Mahayuti : फडणवीस यांच्या खास आमदाराला अजितदादांचं बक्षीस; विधानसभा उपाध्यक्षपदावर मिळणार संधी?

विधानसभेचे उपाध्यक्षपद राष्ट्रवादी काँग्रेसला मिळणार असल्याचे जवळपास निश्चित झाले आहे. भाजपचे माजी नेते आणि राष्ट्रवादी काँग्रेसचे विद्यमान आमदार राजकुमार बडोले यांची या पदावर वर्णी लागण्याची शक्यता आहे. विधिमंडळाच्या अर्थसंकल्पीय अधिवेशनादरम्यान, उपाध्यक्षपदासाठीची निवडणूक होणार असल्याचे समजते.

भाजपकडे विधानसभेचे अध्यक्षपद आणि विधानपरिषदेचे अध्यक्षपद आहे. तर विधान परिषदेचे उपसभापतीपद शिवसेनेकडे (Shivsena) आहे. त्यामुळे विधानसभेच्या उपाध्यक्ष पदावर राष्ट्रवादी काँग्रेसने दावा केला आहे. सामाजिक समतोल साधण्यासाठी अनुसूचित जात प्रवर्गाला उपाध्यक्षपद देणार असल्याची घोषणा काही दिवसांपूर्वी अजित पवार यांनीच केली होती. त्यानुसार बडोले यांना या पदावर संधी देण्यात येणार असल्याची चर्चा आहे.

बडोले हे 1984 ते 2008 या काळात जिल्हा परिषदेच्या सिंचन विभागात अभियंता म्हणून कार्यरत होते. मात्र अनेक सामाजिक उपक्रमाच्या माध्यमातून ते जनतेच्या संपर्कात होते. 2009 मध्ये त्यांनी नोकरीचा राजीनामा दिला आणि भाजपमध्ये (BJP) प्रवेश केला. भाजपने बडोले यांना गोंदिया जिल्ह्यातील अनुसूचित जातीसाठी राखीव असलेल्या अर्जुनी मोरगाव या मतदारसंघातून तिकीट दिले आणि ते विजयीही झाले.

2014 मध्येही ते पुन्हा निवडून आले आणि फडणवीस सरकारमध्ये मंत्रीही झाले. ते पाच वर्ष सामाजिक न्यायमंत्री होते. पण 2019 च्या निवडणुकीत बडोले यांना पराभवाचा धक्का बसला. राष्ट्रवादी काँग्रेसच्या मनोहर चंद्रिकापुरे यांनी त्यांचा अवघ्या 715 मतांनी पराभव केला. पुढे अजित पवार भाजपसोबत आल्याने अर्जुनी मोरगाव मतदारसंघावर राष्ट्रवादीचा दावा कायम राहिला.

त्यामुळे कुठून लढायचे असा प्रश्न बडोले यांच्यासमोर होता. त्यातून राजकीय तडजोड म्हणून त्यांनी राष्ट्रवादीत प्रवेश केला. त्यांना तिकीट मिळाले आणि ते पुन्हा आमदार झाले. आता बडोले यांचे नाव विधानसभा उपाध्यक्षपदासाठी आघाडीवर आहे. बडोले उपाध्यक्ष झाल्यास एक प्रकारे मु्ख्यमंत्री देवेंद्र फडणवीस यांनी हे पद भाजपकडेच ठेवण्याची खेळी खेळल्याचे सिद्ध होईल.