Chhagan Bhujbal Video : छगन भुजबळांचे सर्व नियोजित कार्यक्रम रद्द, विशेष विमानाने लातुरकडे रवाना! ओबीसी आंदोलकाने जीवन संपवले!

Chhagan Bhujbal News: मनोज जरांगे पाटील यांच्या आंदोलनानंतर सरकारने हैदराबाद गॅझेटीअर लागू करण्याचा जीआर काढला. या जीआरमुळे मराठा समाज ओबीसीमध्ये येत असल्याचा आक्षेप ओबीसी संघटनांकडून घेतला जात आहे. त्याविरोधात ते न्यायालयात देखील गेले आहे. दरम्यान, बुधवारी (ता.10) मराठा समाजाला हैदराबाद गॅझेट लागू करून सरकारने ओबीसींचे आरक्षण संपवले आहे, असे म्हणत लातूर जिल्ह्यातील वांगदरी येथील भरत कराड याने आत्महत्या केली.

भरत कराडच्या आत्महत्येविषयी समजताच मंत्री छगन भुजबळ यांनी आपले सर्व नियोजित कार्यक्रम रद्द केले आहेत. ते आज (शुक्रवारी) लातूर जिल्ह्याच्या दौऱ्यावर जाणार असून भरत कराडच्या कुटुंबीयांची भेट घेणार आहेत. भुजबळ हे विशेष विमानने लातुरला येणार आहेत. भुजबळ यांच्यासह राज्यातील ओबीसी नेते देखील कराड कुटुंबीयांची भेट घेणार आहेत.

वांगदरी येथे भरत कराडच्या घरी भुजबळ हे सात्वंनपर भेट देणार आहेत. दरम्यान, मराठा समाजाला जीआरच्या माध्यमातून ओबीसीमध्ये घुसवण्याचा प्रयत्न केला जात आहे. त्यामुळे आम्ही या विरोधात कोर्टात जाणार असल्याचे भुजबळ यांनी जाहीर केले आहे. राज्यात लोकशाही आहे जरांगेशाही नाही, अशी टीका करत देखील त्यांनी केली आहे.

मांजरा नदी पात्रात उडी घेत आत्महत्या

भरत कराड (वय 35) हा रिक्षा चालवून किंवा इतर वाहनांवर चालक म्हणून काम करत होता. मात्र, हैदराबाद गॅझेटीअर लागू करण्याच्या सरकारच्या निर्णयानंतर तो अस्वस्थ होता. त्याने मांजरा नदीपात्रात उडी मारून आत्महत्या केली. त्याने आत्महत्येपू्र्वी चिठ्ठी देखील लिहून ठेवली आहे. त्यामध्ये म्हटले आहे की, मी ओबीसी आरक्षण बचाव आंदोलनात सहभाग घेतला होता. मात्र, सरकारने घात करून ओबीसी विरोधी जीआर काढल्यामुळे जीवन संपवत आहे.