णय घेतला आहे. तर उपमुख्यमंत्री एकनाथ शिंदे यांनी काही ठिकाणी प्रचार सभा घेतल्या आहेत.

विशेषतः धाराशिव जिल्ह्यातील शिवसेना उमेदवारांच्या प्रचारासाठी एकनाथ शिंदेंनी सभा घेतली. या सभेला धाराशिव जिल्ह्यातील माजी मंत्री तानाजी सावंत यांनी दांडी मारल्याने जोरदार चर्चा रंगली आहे. मंत्रिमंडळात स्थान न देण्यात आल्यापासून आमदार तानाजी सावंत पक्षाच्या कार्यक्रमाला गैरहजर राहत आहेत. त्यामुळे गेल्या काही दिवसापासून ते नाराज असल्याच्या चर्चा रंगल्या आहेत.

गेल्या चार दिवसापासून तानाजी सावंत (Tanaji Sawant) यांनी धाराशिव जिल्ह्यातील त्यांच्या भूम-परंडा मतदारसंघावर लक्ष केंद्रित केले आहे. त्यांच्या मतदारसंघातील उमेदवारांचा प्रचार करीत असताना त्यांनी जिल्ह्यात इतरत्र जाण्याचे टाळले आहे. त्यांनी विधानसभा निवडणुकीपासून फक्त त्यांच्या मतदारसंघावर लक्ष केंद्रित केले आहे. धाराशिव जिल्ह्यात असूनही सावंत यांनी शिंदेंच्या सभेला दांडी मारली आहे. त्यामुळे नाराज असल्याच्या चर्चेला उधाण आले आहे.

एकनाथ शिंदे (Eknath Shinde ) धाराशिव जिल्ह्यातील उमरगा तालुक्यातील जेवळी येथे प्रचार सभेच्या निमित्ताने आले होते. यावेळी धाराशिव जिल्हाभरातील प्रमुख पदाधिकारी उपस्थित होते. यावेळी माजी आमदार ज्ञानराज चौगुले, माजी खासदार रवींद्र गायकवाड यांच्यासह प्रमुख पदाधिकारी सभेला उपस्थित होते. त्याचवेळी दुसरीकडे माजी पालकमंत्री तानाजी सावंत मात्र गैरहजर होते. त्यामुळे शिवसैनिकात दबक्या आवाजात चर्चा रंगली आहे.

भूम, परंडा, वाशी तालुक्यातील जिल्हा परिषद निवडणुक प्रचारात तानाजी सावंत सक्रिय दिसत आहेत. जिल्हयातील नगरपरिषदेपाठोपाठ जिल्हा परिषद निवडणुकीत तानाजी सावंत यांची मतदारसंघात मित्र पक्षांसोबत युती नाही. पक्षाच्या कार्यक्रमाला त्यांनी दांडी मारली आहे. तानाजी सावंत यांच्या मनात नेमके काय ? सुरु आहे अशा चर्चांना उधाण आले आहे.

दरम्यान, धाराशिव जिल्ह्यातील पारा जिल्हा परिषद गटात झालेल्या सभेतील तानाजी सावंत यांचं एक वक्तव्य चर्चेचा विषय ठरलं आहे. ‘थांब, तुझ्यावर एन्क्वायरी लावतो’ अशा शब्दांत राज्याचे माजी मंत्री आमदार तानाजी सावंत यांनी भरसभेत बंडखोर उमेदवाराला दम दिला. तानाजी सावंत यांनी थेट विरोधी उमेदवारावर टीका केली. सभा स्थळी येताना रस्त्यांच्या दुरवस्थेवरून संताप व्यक्त केला, जनतेला वेठीस धरू नका असा इशारा त्यांनी दिला.