Santosh Deshmukh Murder Case : संतोष देशमुख हत्या प्रकरणातील अटकेत असलेल्या 'या' आरोपीला सोडण्याचे कोर्टाचे आदेश

Beed News : बीड जिल्ह्यातील मस्साजोगचे सरपंच संतोष देशमुख यांच्या हत्या प्रकरणाला आता जवळपास 80 दिवस पूर्ण झाले आहे. याप्रकरणी राज्य सरकारकडून सरकारी वकील म्हणून उज्ज्वल निकम यांची नियुक्ती करण्यात आली आहे. तसेच सीआयडीने संतोष देशमुखांच्या हत्येचा तपास करताना 1400 पानांचे दोषारोपपत्रही दाखल केले आहे. यात देशमुखांच्या हत्येचा मास्टरमाईंड वाल्मिक कराडच (Walmik Karad) असल्याचा आरोप करण्यात आला आहे. यातच आता या घटनेतील मोठी अपडेट समोर येत आहे.

सीआयडीने (CID) कोर्टात दाखल केलेल्या दोषारोप पत्रामधून अनेक खळबळजनक खुलासे करण्यात आले आहेत. त्यात वाल्मिक कराड हाच मुख्य मास्टरमाईंड असल्याचा दावा करण्यात आला आहे. संतोष देशमुख यांना मारहाण करतानाचे व्हिडिओही सीआयडीच्या हाती सापडल्याची धक्कादायक माहिती यात समोर आली आहे.

महत्त्वाची बाब म्हणजे या हत्येच्या कटामध्ये आरोपी क्रमांक एक वाल्मिक कराड, आरोपी दोन विष्णू चाटे, सुदर्शन घुले, प्रतीक घुले, सुधीर सांगळे, महेश केदार, जयराम चाटे, आठव्या क्रमाकांवर फरार कृष्णा आंधळेचा समावेश करण्यात आला आहे.परंतु, नववा आरोपी असलेल्या सिद्धार्थ सोनवणे याचे नाव या दोषारोपपत्रामधून वगळण्यात आले आहेत. याचमुळे केज कोर्टानं सोनवणेला सोडण्याचे आदेश दिले आहेत.

सरपंच संतोष देशमुख यांच्या हत्येत वाल्मिक कराड हाच मुख्य सूत्रधार असून खंडणीच्या वादातूनच ही हत्या करण्यात आल्याचा दावा पोलिसांनी दाखल केलेल्या चार्जशीटमध्ये करण्यात आला आहे. खंडणी, अॅट्रॉसिटी आणि संतोष देशमुखांची हत्या ही तिन्ही प्रकरणे एकत्र करुन ही चार्जशीट दाखल करण्यात आली असून या घटना देशमुखांच्या हत्येच्या कटाचाच भाग असल्याचे यामध्ये म्हटले आहे.पाच गोपनीय साक्षीदारांच्या जबाबानंतर कराडविरुद्धचे सबळ पुरावे सापडल्याचे या चार्जशीटमध्ये म्हटले आहे.

बीड जिल्ह्यातील मस्साजोगचे सरपंच संतोष देशमुख यांचे अपहरण करण्यासाठी त्यांचे लोकेशन देणारा गावातीलच सिद्धार्थ सोनवणे याचा संशय पोलिसांना होता. त्याचमुळे स्थानिक गुन्हे शाखा पोलिसांनी त्याला कल्याण (मुंबई) येथून एका उसाच्या गाडीवर काम करत असताना अटक केली होती.

पण सरपंच संतोष देशमुख यांची हत्या झाल्यानंतर सिद्धार्थ सोनवणे हा काही दिवस गावातच होता. देशमुखांच्या अंत्यविधीला देखील तो उपस्थित होता. अपहरण करण्यापूर्वी कोणीतरी जवळच्याच व्यक्तीनेच देशमुखांचे लोकेशन आरोपींंना दिले असावे असा संशय पोलिसांना होता. लोकेशन देणाऱ्यांचा पोलीस शोध घेत असल्याची कुणकूण सोनवणेला लागली होती. घटनेच्या दोन दिवसानंतर तो गावातून फरार झाला होता.