Sharad Pawar On Beed : संतोष देशमुख हत्येनंतर धगधगत्या बीडबाबत शरद पवारांचा मोठा निर्णय,संदीप क्षीरसागरांना धक्का

Beed News : बीड जिल्ह्यातील मस्साजोगचे सरपंच संतोष देशमुख यांच्या निर्घृण हत्येमुळे राजकीय वातावरण तापलं आहे. या प्रकरणात रोज नवनवीन धक्कादायक खुलासे समोर येत आहेत.या तापलेल्या वातावरणात बीडमधून मोठी बातमी समोर आली आहे. देशमुख हत्येप्रकरणात गंभीर आरोप होत असल्यामुळे अडचणीत आलेले धनंजय मुंडे यांच्याऐवजी बीडच्या पालकमंत्रीपदाची जबाबदारी वरिष्ठ नेत्यांकडे दिली जाण्याची शक्यता आहे.अशातच आता शरद पवारांनी (Sharad Pawar) बीडबाबत मोठा निर्णय घेतला आहे.

विधानसभा निवडणुकीतील निराशाजनक कामगिरीनंतर राष्ट्रवादी काँग्रेस शरदचंद्र पवार पक्षात बदलाचे वारे वाहू लागले आहे. राष्ट्रवादी काँग्रेस शरदचंद्र पवार पक्षाच्या पदाधिकाऱ्यांची महत्त्वपूर्ण बैठक गुरुवारी (ता.9) मुंबईत पार पडली. या बैठकीत पदाधिकारी चांगलेच आक्रमक झाल्याचं दिसून आलं. संतापलेल्या नेत्यांनी थेट प्रदेशाध्यक्ष जयंत पाटलांनाच टार्गेट केलं. पण या बैठकीत शरद पवारांनी धगधगत्या बीडबाबत मोठा निर्णय घेतला आहे.

बीड जिल्हाध्यक्षपदावरुन आमदार संदीप क्षीरसागरांची (Sandip Kshirsagar) काढण्यात आलं आहे. त्यांच्याजागी राष्ट्रवादी काँग्रेस शरदचंद्र पवार पक्षाच्या बीड जिल्हाध्यक्षपदी राजेंद्र मस्के यांची निवड करण्यात आली. आमदार संदीप क्षीरसागर यांच्याकडे असणारे जिल्हाध्यक्षपद आता राजेंद्र मस्के यांच्याकडे सोपवण्यात आले आहे.

राष्ट्रवादी काँग्रेस शरदचंद्र पवार पक्षाचे सर्वेसर्वा शरद पवार, प्रदेशाध्यक्ष जयंत पाटील यांनी मस्के यांना निवडीचे पत्र दिले. मस्के यांची बीड जिल्हाध्यक्षपदी निवड हा संदीप क्षीरसागर यांच्यासाठी हा मोठा धक्का मानला जात आहे.

याच बैठकीत राष्ट्रवादी काँग्रेस शरद पवारांच्या पक्षाचा प्रदेशाध्यक्ष बदलण्याची मागणी पदाधिकाऱ्यांनी उचलून धरली. कार्यकर्त्यांनी थेट शरद पवार यांच्यासमोरच आपल्या संतप्त भावना व्यक्त केल्या. सध्या राष्ट्रवादी काँग्रेस शरदचंद्र पवार पक्षाच्या प्रदेशाध्यक्षपदी जयंत पाटील आहेत.पण विधानसभा निवडणुकीतील अपयशानंतर जयंत पाटलांच्या प्रदेशाध्यपदावर टांगती तलवार आहे.

राष्ट्रवादी शरद पवार गटाचे नेते जयंत पाटील यांनी प्रदेशाध्यक्ष बदलावा अशी मागणी धरणाऱ्या पक्षांतर्गत विरोधकांना खुलं चॅलेंज दिलं. ते म्हणाले, पक्ष चालवणं सोपं काम नाही,सगळ्यांना सोबत घेऊन काम करावं लागतं.पण पुढच्या दोन दिवसांत प्रत्येकानं आपल्या वॉर्डात पक्षाला किती मतं दिली, त्याचा डेटा द्यावा,आठ दिवसांत स्वतःहून प्रदेशाध्यक्षपदाचा राजीनामा देतो असंही बोलून दाखवत विरोधकांना सुनावलं.