Beed Election : मैदान मारलं! 'त्या' काट्याच्या लढतीचा थरारक निकाल; नाईकवाडेंनी असा पलटवला डाव!

Local Body Election Result News : बीडमध्ये राष्ट्रवादी काँग्रेसच्या दुफळीच्या निमित्ताचा काहीसा भाग असलेल्या अमर नाईकवाडे यांच्या पराभवासाठी दोन्ही क्षीरसागरांनी जोरदार ताकद लावली आणि समोर उमेदवारही तगडा दिला. अपिलामुळे निवडणुक लांबल्याने सर्व बीडचे लक्ष 'प्रभाग तीन ब'कडेच लागले. पण, अमर नाईकवाडे यांनी अमृत सारडांना धुळ चारली.

कधीकाळी क्षीरसागरांचे कट्टर समर्थक अमर नाईकवाडे यांनी सुरुवातीला काका - पुतण्याच्या लढाईत पुतणे संदीप क्षीरसागरांना साथ दिली. क्षीरसागर आमदार झाल्यानंतर अमर नाईकवाडेंचे त्यांच्याशी बिनसले आणि त्यांनी पुन्हा जयदत्त क्षीरसागर व माजी नगराध्यक्ष डॉ. भारतभूषण क्षीरसागरांचे नेतृत्व स्विकारले. मात्र, पुन्हा डॉ. भारतभूषण क्षीरसागर राजकीय वर्तुळापासून दुर गेले आणि जयदत्त क्षीरसागर पक्षहिन झाले.

त्यानंतर नेतृत्व डॉ. योगेश क्षीरसागर यांच्याकडे आले. मात्र, ही बाब नाईकवाडेंना रुचली नाही. त्यामुळे नाईकवाडे दोन्ही क्षीरसागरांच्या तोफेच्या तोंडावर आले. मात्र, पक्ष म्हणून नाईकवाडेंनी विधानसभेला डॉ. क्षीरसागरांचा प्रचार केला. दरम्यान, आता नगर पालिका तिकीट वाटपात राष्ट्रवादीतून ज्या नेत्यांच्या उमेदवारीला डॉ. क्षीरसागरांचा विरोध होता त्यामध्ये नाईकवाडेंचे नाव पहिल्या क्रमांकावर होते.

अखेर व्हायची ती फाटाफुट झाली आणि नाईकवाडे राष्ट्रवादीकडून उमेदवार म्हणून आले. त्यांच्या विरोधात 'सर्वार्थाने तगडा'उमेदवार म्हणून माजी उपनगराध्यक्ष अमृत सारडा उतरले. सारडांच्या उमेदवारीवर नाईकवाडेंनी आक्षेप घेतला पण तो टिकला नाही. त्यामुळे क्षीरसागर व सारडांच्या सोशल मिडीयाने केवळ नाईकवाडेंना ट्रोलच केले नाही तर जणू आक्षेपातला विजय हा नगर पालिकेचाच विजय असल्याची हवा केली.

दरम्यान, आक्षेपामुळे निवडणुक लांबली आणि यासाठी शनिवारी मतदान झाले. दोन्ही उमेदवारांना अधिकचा वेळ मिळाला. मात्र, तगडी यंत्रणा आणि सामाजिक समिकरणे पाहता सारडांच्या यंत्रणेमुळेच मतांचा टक्का वाढल्याची चर्चा झाली. नाईकवाडेंच्या पराभवासाठी 'दोन्ही क्षीरसागरांनी हातात हात' घातल्याचे झाकून नाही. मात्र, या निवडणुकीत नाईकवाडे विजयीच झाले नाहीत तर त्यांनी सारडांचा तब्बल दिड हजार मतांनी पराभव केला.