Latur, 23 August : अतिवृष्टीमुळे झालेल्या नुकसान भरपाईबाबत वादग्रस्त विधान करणारे राज्य कृषिमूल्य आयोगाचे उपाध्यक्ष तथा भाजप नेते पाशा पटेल यांना छावा संघटनेचे विजय घाडगे पाटील यांनी चांगले सुनावले आहे. निसर्गासाठी तुम्ही 33 कोटी वृक्षलागवड केली. त्या 33 कोटी झाडाचं काय झालं? ती 33 कोटी झाडं कुठं आहेत, ते दाखवा, असे चॅलेंज घाडगे पाटील यांनी पाशा पटेल यांना दिले आहे.
विजय घाडगे पाटील म्हणाले, अतिवृष्टीमुळे झालेल्या नुकसानीला शेतकरी तोंड देत असताना, तो अडचणीत सापडलेला असताना राज्य कृषिमूल्य आयोगाचे उपाध्यक्ष पाशा पटेल यांनी अत्यंत चुकीचे विधान केले आहे. कर्माची फळं भोगा म्हणजे काय? शेतकऱ्यांनी या निसर्गाचं नेमकं काय नुकसान केलं? हे पाशा पटेल यांनी सांगावं.
या निसर्गासाठी तुम्ही (भाजप सरकारने) 33 कोटी वृक्षलागवड केली, पाशा पटेल. त्या 33 कोटी झाडाचं काय झालं? ती 33 कोटी झाडं कुठं आहेत, ते दाखवा. तुम्ही चुकीच्या पद्धतीनं शेतकऱ्यांबाबत वक्तव्य कराल तर शेतकरी आता शांत बसणार नाहीत, असाही इशारा घाडगे पाटील यांनी दिला आहे.
ते म्हणाले, तुमचं पोट भरलंय आता. तुमच्याकडं काहीचं नव्हतं, त्यावेळी तुम्ही पोटतिडकीने बेंबीच्या देठापासून सोयीबीनच्या भावासाठी, शेतकरी कर्जमाफीसाठी, पिकविम्यासाठी आणि शेतकऱ्यांच्या अनुदानासाठी राज्यात (मतांचा) जोगवा मागितला. त्या मुद्यावर जोगवा मागून तुम्ही तुमचं पोट भरलं आहे. आता तुमचं पोट भरल्यामुळे शेतकऱ्यांचं दुःख तुम्हाला कळणार नाही.
पाशा पटेल, तुम्हाला राज्य कृषिमूल्य आयोगाच्या उपाध्यक्षपदी बसण्याचा कोणताही नैतिक अधिकार नाही. अशा पद्धतीची बेताल वक्तव्ये यापुढे कराल, तर शेतकरी तुम्हाला सडेतोड उत्तर दिल्याशिवाय राहणार नाही, असाही इशारा घाडगे पाटील यांनी दिला.
पाशा पटेल नेमकं काय म्हणाले होते?
अतिवृष्टीमुळे झालेले नुकसान भरून काढणं तर शक्यच नाही. वर्षातील 365 दिवसांतील 322 दिवस शेतकऱ्यांना संकटांचे दिवस येणार आहेत, ही काळ्या दगडावरची पांढरी रेघ आहे. आपण निसर्गाचा एवढा नाश केलेला आहे, त्याचे भोग आपल्याला भोगावेच लागणार आहेत. झालेले नुकसान कधीही भरून येणार नाही. तात्पुरतं उभं राहण्यापुरतं सरकार देऊ शकतं. संपूर्ण नुकसान भरपाई सरकार देऊच शकत नाही, असे विधान पाशा पटेल यांनी केले आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.