Parbhani BJP conflict : भाजपमधील गटबाजी चव्हाट्यावर, नगरसेवकांनी महानगराध्यक्षाविरोधात दंड थोपटले; तर भरोसेंकडून बेशिस्तीचा ठपका!

Parbhani Municipal Corporation News : परभणी भाजपमधील गटबाजी पुन्हा उफाळून आली आहे. भाजपचे महानगराध्यक्ष शिवाजी भरोसेविरूद्ध महापालिकेतील पक्षाचे नगरसेवक यांच्यात सध्या चांगलीच जुंपली आहे. स्वीकृत सदस्य पदासाठी गटनेत्याकडून भरोसे यांच्या नावाची शिफारस येताच भाजपच्या बारा पैकी अकरा नगरसेवकांनी त्यांचा नावाला विरोध दर्शवत गटनेताच बदलण्याची मागणी केली.

तर पक्षशिस्तीचा आरोप करत या नगरसेवक व काही पदाधिकाऱ्यांवर तातडीने कारवाई करावी, अशी मागणी करणारे पत्रच भरोसे यांनी प्रदेशाध्यक्ष रवींद्र चव्हाण यांच्याकडे पाठवले. या वादातून स्वीकृत नगरसेवक पदाची निवड रखडली असून महानगर प्रमुख विरुद्ध नगरसेवक, पदाधिकारी अशी उभी फूट परभणीमध्ये पडल्याचे चित्र आहे.

पक्षाचे काही नगरसवेक आणि पदाधिकारी हे सातत्याने पक्षाच्या बैठका, पत्रकार परिषद, प्रशिक्षण कार्यशाळांना दांडी मारत आहेत. यामुळे पक्षशिस्त धोक्यात येत असून या सर्वांवर शिस्तभंगाची कारवाई व त्यांना निलंबित करावे, अशी मागणी शिवाजी भरोसे यांनी प्रदेशाध्यक्षांना पाठवलेल्या पत्रात केली आहे. भाजपच्या स्थापना दिनाच्या कार्यक्रमात नऊ नगरसेवक गैरहजर होते, असे सांगत या नगरसेवकांची यादीच पत्रात देण्यात आली आहे.

यात प्रामुख्याने डाॅ. केदार खटिंग, रितेश झांबड, मीना वरपूडकर, गिरीजा शंकर आजेगावकर, गणेश टाक, विश्वजीत बुधवंत या नगरसेवकांच्या सातत्याने गैरहजर राहण्याने पक्षाच्या कामात अडथळा निर्माण होत असल्याचा आरोप भरोसे यांनी आपल्या पत्रात केला आहे. भाजप उद्योग आघाडीचे प्रदेशाध्यक्ष प्रमोद वाकोडकर यांच्याकडून सातत्याने पक्षविरोधी कारावायांमध्ये सक्रीय सहभाग असतो, असा आरोपही करण्यात आला आहे.

स्वीकृत सदस्य निवड रखडली..

महानगराध्यक्ष शिवाजी भरोसे व महापालिकेतील भाजप नगरसेवकांमधील संबंध कमालीचे ताणले गेले आहेत. याचा परिणाम स्वीकृत सदस्य पदाची निवड आणि स्थायी समिती सदस्यांच्या नावाची घोषणा रखडली आहे. भाजपच्या महापालिकेतील गटनेत्या तिरुमला खिल्लारे यांनी स्वीकृत सदस्य पदासाठी शिवाजी भरोसे यांच्या नावाची शिफारस महापौर इकबाल सय्यद यांच्याकडे केली होती. त्याला भाजपच्या अकरा नगरसेवकांनी कडाडून विरोध केला. त्यामुळे ही निवडही रखडली आहे.