Sanjay Shirsat : सत्तारांचे कौतुक करणाऱ्या प्रतापसिंह पाटलांना मंत्री शिरसाटांचा सल्ला; म्हणाले, आमच्यात मतभेद...

Shivsena Politics News : "मराठवाडा पदवीधर मतदारसंघात तुम्ही मोठा विजय मिळवला आहे. आमदार झाला आहात, ती आमदारकी उपभोगा आणि जनतेची कामे करा. उगाच आमच्यात मतभेद निर्माण करण्याचे प्रयत्न करू नका", असा सल्ला शिवसेनेचे मंत्री संजय शिरसाट यांनी नवनिर्वाचित आमदार प्रतापसिंह पाटील यांना दिला. दोन दिवसापुर्वी प्रतापसिंह पाटील यांनी आमदार अब्दुल सत्तार यांचे तोंडभरून कौतुक केले होते. आपल्या विजयाचे श्रेय देताना तेच खरे कॅप्टन होते, पहिल्या चेंडूवर त्यांनी ही मॅच आम्हाला जिंकून दिली, अशा शब्दात सत्तारांचे गुणगान केले होते.

शिवसेनेत असलेल्या मतभेदामुळे अब्दुल सत्तार यांनी महायुतीच्या उमेदवाराला पाठिंबा देण्याऐवजी महाविकास आघाडीचे डाॅ. प्रतापसिंह पाटील यांना उघड पाठिंबा जाहीर करत त्यांच्यासाठी प्रचारही केला. पक्षाच्या विरोधात ही भूमिका घेताना सत्तार यांनी संजय शिरसाट यांच्यावरही टीका केली होती. "आमच्या पालकमंत्र्यांनी सुरवातीला महायुतीच्या सतीश चव्हाण यांना शिवसेनेचा पाठिंबा नाही, असे जाहीर केले होते. त्यांच्याच आदेशाचे पालन आम्ही केले. नंतर त्यांनी भूमिका का बदलली? मला पक्षाकडून कुठलाही निरोप मिळाला नव्हता".

"आम्ही वारंवार भूमिका बदलली, तर आम्हाला लोक जोड्याने मारतील", अशा शब्दात सत्तार यांनी शिरसाट यांच्यावर निशाणा साधला होता.दरम्यान, प्रतापसिंह पाटील यांनी मराठवाडा पदवीधर मतदारसंघात ऐतिहासिक विजय मिळवल्यानंतर त्यांना मदत करणाऱ्या राजकीय नेते, पदाधिकाऱ्यांच्या भेटीगाठी सुरू केल्या आहेत. दोन दिवसापूर्वी सिल्लोड मतदासंघात पाटील यांनी अब्दुल सत्तार यांची भेट घेत त्यांचा सत्कार स्वीकारला. यावेळी केलेल्या भाषणात त्यांनी आपल्या विजयाचे श्रेय अब्दुल सत्तार यांना दिले.

यावर संजय शिरसाट यांना माध्यमांनी विचारले असता, "निवडणुकीत मदत करणाऱ्यांचे आभार नुकतेच आमदार झालेले प्रतापसिंह पाटील मानत आहेत, विजयाचे श्रेय ते जर कोणाला देत असतील, तर तो त्यांच्या मनाचा मोठेपणा आहे. परंतु आता ते आमदार झाले आहेत, त्यांनी ती आमदारकी भोगावी, लोकांची कामे करावीत. आमच्यात मतभेद निर्माण करण्याचा प्रयत्न करू नये", असा सल्ला शिरसाट यांनी प्रतापसिंह पाटील यांना दिला.