Sanjay Shirsat : सरकारी मदतीला विरोध करणाऱ्या विरोधकांनी शेतकऱ्यांबद्दल सहानुभूती म्हणून फराळ तरी वाटलायं का? संजय शिरसाट संतापले?

Maharashtra Politics news : राज्यातील दुष्काळाच्या पार्श्वभूमीवर महायुती सरकारने शेतकऱ्यांना पाच हजाराची तातडीची मदत देत त्यांची दिवाळी गोड करण्याचा प्रयत्न केला. परंतु विरोधकांनी या मदतीवरून टीका सुरू केली आहे. पाच हजारात दिवाळी साजरी होते का? सरकारने शेतकऱ्यांची थट्टा चालवली आहे, अशा भाषेत विरोधक तोंडसुख घेताना दिसत आहेत. यावर संतप्त झालेल्या शिवसेनेचे मंत्री संजय शिरसाट यांनी विरोधकांना टोला लगावला आहे.

"राज्य सरकारने शेतकऱ्यांची दिवाळी गोड व्हावी, त्यांना दुष्काळात दिलासा मिळावा, त्यांच्या घरातही दिवाळीचा प्रकाश व्हावा, या उद्देशाने पाच हजारांची तातडीची मदत जाहीर केली आणि ती थेट खात्यात दिली. विरोधकांना ही मदत कमी वाटत असेल, परंतु गावात, खेड्यात राहणाऱ्या शेतकऱ्यासाठी त्यांच्या कुटुंबाला यातून निश्चितच काही ना काही आधार मिळाला आहे. टीका करणाऱ्या विरोधकांना जर ही मदत कमी वाटत असेल तर त्यांनी आपल्याकडून आणखी पाच हजारांची मदत करावी". असा सणसणीत टोला विरोधकांना लगावला.

"सरकारने केलेल्या मदतीला नाव ठेवायचे, स्वतः मात्र शेतकऱ्यांबद्दल सहानुभूती म्हणून साधा फराळ तरी वाटलायं का? असा सवाल करत टीका करणे एवढेच विरोधकांना काम आहे, अशी टीका त्यांनी केली. "लाडकी बहीण योजना सुरू झाली आणि त्या माध्यमातून दीड हजारांची मदत दिली तेव्हाही हे विरोधक टीकाच करत होते. त्यामुळे त्याकडे फारसे गांभीर्याने पाहण्याची गरज नाही. स्वतः काही करायचे नाही, सरकारने शासकीय मदत म्हणून पाच हजार रुपये दिले आहेत. दुष्काळामुळे झालेल्या नुकसानाची भरपाई ही नंतर जो निर्णय होईल, त्या प्रमाणे केली जाणार आहे", असेही संजय शिरसाट यांनी स्पष्ट केले.

"दुष्काळाच्या पार्श्वभूमीवर संकटात सापडलेल्या शेतकऱ्याला दिलासा मिळावा, दिवाळीमध्ये आपण एकटे आहोत, अशी भावना त्याच्या मनात निर्माण होऊ नये, या उद्देशाने मुख्यमंत्री देवेंद्र फडणवीस यांनी महायुतीच्या मंत्र्यांना शेतकऱ्यांसोबत दिवाळी साजरी करण्याचे आवाहन केले होते. त्यानूसार सर्वच मंत्री हे शेतकऱ्यांसोबत दिवाळी साजरी करताना दिसत आहेत. गावात, पालावर, शेताच्या बांधावर मंत्री जात आहेत. याच दरम्यान संजय शिरसाट यांनी माध्यमांनी विचारलेल्या प्रश्नाला उत्तर देताना विरोधकांना सुनावले.

शेतकऱ्यांबद्दल प्रेम दाखवणाऱ्या विरोधकांनी साधा फराळं तरी वाटला का? असा थेट सवाल त्यांनी केला. शिवसेनेच्या वतीने राज्यभरात गोरगरिब, सर्वसामान्यांना धान्य, फराळ, किराणा सामानाचे किट वाटप केले जात आहेत. राज्याचे उपमुख्यमंत्री एकनाथ शिंदे हे संवदेनशील नेते आहेत. शेतकरी,कामगार, मजूर यांच्याबद्दल आणि सर्वसामान्य जनतेची त्यांना काळजी आहे. दुष्काळाच्या संकटात सापडलेल्या बळीराजाच्या घरातही दिवाळी झाली पाहिजे, या हेतूने शिवसेनेने फराळ, कीट वाटण्याचा उपक्रम हाती घेतला आहे. विरोधक असं काही करताना दिसतात का? असा सवालही संजय शिरसाट यांनी केला.