Latur ZP Election News : लातूर 'झेडपी'मध्ये भाजपाचाच अध्यक्ष होणार; आता निलंगेकर-पवारांमध्ये रस्सीखेच

BJP News : लातूर जिल्हा परिषदेचे अध्यक्षपद भाजपालाच मिळणार हे मुंबईत महायुतीच्या नेत्यांमध्ये झालेल्या बैठकीनंतर स्पष्ट झाले आहे. पालकमंत्री शिवेंद्रराजे भोसले यांच्या शासकीय निवासस्थानी झालेल्या चर्चेत महायुतीच्या जिल्ह्यातील नेत्यांमध्ये झेडपीतील सत्तेच्या वाटपाचा फाॅर्म्युला ठरला आहे. आता या पदावर आपल्या समर्थक सदस्याची वर्णी लावण्यासाठी आमदार अभिमन्यू पवार, संभाजी पाटील निलंगेकर यांच्यात रस्सीखेच सुरू झाली आहे.

लातूर जिल्ह्यातील भाजपा (BJP) नेत्यांमधील कुरघोडीचे राजकारण आणि अंतर्गत गटबाजी याचा फटका महापालिका निवडणुकीत पक्षाला बसल्याची चर्चा आहे. यातून नेत्यांनी काही धडा घेतला नाही, त्यामुळे जिल्हा परिषदेवर शतप्रतिशत भाजपाची एकहाती सत्ता आणण्याचे प्रयत्नही फोल ठरले. 18 जागा जिंकत भाजपा महायुतीतील सर्वात मोठा पक्ष ठरला असल्यामुळे सहाजिकच अध्यक्ष पदावर त्यांचा दावा महत्वाचा मानला जातो.

मुंबईत महायुतीतील सर्वपक्षीय नेते, सदस्य आणि पालकमंत्री शिवेंद्रराजे भोसले यांच्यात झालेल्या बैठकीत अध्यक्ष पदाचा उमेदवारही निश्चित झाल्याचे बोलले जाते. आता नेमका हा उमेदवार संभाजी पाटील निलंगेकर यांच्या गुडबुकमधला आहे, की मग अभिमन्यू पवार यांच्या? हे मात्र गुलदस्त्यात आहे.

महापालिका, जिल्हा परिषद निवडणुकीत मिळालेले मर्यादित यश, राष्ट्रवादी काँग्रेस पक्षाचे (NCP) जिल्ह्यातील नेते व राज्याचे सहकार मंत्री बाबासाहेब पाटील यांच्याशी संभाजी पाटील निलंगेकर यांचा नगरपालिका निवडणुकीत झालेला वाद या पार्श्वभूमीवर भाजपाने सावध भूमिका घेतली आहे. जिल्हा परिषदेचे अध्यक्ष पद हे सर्वसाधारण महिलेसाठी राखीव आहे. त्यामुळे पक्षात स्पर्धाही मोठी आहे. 16 मार्च रोजी अध्यक्ष, उपाध्यक्ष पदासाठीचा निवडणूक कार्यक्रम जाहीर झाला आहे.

सरशी कोणाची?

पालकमंत्र्यांच्या बैठकीत जिल्हा परिषद अध्यक्ष पदाचा उमेदवार निश्चित झाल्याची माहिती आहे. आता तो अभिमन्यू पवार की संभाजी पाटील निलंगेकर यांच्या गटाचा आहे? याबाबत कमालीची गुप्तता पाळण्यात येत आहे. भाजपकडून औसा तालुक्यातील लोदगा गटातून पुनम मुक्ता, देवणी तालुक्यातील वंलाडीतून उषा पाटील तर निलंगा तालुक्यातील सरवडी गटातून कविता गोरे व रेणापूर तालुक्यातील खरोळा गटातून शिवकन्या गोडभरले या विजयी झालेल्या आहेत.

यापैकी पुनम मुक्ता आणि उषा पाटील यांच्यापैकी एकीच्या नावावर जिल्हा परिषदेच्या अध्यक्ष म्हणून शिक्कामोर्तब कालच्या बैठकीत झाल्याची माहिती सुत्रांनी दिली आहे. उषा पाटील या संभाजी पाटील निलंगेकर समर्थ आहेत, तर पुनम मुक्ता या आमदार अभिमन्यू पवार यांचे कट्टर समर्थक संतोष मुक्ता यांच्या पत्नी आहेत.

उपाध्यक्षपद राष्ट्रवादीला

18 जागा असलेल्या भाजपला अध्यक्ष पद, तर 12 जागा जिंकलेल्या राष्ट्रवादी काँग्रेस पक्षाला उपाध्यक्ष पद देण्यात येणार आहे. राष्ट्रवादीकडे सत्तेच्या चाव्या असल्या तरी त्यांच्याकडे सर्वसाधारण महिला सदस्य नाही. त्यामुळे उपाध्यक्ष पदासह काही महत्त्वाची सभापती पद आपल्याकडे घेण्याचा त्यांचा प्रयत्न असणार आहे.