Babanrao Lonikar News : विधानसभा लढवणार नाही म्हणत निवृत्तीचा इशारा अन् लोणीकर झाले तालिका अध्यक्ष!

Budget Session 2025 : विधानसभेच्या परतूर मतदारसंघातून आठ वेळा निवडणूक लढवून पाच वेळा जिंकलेले भाजपाचे विद्यमान आमदार बबनराव लोणीकर यांचा नुकताच वाढदिवस झाला. या शुभदिनीच त्यांनी यापुढची विधानसभा निवडणूक आपण लढवणार नाही, असे जाहीर करत सर्वांना धक्का दिला. भाजपाचे उपाध्यक्ष, जालन्याचे पालकमंत्री आणि राज्याचे पाणीपुरवठा मंत्री राहिलेल्या लोणीकर यांच्या या घोषणेने त्यांच्या समर्थकांचे चेहरे पडले.

पण त्यांच्या निवृत्तीच्या इशाऱ्यानंतर भाजपाच्या राज्यातील प्रमुख नेत्यांनी बबनराव लोणीकर (Babanrao Lonikar) यांचा प्रदीर्घ राजकीय अनुभव लक्षात घेता त्यांच्यावर विधीमंडळाच्या अर्थसंकल्पीय अधिवेशनात मोठी जबाबदारी दिली. विधानसभेच्या तालिका अध्यक्ष पदाचा मान लोणीकर यांना देण्यात आला. आज तालिका अध्यक्ष म्हणून त्यांनी सभागृहात सत्ताधारी आणि विरोधक अशा दोन्ही बाजूच्या सदस्यांना संधी देत समन्वय साधला. लोणीकर यांना तालिका अध्यक्षपदावर पाहून त्यांच्या समर्थकांना निश्चितच आनंद झाला असेल.

वर्षभरात विधिमंडळाची तीन अधिवेशने होतात. विधानसभेचे कामकाज अध्यक्ष व उपाध्यक्ष, तर विधान परिषदेचे कामकाज सभापती व उपसभापती यांच्या अध्यक्षतेखाली चालत असते. (BJP) त्यांना साह्य व्हावे म्हणून दर अधिवेशन कालावधीत दोन्ही सभागृहांसाठी त्या-त्या अधिवेशन कालावधीकरिता सदस्यांमधून तालिका सभापतींची निवड केली जाते. अर्थात ती करताना या सदस्याचा राजकीय अनुभव लक्षात घेतला जातो. कुठल्याही सदस्यासाठी तालिका अध्यक्ष किंवा सभपाती होणे हा बहुमानच समजला जातो.

विधानसभा निवडणूक लढवणार नाही, पण पक्षाने संधी दिली तर एकदा लोकसभा लढवायची आहे, असे लोणीकर म्हणाले होते. आता तालिका अध्यक्ष म्हणून या मानाच्या खुर्चीवर बसल्यानंतर लोणीकरांचे मतपरिवर्तन होते का? की ते आपल्या निर्णयावर ठाम राहतात? याकडे सगळ्यांचे लक्ष असणार आहे. जालना जिल्ह्यातील परतूर विधानसभा मतदार संघातून 2024 मध्ये झालेल्या निवडणुकीत भाजपने आमदार बबनराव लोणीकर यांना सलग आठव्यादा उमेदवारी दिली होती.

1990 पासूनच्या विधानसभा निवडणुकांमध्ये आतापर्यंत तेच भाजपचे उमेदवार राहिले आहेत. पाच वेळा ते निवडून आलेले आहेत. 1999, 2004, 2014, 2019 आणि पुन्हा 2024 मध्ये लोणीकर परतूनमधून निवडून आले. राज्यात प्रचंड बहुमताने महायुतीचे सरकार सत्तेवर येऊन देवेंद्र फडणवीस दुसऱ्यांदा मुख्यमंत्री झाले. शिवाय जालना जिल्ह्यातील सर्व पाचही विधानसभेच्या जागा महायुतीने जिंकल्या. त्यामुळे जालन्याला मंत्रीपद मिळेल आणि ते आपल्याला मिळेल अशी लोणीकरांची अपेक्षा होती. परंतु हा जिल्हा मंत्रीपदापासून वंचित राहिला.

त्यामुळे काहीसे नाराज असलेले बबनराव लोणीकर आगामी काळात कोणतीही विधानसभा निवडणूक लढवणार नाही, असे बोलून गेले. वाढदिवसानिमित आयोजित कार्यक्रमातच त्यांनी हा कठोर निर्णय घेतला. माझे वय आता 60 वर्षे झालेलं आहे, त्यामुळे मी आता रिटायरमेंटच्या दिशेनं आहे. त्यामुळे यापुढे विधानसभा लढायची नाही. पण पक्षाने संधी दिल्यास लोकसभा निवडणूक लढवण्याची इच्छा असल्याचे लोणीकर म्हणाले होते. तालिका अध्यक्ष म्हणून संधी मिळालेल्या लोणीकरांची लोकसभा लढवण्याची बर्थडे विश पूर्ण होणार का? अशी चर्चा या निमित्ताने सुरू झाली आहे.