Karuna Sharma : "राजीनामा द्या, तुम्ही न्याय देऊ शकत नाही..." वैष्णवी हगवणे प्रकरणावरून करूणा शर्मांचा रूपाली चाकणकरांवर हल्लाबोल

Beed News, 24 May : पुण्यातील वैष्णवी हगवणे यांच्या आत्महत्या प्रकरणानंतर राज्यभरात संतापाची लाट उसळली आहे. त्यांच्या आत्महत्येला कारणीभूत असलेल्या सासरच्या लोकांवर कडक कारवाई करावी अशी राज्यभरातून मागणी केली जात आहे. तर वैष्णवीच्या सासऱ्याला आणि दीराला सात दिवसांनंतर अटक करण्यात आली आहे.

तर दुसरीकडे या प्रकरणात राज्य महिला आयोग आणि पोलिसांच्या भूमिकेवर नागरिकांकडून नाराजी व्यक्त केली जात आहे. अशातच आता करुणा शर्मा यांनी तर थेट राज्य महिला आयोगाच्या अध्यक्षा रूपाली चाकणकर यांनी राजीनामा द्यावा अशी मागणी करत त्यांच्यावर जोरदार टीका केली आहे.

"रुपालीताईंना विनंती करते तुम्ही राजीनामा द्या. राजकीय महिलांना माझी विनंती आहे माझा मर्डर झाला किंवा मी आत्महत्या केली तर माझ्यासाठी तुम्ही तोंड उघडून बोलू नका अशी करते", असं म्हणत त्यांनी चाकणकरांवर निशाणा साधला.

करूणा शर्मा म्हणाल्या, "आतापर्यंत मी दाखल केलेल्या एकाही तक्रारीच निराकरण झालेलं नाही. गाडीत बंदूक ठेवणं प्रकरण असो वा वाल्मिक कराडने केलेली मारहाण या प्रकरणात मला न्याय मिळाला नाही. धनंजय मुंडे आणि त्यांचे गुंड धमकी देत आहेत. याबाबत तक्रार केली आहे.

या धमकीमुळे माझ्यावर खूप प्रेशर असून मी कधी आत्महत्या करेन हे सांगू शकत नाही. त्यामुळे मी जर काही बरंवाईट केलं तर राजकीय महिलांनी तोंड उघडून बोलू नये." तसंच यावेळी त्यांनी पुण्यातील गुंडागर्दीवर अजितदादांना डीवचलं. त्या म्हणाल्या, अजितदादा पूण्याचे पालकमंत्री आहेत, तिथं किती गुंडागर्दी वाढली हे सर्वांना माहिती आहे.

मात्र, बीडला तर धनंजय मुंडेचं राज्य असून तिकडे हे नेहमीच सुरू असतं. दरम्यान, त्यांनी महिला आयोगाच्या अध्यक्षा रूपाली चाकणकर यांच्यावर हल्लाबोल केला. रुपालीताई माझी तुम्हाला कळकळीची विनंती आहे की तुम्ही राजीनामा द्या.

एक महिला म्हणून सांगतेय हे पद राजकीय पद नाही. तुम्ही महिलांना न्याय देऊ शकत नाही. त्यामुळे राजीनामा द्या. एक पुरुष तीन तीन लग्न करतोय जर महिला आयोगाने काम केल असतं तर हे झालं असतं का? असा सवाल करत त्यांनी चाकणकरांवर निशाणा साधला.