Sanjay Shirsat News : पालकमंत्री कुठे आहेत? टीका होताच संजय शिरसाट गॅस, पेट्रोल टंचाईवर बोलले!

Shivsena News : छत्रपती संभाजीनगर शहरात गॅस, पेट्रोलसाठी रांगा लागल्याचे चित्र गेल्या काही दिवसापासून दिसत आहे. सर्वसामान्यांचे हाल होत असताना पालकमंत्री संजय शिरसाट कुठे आहेत? अस प्रश्न विचारला जात होता. विरोधकांनी टीकाही सुरू केली, अखेर रविवारी शिरसाट यांनी या सगळ्या विषयावर सविस्तर भूमिका मांडली. गॅस सिलेंडरचा काळाबाजार करणाऱ्यांवर कठोर कारवाईचे निर्देश देतानाच ऑटो एलपीजी गॅसचा तुटवडा हा कंपन्याच्या अरेरावीचा परिणाम असल्याचे सांगत एनओसी नसलेल्या पंपांना सील ठोकण्याचे आदेश देत पालकमंत्र्यांनी आक्रमक पावित्रा घेतला आहे.

शहरामध्ये जो एलपीजी गॅसचा तुटवडा जाणवत आहे, तो कंपन्यांच्या अरेरावीचा परिणाम आहे. मी पुरवठा अधिकाऱ्यांना आत्ताच सूचना दिल्या आहेत. प्रशासकीय नियंत्रण नसल्याने गॅसची खरेदी केली जात नाहीये. 'गॅस उपलब्ध आहे, मात्र आम्ही तो खरेदी करणार नाही' ही कंपन्यांची उर्मट भाषा असल्याने रिक्षाचालकांना नाहक त्रास होत आहे. याप्रकरणी मी तातडीने निर्देश दिले आहेत. ज्या ऑटो एलपीजी गॅस पंपांकडे एनओसी नाही, त्यांचे पंप तातडीने सील करा. या कारवाईनंतरच हे चालक ताळ्यावर येतील. हातावर पोट असलेल्या रिक्षा चालकांचे घर कसे चालणार? गेल्या पाच दिवसांपासून गॅस मिळत नसल्याने हे कडक निर्देश दिले आहेत. प्रशासन यावर ठोस कारवाई करेल, अशी मला अपेक्षा आहे.

माझ्या शहरातही गॅसच्या रांगेत उभे असताना एका रिक्षाचालकाचा मृत्यू झाला आहे. रिक्षाचालक आधीच अडचणीत आहेत, त्यांनी स्वतःचे पोट कसे भरायचे? ऑटो एलपीजी गॅस पुरवठादारांवर कडक कारवाई होणे गरजेचे असल्याचे शिरसाट यांनी माध्यमांशी बोलताना सांगितले.

भुमरेंच्या चालकावर गुन्हा, शिरसाटांची सावध भूमिका

शिवसेनेचे (Shivsena) खासदार संदीपान भुमरे यांच्या चालकाविरुद्ध फसवणुक केल्याप्रकरणी जवाहरनगर पोलीस ठाण्यात गुन्हा दाखल झाला आहे. या संदर्भात शिरसाट यांना प्रश्न केला असता या प्रकरणाची मला अद्याप कल्पना नाही, मी याबद्दल सविस्तर माहिती घेईल, असे सांगत अधिकचे बोलणे टाळले.

राष्ट्रवादी काँग्रेसच्या विलीनीकरणाचा विषय सध्या लांबणीवर पडला आहे. अजित पवार यांच्या पक्षातील काही लोक विलीनीकरणाच्या विरोधात आहेत, तर काही बाजूने. यावर अंतिम तोडगा कसा निघेल हे आताच सांगता येणार नाही, मात्र हा विषय तूर्तास लांबणीवर पडणार असल्याचे शिरसाट यांनी सांगितले.

भोंदू खरात प्रकरणावरून खासदार संजय राऊत (Sanjay Raut) यांनी केलेल्या टीकेवर शिरसाट यांनी खरात प्रकरणामध्ये सर्व यंत्रणा काम करत आहे. सीडीआर आणि व्हिडिओसमोर आले आहेत. या प्रकरणाचे गांभीर्य लक्षात घेतले पाहिजे, कारण अनेक महिलांवर अत्याचार झाले आहेत. हा अत्यंत गंभीर गुन्हा आहे. यात कोणताही अधिकारी, नेता किंवा व्यापारी अडकला असेल, तर त्याच्यावर कठोर कारवाई झालीच पाहिजे.

मुख्यमंत्री एकनाथ शिंदे यांचे नाव घेऊन तुम्ही त्यांना बदनाम करण्याचा प्रयत्न केला, तर आम्ही त्या गोष्टीला सामोरे जायला तयार आहोत. केवळ फोटो आला म्हणून आक्षेप घेणे चुकीचे आहे. या प्रकरणात जो कोणी गुन्हेगार असेल, त्याला जेलमध्ये टाकलेच पाहिजे, अशी आमची स्पष्ट भूमिका असल्याचे शिरसाट म्हणाले.