Delhi Protest News: दिल्लीतील जंतरमंतरवर मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी सुरू असलेल्या आंदोलनाच्या पार्श्वभूमीवर महाराष्ट्र नवनिर्माण सेनेचे अध्यक्ष राज ठाकरे यांनी पंतप्रधान नरेंद्र मोदी आणि केंद्रीय गृहमंत्री अमित शाह यांच्यावर जोरदार टीका केली आहे. मोदी-शहा यांच्या मनात आणि डोक्यात पराकोटीची हुकूमशाही भरली असून, या बेबंदशाहीला देशातून खालपासून वरपर्यंत उखडून टाकले पाहिजे, अशा शब्दांत राज ठाकरे यांनी संताप व्यक्त केला.
दिल्लीतील आंदोलन रोखण्यासाठी दिल्ली पोलिसांकडून आंदोलकांना ताब्यात घेतले जात आहे. या पार्श्वभूमीवर राज ठाकरे यांनी सोशल मीडियावर पोस्ट करत केंद्र सरकारच्या भूमिकेवर प्रश्न उपस्थित केले. आंदोलन करणे हा नागरिकांचा घटनात्मक अधिकार असून, सरकारला प्रश्न विचारण्याचा आणि सत्तेविरोधात आवाज उठवण्याचा अधिकार हिरावून घेणारे तुम्ही कोण, असा सवाल त्यांनी केला.
या पोस्टमध्ये राज ठाकरे यांनी "No nation can be grateful at the cost of its liberty" हे उद्गार आहेत, भारतरत्न डॉ. बाबासाहेब आंबेडकर यांचे. नोव्हेंबर 1949 ला भारतीय राज्यघटनेचा मसुदा सादर करताना त्यांनी हे अतिशय महत्वाचे उद्गार काढले होते. एखाद्या नेत्याच्या आंधळ्या भक्तीसाठी किंवा त्याच्या तऱ्हेवाईक वागण्याला खतपाणी घालण्यासाठी या देशाची स्वातंत्र्य, अभिव्यक्ती ही मूल्य अजिबात पणाला लागता कामा नयेत.
हे वाक्य आज पुन्हा म्हणावं लागतंय, कारण मोदी आणि शाह या जोडीच्या मनात आणि डोक्यात अत्यंत पराकोटीची हुकूमशाही बसली आहे . या हुकूमशाहीच्या जोरावर या जोडीने देशातील सगळ्या यंत्रणांना काबीज करून जी सत्ता मिळवली. जी सत्ता फक्त मूठभर उद्योगपतींच्या हितासाठी राबवली जात आहे. सत्तेच्या या मस्तीला विरोध केला, त्याच्या विरोधात निदर्शनं केली म्हणून, जर आंदोलकांना चिरडलं जाणार असेल आणि त्यांना अटक केली जाणार असेल तर, त्यांच्या या बेबंदशाहीला या देशातून खालपासून वरपर्यंत उखडूनच काढलं पाहिजे.
या देशांत आंदोलनं करायचीच नाहीत? तुम्हाला प्रश्न विचारायचेच नाहीत ? आंदोलन करणं हा अधिकार हिरावून घेणारे तुम्ही कोण ? भ्रष्ट मुख्य निवडणूक आयुक्त ज्ञानेश कुमार यांच्या राजीनाम्याची मागणी घेऊन ३ ऑक्टोबरपासून दिल्लीत आंदोलनं सुरु आहेत. दिल्ली पोलिसांना हाताशी धरून हे सरकार फक्त आंदोलकांना चिरडत होतं असं नाही तर हे आंदोलन कव्हर करणाऱ्या महिला पत्रकारांचा पण छळ करत होतं.
आज दिल्लीत आंदोलनं होतील या भीतीने दिल्लीत मेट्रो सेवा बंद केलीत, रस्ते अडवलेत, इंटरनेट सेवा बंद केली आहे, बस सेवा थांबवली आहे, आंदोलकांना विमानातून उचलून नेलं जात आहे. ही कोणती पद्धत ? देशातील २०,३० वर्षांचे तरुण तरुणी अस्वस्थ आहेत, त्यांना त्यांचं भविष्य दिसत नाहीये, म्हणून ती शांततेत रस्त्यावर उतरून आंदोलन करत आहेत आणि तुम्ही त्यांनाच चिरडायचा प्रयत्न करताय? जगभर मोदी जाऊन आमच्या देशात लोकशाही आहे हे आता कोणत्या तोंडाने सांगणार आहेत? ही असली लोकशाही? अशा शब्दात टीका केली.
