Sharad Pawar : पार्थ पवार प्रकरणाची चौकशी करा, कुटुंब वेगळं राजकारण वेगळं : शरद पवार 2 दिवसांच्या आरोपांनंतर पहिल्यांदा बोलले

Mumbai News : पुणे येथील जमीन व्यवहार प्रकरणात पार्थ पवार यांच्यावर आरोप होत आहेत. यावरून विरोधक राज्य सरकारच्या कारभारावर आरोप करत असल्याने राज्यातील वातावरण चांगलेच तापले आहे. त्यातच आता या प्रकरणी ज्येष्ठ नेते शरद पवार यांनी मोठे वक्तव्य केले असून मुंढवा येथील जमीनप्रकरणाची चौकशी करून वास्तव समोर आणा, अशी मागणी त्यांनी केली आहे.

अकोल्यातील पत्रकार परिषदेवेळी ज्येष्ठ नेते शरद पवार यांनी पत्रकांराशी संवाद साधत विविध प्रश्नांना उत्तरे दिली. पार्थ पवार यांच्यावर गुन्हा का दाखल झाला नाही? या प्रश्नाचे उत्तर मुख्यमंत्री देवेंद्र फडणवीस हेच देऊ शकतील. या प्रकरणाची फडणवीस यांनी चौकशी करायला हवी, अशी मागणीही शरद पवार यांनी केली.

पार्थ पवार प्रकरणात चौकशी करून वास्तव समोर ठेवावे. मुंढवा येथील जमीन प्रकरणाची चौकशी करून वास्तव समोर आणा. त्यासोबतच सुप्रिया सुळे यांची पार्थ पवार यांच्याबद्दलची भूमिका ही वैयक्तिक असल्याचे देखील त्यांनी स्पष्ट केले. दरम्यान, सुप्रिया सुळे (Supriya sule) यांनी जमीन व्यवहार प्रकरणात पार्थ पवार काही चुकीचे करणार नसल्याचे प्रसार माध्यमाशी बोलताना स्पष्ट केले होते.

मुंढवा येथील जमीन प्रकरणातील कोण तेजवानी हे मला माहित नाही. त्यापासून मी दूर आहे. या प्रकरणाची चौकशी करून राज्य सरकारने दोषींवर कारवाई केली पाहिजे, असेही शरद पवार (Sharad pawar) यांनी स्पष्ट केले. आमच्या पक्षात सर्वाना विचारून निर्णय घेतले जातात. त्यासोबतच सामूहिकही निर्णय घेतले जातात, असेही त्यांनी एका प्रश्नाला उत्तर देताना स्पष्ट केले.

राज्यात पार पडलेल्या विधानसभा निवडणुकीनंतर मतचोरी होत असल्याचे पुढ़े आले आहे. त्यामुळे येत्या काळात जर व्हीव्हीपॅटवर मतदान झाले तर मतदानावर शंका घेता येणार नाही. काँग्रेसचे नेते राहुल गांधींचे चांगले काम करीत असल्याचेही शरद पवार म्हणाले. राज्य सरकारकडून शेतकऱ्यांना दिले जात असलेले कर्जमाफीचे आश्वासन ही शेतकऱ्यांची शुद्ध फसवणूक असल्याचेही शरद पवार यांनी स्पष्ट केले.