सोलापूर जिल्ह्यात काँग्रेसचे दिलीप माने आणि राष्ट्रवादी काँग्रेसचे तीन माजी आमदार भाजपात प्रवेश करणार होते, पण स्थानिक कार्यकर्त्यांच्या विरोधामुळे हा प्रवेश लांबणीवर पडला आहे.
दिलीप माने यांच्या प्रवेशाला दक्षिण सोलापूर भाजप कार्यकर्त्यांनी तीव्र विरोध करून पक्ष कार्यालयासमोर धरणे आंदोलन केले.
राष्ट्रवादीचे माजी आमदार भाजपात प्रवेश करत असल्याने अजित पवार नाराज असून, त्यांनी या प्रवेशाला विरोध दर्शवला आहे.
Solapur, 25 October : सोलापूर जिल्ह्यातील राष्ट्रवादी काँग्रेसचे तीन, तर काँग्रेसच्या एक माजी आमदाराने भारतीय जनता पक्षात प्रवेश करण्याचा निर्णय घेतला आहे. मात्र, काँग्रेसचे माजी आमदार दिलीप मानेंच्या प्रवेशाला भाजप कार्यकर्त्यांनी विरोध करत पक्ष कार्यालयासमोर धरणे आंदोलन केले.
राष्ट्रवादी काँग्रेसचे माजी आमदार फोडल्याने उपमुख्यमंत्री अजित पवार (Ajit Pawar) हेही भाजपवर नाराज झाल्याची माहिती आहे, त्यातून त्यांनी आपल्या पक्षातील माजी आमदारांच्या भाजप प्रवेशाला हरकत घेतली आहे, त्यामुळे पालकमंत्री जयकुमार गोरे यांनी टाकलेला भाजप प्रवेशाचा डाव यशस्वी होणार की ‘ऑपरेशन लोटस’ अयशस्वी ठरणार, याकडे सोलापूरच्या राजकीय वर्तुळाचे लक्ष लागले आहे.
दरम्यान, काँग्रेस आणि राष्ट्रवादी काँग्रेस पक्षाच्या चार माजी आमदारांच्या भाजप प्रवेशाचा मुहूर्त येत्या सोमवारचा (ता. २७ ऑक्टोबर) ठरला होता. मात्र, दिलीप मानेंच्या (Dilip Mane) भाजप प्रवेशाला दक्षिण सोलापूर तालुक्यातील कार्यकर्त्यांनी तीव्र विरोध दर्शविला आहे. त्यामुळे सोमवारी होणारे पक्षप्रवेश लांबणीवर पडल्याचे दिसून येत आहे.
छत्रपती शिवाजी महाराज यांच्या अश्‍वारूढ पुतळ्याच्या अनावरणासाठी मुख्यमंत्री देवेंद्र फडणवीस हे येत्या रविवारी (ता.२६ ऑक्टोबर) मंगळवेढा दौऱ्यावर येणार होते. त्या कार्यक्रमासाठी या नेत्यांच्या प्रवेशासाठी मध्यस्थी केलेले पालकमंत्री जयकुमार गोरे यांच्यासह जिल्ह्यातील भाजपचे आमदार व भाजपमध्ये प्रवेशासाठी इच्छुक नेतेही उपस्थित राहणार होते. मात्र, मुख्यमंत्र्यांचा दौरा रद्द झाल्याने प्रवेश लांबणीवर पडण्याची शक्यता आहे.
काँग्रेसचे दिलीप माने, राष्ट्रवादी काँग्रेसचे राजन पाटील, यशवंत माने हे माजी आमदार, तर माजी आमदार बबनराव शिंदे यांचे पुत्र रणजितसिंह व विक्रमसिंह शिंदे हे भारतीय जनता पक्षात प्रवेश करणार आहेत. पालकमंत्री जयकुमार गोरे यांच्या मध्यस्थीने गेल्या आठवड्यात त्यांनी मुंबईत मुख्यमंत्री देवेंद्र फडणवीस यांची भेट घेऊन चर्चा केली होती.
मुख्यमंत्र्यांसोबत झालेल्या चर्चेनुसार हे माजी आमदार सोमवारी मुंबईत भाजपत प्रवेश करणार होते, असे भाजपच्या पदाधिकाऱ्याने सांगितले. मात्र, सोलापूर दक्षिण विधानसभा मतदारसंघातील भाजप पदाधिकारी व कार्यकर्त्यांनी पक्ष कार्यालयासमोर धरणे धरत माने यांच्या प्रवेशाला तीव्र विरोध दर्शवला आहे.
दुसरीकडे राष्ट्रवादी काँग्रेस पक्षाचे माजी आमदार राजन पाटील, यशवंत माने व बबनराव शिंदे यांच्या पुत्रांच्या भाजप प्रवेशाला अजित पवारांनी हकरत घेतल्याची माहिती आहे. त्यांना भाजपत प्रवेश देऊ नये, यासाठी प्रयत्न सुरू आहेत. मात्र हे माजी आमदार भाजप प्रवेश करण्याबाबत ठाम आहेत, त्यामुळे त्यांचा भाजप प्रवेश लांबणीवर पडण्याची शक्यता वर्तविण्यात येत आहे.
कार्यकर्त्यांच्या भावना समजून घ्या
माजी आमदार दिलीप माने यांच्या भाजप प्रवेशाला सोलापूर दक्षिण विधानसभा मतदारसंघातील भाजप पदाधिकाऱ्यांसह कार्यकर्त्यांनी पक्ष कार्यालयासमोर धरणे आंदोलन करत विरोध केला आहे. त्या आंदोलनाचा अहवाल जिल्हाध्यक्ष शशिकांत चव्हाण यांनी प्रदेश कार्यालयास पाठविला आहे. प्रदेश पातळीवरील नेत्यांना कार्यकर्त्यांच्या भावना कळविण्यात आलेल्या आहेत. भाजप प्रवेशापूर्वी कार्यकर्त्यांच्या भावना समजून घ्याव्यात, असेही त्यात म्हटले आहे. सोलापूरच्या शहराध्यक्षा रोहिणी तडवळकर यांनीही आंदोलनाचा अहवाल भाजपश्रेष्ठींना पाठविला आहे.
Q1. सोलापूरमधील कोणते माजी आमदार भाजपात प्रवेश करणार होते?
A1. काँग्रेसचे दिलीप माने आणि राष्ट्रवादी काँग्रेसचे राजन पाटील, यशवंत माने व बबनराव शिंदे यांचे पुत्र रणजितसिंह आणि विक्रमसिंह शिंदे हे.
Q2. दिलीप माने यांच्या भाजप प्रवेशाला विरोध का झाला?
A2. दक्षिण सोलापूर मतदारसंघातील भाजप कार्यकर्त्यांनी त्यांना नको असल्याने विरोध केला.
Q3. या माजी आमदारांचा प्रवेश कधी होणार होता?
A3. २७ ऑक्टोबर रोजी मुंबईत त्यांच्या प्रवेशाचा कार्यक्रम ठरला होता.
Q4. अजित पवार यांनी कोणत्या कारणामुळे नाराजी व्यक्त केली?
A4. त्यांच्या पक्षातील माजी आमदार भाजपात जात असल्याने अजित पवारांनी या प्रवेशाला हरकत घेतली आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.