Prakash Mahajan : भुजबळांना मुंडे कुटुंबाचा वारस डिक्लेअर करण्याचा अधिकार कुणी दिला? मामा प्रकाश महाजन पंकजा मुंडेंसाठी मैदानात!

Marathwada Political News : बीडमध्ये झालेल्या ओबीसींच्या महाएल्गार मेळाव्यात मंत्री छगन भुजबळ यांनी गोपीनाथ मुंडे यांचे राजकीय धनंजय मुंडेच आहेत, असे विधान करून राज्यात नव्या वादाला तोंड फोडले. छगन भुजबळ यांनी मुंडे बहीण भावांमध्ये हे विधान करून संघर्षाची ठिणगी टाकल्याचा आरोप आता त्यांच्यावर केला जातोय. या वादामध्ये करुणा मुंडे यांनी उडी घेत गोपीनाथ मुंडे यांचे खरे वारस धनंजय मुंडे हेच आहेत, असे म्हणत भुजबळांच्या सुरात सूर मिसळला आणि हा वाद अधिकच चिघळला.

आता या संपूर्ण वादात पंकजा मुंडे यांचे मामा प्रकाश महाजन हे भाचीच्या समर्थनात मैदानात उतरले आहेत. करुणा मुंडे कोण? त्या जर स्वतःला धनंजय मुंडे यांच्या पत्नी म्हणत असतील तर आपल्या पतीची अब्रू चव्हाट्यावर आणणे त्यांनी बंद करावे, एवढे केले तरी पुरेसे आहे. गोपीनाथ मुंडे यांचा वारस ठरवण्यासाठी त्यांच्या कुटुंबातील इतर वरिष्ठ सदस्य आहेत. त्यात करुणा मुंडे यांनी बोलण्याची गरज नाही, अशा शब्दात सुनावले.

केवळ मुंडे नाव आहे म्हणून काहीही बोलायचे असे चालणार नाही. हे नाव त्यांच्या मागे नसते तर राजकीय वारसा वरून केलेल्या विधानानंतर त्यांच्या घरावर दगडं पडली असती, असा इशारा देत प्रकाश महाजन यांनी पंकजा मुंडे याच गोपीनाथ मुंडे यांच्या सामाजिक आणि राजकीय वारस असल्याचे ठणकावून सांगितले. गोपीनाथ मुंडे यांच्या मालमत्तेच्या वारसही पंकजा मुंडे आणि माझी बहीण याच आहेत. याशिवाय दुसरा कुठला वारस असतो का? असा सवालही प्रकाश महाजन यांनी केला.

प्रकाश महाजन यांनी मंत्री छगन भुजबळ यांनी गोपीनाथ मुंडे यांच्या वारसाचा विषय काढत बऱ्याच वर्षांनी एकत्र आलेल्या मुंडे बहिण भावामध्ये मिठाचा खडा टाकण्याचा प्रयत्न केला असल्याचा आरोप केला. मुंडे घराण्याचा वारस डिक्लेअर करण्याचा अधिकार छगन भुजबळ यांना कोणी दिला? भुजबळांनी दुसऱ्यांच्या घरात वारस ठरवण्याआधी स्वतःचा वारस मुलगा की पुतण्या? हे ठरवावे असा टोलाही महाजन यांनी लगावला.

पंकजा मुंडे यांना जनतेने आणि समाजानेच संघर्षानंतर वारसदार म्हणून स्वीकारले आहे. बीडमधील ओबीसींच्या मेळाव्याला पंकजा मुंडे उपस्थित नव्हत्या, कदाचित या रागातूनच भुजबळ यांनी असे केले असावे, अशी शंका महाजन यांनी उपस्थित केली. दरम्यान राजकीय वारस विषयावर प्रकाश महाजन यांनी सोशल मीडियावर एक पोस्ट करत आपल्या भावना व्यक्त केल्या आहेत.

'क्या जमाना आ गया' स्वर्गीय मुंडे साहेबांचा वारस कोण ठरवत आहेत. एक भ्रष्टाचारी कारागृहात बरेच महिने काढून आलेला आणि दुसरी जी रोज उठून आपल्याच कुंकवाची अब्रू जगाच्या वेशीवर टांगते. स्वर्गीय मुंडे साहेब यांचा वारसा मग तो सामाजिक असो किंवा राजकीय असो फक्त आणि फक्त माझी पंकूताई आहेत, दुसरे कोणी नाही, अशा शब्दात प्रकाश महाजन यांनी या वादावर भाष्य करत छगन भुजबळ आणि करुणा मुंडे यांना फटकारले.

छगन भुजबळ यांचा वारसदार समीर भुजबळ आहे असं म्हटलं तर चालेल का? असा सवाल करतानाच गोपीनाथ मुंडेंना जवळचे मित्र मानत असलेले छगन भुजबळ हे आता तलाठ्याच्या भूमिकेत काम करत आहेत का? गोपीनाथरावांनी वडिलोपार्जित जमीन पुतण्याला दिली पण भुजबळांना मुंडे कुटुंबाचा वारस डिक्लेअर करण्याचा अधिकार कोणी दिला? असे प्रकाश महाजन म्हणाले. भुजबळ आणि करुणा मुंडे यांच्या म्हणण्याने वारस बदलत नाही, असेही महाजन म्हणाले.

FAQs

1. प्रश्न: प्रकाश महाजनांनी छगन भुजबळांवर नेमका आरोप काय केला?
उत्तर: प्रकाश महाजन यांनी भुजबळांना विचारले की, “मुंडेंचा वारस ठरवण्याचा अधिकार तुम्हाला कोणी दिला?” असा सवाल उपस्थित केला.

2. प्रश्न: छगन भुजबळांनी काय विधान केलं होतं?
उत्तर: भुजबळ यांनी गोपीनाथ मुंडेंचा वारस म्हणून धनंजय मुंडे यांचा उल्लेख केला होता, ज्यावरून हा वाद निर्माण झाला.

3. प्रश्न: हा वाद कोणत्या पक्षांमध्ये रंगला आहे?
उत्तर: हा वाद भाजप आणि राष्ट्रवादी काँग्रेस यांच्या नेत्यांमध्ये रंगला आहे.

4. प्रश्न: मुंडे घराण्याशी या वादाचा काय संबंध आहे?
उत्तर: मुंडे घराण्यातील वारस ठरवण्यावरून अनेक वर्षांपासून राजकीय मतभेद सुरू आहेत.

5. प्रश्न: या प्रकरणावर पुढे काय घडू शकतं?
उत्तर: राजकीय वातावरण आणखी तापण्याची शक्यता आहे आणि विरोधक या मुद्द्याला प्रचारातही वापरू शकतात.