NCP Vs BJP : कराडमध्ये भाजप अन्‌ राष्ट्रवादीचे कार्यकर्ते भिडले; वडगाव हवेलीत बोगस मतदानाचा मुद्दा तापला

Karad, 07 February : सातारा जिल्हा परिषद आणि कऱ्हाड पंचायत समिती निवडणुकीसाठी आज (ता. 07 फेब्रुवारी) शनिवारी मतदान सुरु असतानाच राजकीयदृष्ट्या संवेदनशील असलेल्या कऱ्हाड तालुक्यातील वडगाव हवेली येथे वादावादी झाली. बोगस मतदानाच्या मुद्यावरून राष्ट्रवादी काँग्रेस आणि भारतीय जनता पक्षाचे कार्यकर्ते एकमेकांना भिडले.

बोगस मतदानाच्या कारणावरुन भारतीय जनता पक्ष (BJP) आणि राष्ट्रवादी कॉंग्रेसच्या कार्यकर्त्यांमध्ये वादावादी सुरु होती. त्याच वेळी कार्यकर्त्यांची तेथे मोठी गर्दी झाली. त्यामुळे वडगाव हवेली केंद्र परिसरात काही काळ तणावाची परिस्थिती निर्माण झाली होती. पोलिसांनी वेळीच हस्तक्षेप केल्याने मोठा अनर्थ टळला आहे.

सातारा जिल्हा परिषद व पंचायत समितीसाठी आज शनिवारी सकाळी सातपासून मतदानाला सुरुवात झाली आहे, त्यासाठी प्रशासनाने मोठी तयारी केली आहे. पोलिसांनीही मोठा फौजफाटा तैनात केला आहे. कऱ्हाड (Karad) तालुक्यातील ४८६ मतदान केंद्रावर मतदानाची प्रक्रिया सुरू आहे.

सकाळच्या टप्यात धिम्या गतीने सुरु असणाऱ्या मतदानाने दहानंतर वेग घेतला आहे. सकाळी दहानंतर मतदारांनी मोठ्या प्रमाणात मतदान केंद्रावर गर्दी केली होती. सकाळी साडेसात ते दुपारी साडेअकरा वाजेपर्यंत २१.६३ टक्के मतदान झाले आहे.

दरम्यान या निवडणुकीच्या मतदानात वडगाव हवेली येथे भाजप आणि राष्ट्रवादी कॉंग्रेसच्या समर्थकांमध्ये बोगस मतदानावरुन हमरीतुमरी झाली. बोगस मतदानाच्या कारणावरुन काही काळ वाद सुरु राहिला. त्याबाबतची माहिती समजताच दोन्ही बाजूच्या समर्थक कार्यकर्त्यांनीही मोठी गर्दी केली होती.

उपस्थित असलेल्या पोलिसांनी वेळीच हस्तक्षेप केल्यामुळे मोठा अनर्थ टळला. मात्र, या प्रकारामुळे वडगाव हवेली येथे तणावाचे वातावरण निर्माण झाले होते. मात्र, कार्यकर्त्यांमध्ये या वादाची जोरदार चर्चा सुरु होती.