मला समजत नाही ज्ञानेश कुमारबद्दल इतकं प्रेम का ? ज्ञानेश कुमार आणि त्या आधीचे निवडणूक अधिकारी हे तुमचे सत्ता काबीज करण्याचे मार्ग आहेत म्हणून ? निवडणूक आयोग एक स्वायत्त संस्था आहे, त्याच्या प्रमुखाने काही गोंधळ घातला असेल तर त्याचा राजीनामा व्हायलाच हवा. तसंच संपूर्ण निवडणूक यंत्रणा ही प्रामाणिक आणि पारदर्शक असायला हवी या मागणीत गैर ते काय ?
माझ्या मताचा अधिकार काढून घेतला जातोय, किंवा माझं मत कुठे आणि कोणाला जातंय हे मला समजत नाहीये. आणि त्यातून माझ्या मताचा अपमान होतोय हा राग व्यक्त करण्याचा अधिकार पण नसावा ? का वरच्या दोघांना भीती आहे की ज्ञानेश कुमारला राजीनामा द्यायला लागला आणि त्याने माझे मतचोरीचे करवते धनी कोण हे जर सांगितलं तर आत्तापर्यंतचं सत्तेचं सगळंच बिंग फुटेल म्हणून, असा टोला राज ठाकरे यांनी मोदी-शहा यांना लगावला आहे.
दिल्लीतील आंदोलनादरम्यान मेट्रो, बस आणि इंटरनेट सेवांवर निर्बंध घालण्यात आल्याचा तसेच आंदोलकांना आंदोलनस्थळी पोहोचण्यापासून रोखण्यात येत असल्याचा दावा राज ठाकरे यांनी केला. तरुण-तरुणी आपल्या भविष्याबाबत अस्वस्थ असल्याने शांततेच्या मार्गाने आंदोलन करत असताना त्यांच्यावर कारवाई का केली जात आहे, असा सवाल त्यांनी उपस्थित केला.
आंदोलनाचे वार्तांकन करणाऱ्या महिला पत्रकारांनीही पोलिसांकडून त्रास दिला जात असल्याच्या तक्रारी केल्याचा उल्लेख त्यांनी केला. आंदोलकांना ताब्यात घेताना त्यांच्या घटनात्मक अधिकारांचे उल्लंघन होणार नाही, याची काळजी घेणे आवश्यक असल्याचे राज ठाकरे यांनी म्हटले.
भारतीय राज्यघटनेतील कलम १९(१)(अ) आणि १९(१)(ब) यांचा उल्लेख करत त्यांनी अभिव्यक्तिस्वातंत्र्य आणि शांततेत एकत्र येऊन आंदोलन करण्याच्या अधिकारावर भर दिला. आंदोलकांना रोखण्यासाठी एवढ्या कठोर उपाययोजना करण्याची गरज काय, असा सवालही त्यांनी केला.
राज ठाकरे यांनी आपल्या पोस्टमध्ये मोदी-शहा यांच्या सत्ताकारणावर टीका करताना इतिहासाचाही संदर्भ दिला. मुघल, पोर्तुगीज आणि ब्रिटिश सत्तेविरोधात भारतीय जनतेने संघर्ष केला, याची आठवण करून देत सत्तेचा माज करणाऱ्यांना जनता योग्य वेळी उत्तर देऊ शकते, असे त्यांनी म्हटले.
नेटफ्लिक्सवरील 'How to Become a Tyrant' या माहितीपटाचा उल्लेख करत त्यांनी अमित शाह यांच्यावर उपरोधिक टीका केली. त्याऐवजी महात्मा गांधी यांच्या शांततापूर्ण आंदोलनांचा आणि स्वातंत्र्यलढ्याचा अभ्यास करण्याचा सल्लाही त्यांनी दिला.
"तुमच्याकडे सत्तेचा अमरपट्टा नाही," असे म्हणत सत्ताधाऱ्यांनी आपण कायम सत्तेत राहणार असल्याचा समज करून घेऊ नये, असा इशारा राज ठाकरे यांनी दिला. सरकारकडून परिपक्वतेची अपेक्षा असते आणि ती नसेल, तर ती आत्मसात केली पाहिजे, असेही त्यांनी पोस्टमध्ये म्हटले.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.