Uddhav Thackeray statement: दोन कुबड्या फेकण्याची हिंमत राज्य सरकार दाखवणार का? उद्धव ठाकरेंचा घणाघाती सवाल

Jalana News : माजी मुख्यमंत्री उद्धव ठाकरे यांच्या चार दिवसीय मराठवाडा दौऱ्याची शनिवारी सांगता झाली. यावेळी जालन्यातून उद्धव ठाकरे यांनी पत्रकार परिषद घेत राज्यातील महायुती सरकारवर टीकेची झोड उठवली. राज्यातील महायुती सरकार स्थानिक स्वराज्य संस्थेच्या निवडणुका जवळ आल्याने फसवे आश्वासन देत आहे. मात्र, राज्यातील महायुती सरकारकडे दोन कुबड्या फेकण्याची हिंमत नसल्याची जोरदार टीका त्यांनी केली. त्यासोबतच राज्यातील शेतकऱ्यांनी मदत मिळत नाही, तोपर्यंत महायुतीला व्होटबंदी करा, असे आवाहनही त्यांनी केले.

गेल्या काही दिवसापासून शेतकऱ्यांच्या पिकाला हमीभाव मिळत नाही. पंचनामे अजूनही झाले नाहीत. पीकविमा ही शेतकऱ्यांची थट्टाच झाली आहे. अतिवृष्टीने शेतकऱ्यांचे मोठा नुकसान झाले आहे. शेतकऱ्यांचा सातबारा कोरा केला पाहिजे. केंद्र सरकारचे पथक कधी आले कधी गेले कळलेच नाही, त्यामुळे राज्य सरकारने शेतकऱ्यांना तातडीने मदत दिली पाहिजे, शेतकऱ्यांच्या पिकाला हमीभाव मिळत नसल्याने अडचणीत आला आहे. कर्जमुक्ती व हेक्टरी ५० हजार मिळाला पाहिजे, अशीही मागणी ठाकरे (Uddhav Thackeray) यांनी केली.

मराठवाड्यातील नुकसान झालेल्या भागाची गेल्या चर दिवसात पाहणी केली आहे. नुकसान मोठ्या प्रमाणात झाले आहे. मात्र, अद्याप पंचनाम्याचे काम पूर्ण झालेले नाही. दगाबाज शेतकऱ्यांचा पंचनामा करा. कार्यालयात जाऊन बसा, यादी तयार झाली की नाही ते पहा. पंचनामा करताना आता सर्वांनी पुढे येण्याची गरज आहे. त्यामुळे शेतकऱ्याला लवकर मदत मिळेल. त्यामुळे शेतकऱ्याने जागरूक राहण्यास हवे, असेही ठाकरे म्हणाले.

राज्याचे मुख्यमंत्री बिहारमध्ये प्रचारात व्यस्त आहेत. त्यामुळे त्यांना शेतकऱ्यांच्या मागण्या काय कळणार आहेत. मुख्यमंत्री शेतकऱ्यांची थट्टा करीत आहेत. मदत मिळाली पाहिजे यासाठीच मी आलो असल्याचे यावेळी उद्धव ठाकरे यांनी स्पष्ट केले.

भाजपने (BJP) देशाची लूट थांबवली पाहिजे. शेतकऱ्यांना एक रकमी मदत मिळाली पाहिजे. त्यासोबतच भारत देशाला लुटणाऱ्याला वंदे मातरम म्हणण्याचा अधिकार नाही. त्यासोबतच विखेंचे घोटाळे जगजाहीर आहेत. त्यामुळे त्यांना बोलण्याचा अधिकार नाही, असेही ठाकरे म्हणाले.