Sangola Politic's : शेकापची 50 वर्षांची सत्ता संपुष्टात; सांगोल्यात भाजपचा सभापती, दीपक साळुंखेंची ऐनवेळी पलटी

Sangola, 12 March : सांगोला पंचायत समितीच्या निवडणुकीत शेतकारी कामगार पक्षासोबत आघाडी करून तीन सदस्य निवडून आलेल्या माजी आमदार दीपक साळुंखे गटाने ऐनवेळी पलटी मारल्याने शेतकरी कामगार पक्षाची सुमारे ५० वर्षांची सत्ता संपुष्टात आली आहे. मुंबईतील राजकीय घडामोडीनंतर साळुंखे गटाच्या तीन सदस्यांनी भारतीय जनता पक्षात प्रवेश केला. त्यामुळे भाजपच्या पूनम इंगवले सभापती, तर शिवसेनेचे अजय सरगर हे उपसभापती बनले.

सांगोला (Sangola) तालुक्याच्या राजकारणात मोठी उलथापालथ घडवत पंचायत समितीवरील शेतकरी कामगार पक्षाची जवळपास पन्नास वर्षांची सत्ता अखेर संतूष्टात आली आहे. तालुक्यात झालेल्या नाट्यमय राजकीय घडामोडीनंतर महायुतीने पंचायत समितीवर सत्ता स्थापन केली असून भाजपच्या पूनम इंगवले यांची सभापती तर शिवसेनेचे अजय सरगर यांची उपसभापतीपदी निवड झाली आहे.

जिल्हा परिषद, पंचायत समिती निवडणुकीत शेतकरी कामगार पक्ष (PWP Party) आणि माजी आमदार दीपक साळुंखे गटाची आघाडी झाली होती. या आघाडीला पंचायत समितीमध्ये नऊ जागा मिळाल्या होत्या विरोधातातील शिवसेना-भाजप युतीला फक्त पाच जागांवर समाधान मानावे लागले होते.

शेकाप आणि साळुंखे गटाची आघाडी सत्तेवर येणार, असे काही दिवसांपर्यंतचे चित्र होते. मात्र मागील काही दिवसांपासून मुंबईत जोरदार घडामोडी घडत होत्या. दीपक साळुंखे हे पालकमंत्री जयकुमार गोरेंशी मुंबईत वाटाघाटी करत होते. त्यात यश आल्यानंतर साळुंखे गटाच्या तीन सदस्यांनी मुंबईमध्ये बुधवारी भाजपमध्ये प्रवेश केला, त्यामुळे आघाडीची संख्या नऊवरून सहावर आली, तर भाजप-शिवसेनेची सदस्यसंख्या आठवर गेली. त्यामुळे पंचायत समितीच्या सत्तेचे गणित पूर्णपणे बदलले.

सभापतिपदासाठी भाजपच्या पूनम इंगवले, तर शेकापकडून काजल काशीद यांनी, तर उपसभापतिपदासाठी शिवसेनेचे अजय सरगर यांनी, तर शेकापकडून छाया कोळेकर यांनी अर्ज दाखल केला होता. मतदानाच्या वेळी महायुतीच्या आठ सदस्यांनी इंगवले आणि सरगर यांच्या बाजूने हात वर करत विजय निश्चित केला. त्यामुळे आठ विरुद्ध सहा अशा फरकाने सांगोला पंचायत समितीवर प्रथमच महायुतीची सत्ता स्थापन झाली आणि शेकापचे दीर्घकाळ टिकलेले वर्चस्व संपुष्टात आले.

गणपतआबांच्या निधनानंतर शेकापला दुसऱ्यांदा अपयश

(स्व) गणपतराव देशमुख यांच्या निधनानंतर झालेल्या नगरपालिका निवडणुकीतही शेकापला सत्ता मिळविता आली नव्हती. ऐन वेळेच्या युती-आघाडीचा फटका नगरपरिषदेत निवडणुकीत शेकापला बसला होता. त्या निवडणुकीत शिवसेनेने नगराध्यक्षपद मिळवत नगरपालिकेवर सत्ता स्थापन केली होती. आता पंचायत समितीवरील सत्ता गमावल्याने सांगोल्यात शेकापचे राजकीय वर्चस्व ढासळत असल्याचे चित्र आहे.

भाजपने सभापती करून दाखवला

पंचायत समितीच्या निवडणुकीत भाजपचा केवळ एकच सदस्य निवडून आला आहे. पण साळुंखे गटाचे तीन सदस्य भाजपत दाखल झाल्याने भाजपची ताकद चारवर गेली. शिवसेनेचे चार सदस्य मिळून महायुतीकडे आठ सदस्य झाले आणि त्याच बळावर भाजपने सभापतिपद पटकावले.