Murlidhar Mohol News : मंत्री मुरलीधर मोहोळ सक्तीच्या विश्रांतीवर, 29 वर्षांपूर्वीच दुखणं उद्भवलं अन्…, स्वतः सांगितलं काय झालं?

Pune News : पुण्याचे खासदार आणि केंद्रीय मंत्री मुरलीधर मोहोळ यांना एक महिन्याच्या सक्तीच्या विश्रांतीवर जावे लागले आहे. डॉक्टरांच्या सूचनेनुसार मोहोळ ही विश्रांती घेत असून 29 वर्षांपूर्वी कुस्ती दरम्यान झालेले दुखणं आत्ता उद्भवल्याने ही सक्तीची रजा त्यांना घ्यावी लागत आहे.

गेल्या काही दिवसांपासून खासदार मुरलीधर मोहोळ यांना पायाचा त्रास जाणवत होता. त्यानंतर त्यांनी याबाबत इलाज करण्याचा निर्णय घेतला. डॉक्टरांनी त्यांना शस्त्रक्रियेचा सल्ला दिला होता. त्यानंतर आता ही शस्त्रक्रिया पूर्ण झाली असून याबाबतची माहिती मुरलीधर मोहोळ यांनी सोशल मीडियावर दिली आहे.

माहिती देताना मुरलीधर मोहळ म्हणाले, २९ वर्षांपूर्वी... कोल्हापूर येथे कुस्ती खेळताना झालेली दुखापत, या दुखापतीमुळेच कुस्ती कायमची सुटली... इतकी वर्षे दुर्लक्ष केलं पण आता २९ वर्षांनंतर हळूहळू तो त्रास वाढू लागला, शेवटी डॅाक्टरांनी ह्या शस्त्रक्रियेशिवाय पर्याय नसल्याचे सांगितलं. त्यामुळे किमान एक महिन्याकरता ही विश्रांती घ्यावी लागत आहे.

खरंतर संसदेचं अधिवेशन सुरू असतानाही शस्त्रक्रिया करावी लागली. अधिवेशन, कामानिमित्त देशभरातील प्रवास, माझ्या पुणे लोकसभा मतदारसंघातील नागरिकांशी संपर्क तसेच इतर कामे… आणि शिवाय यंदाची महाराष्ट्र केसरी कुस्ती स्पर्धा… या सगळ्याचं काय? दुखापतीच्या त्रासापेक्षा या सगळ्याचा त्रास जास्त होतोय., असे त्यांनी म्हटले आहे.

पण मला माहितीये तुमच्या शुभेच्छा आणि आशीर्वादच्या जोरावर मी लवकरच बरा होऊन महिन्याभरातच पुन्हा तुम्हा सर्वांच्या सेवेत हजर होईन, पहिल्यापेक्षा जास्त जोमान, आशा भावना देखील मोहोळ यांनी व्यक्त केली आहेत.