Solapur Crime : अजितदादा अन् IPS अंजना कृष्णा यांचा व्हिडिओ व्हायरल होताच कुर्डू गावचे सरपंच, ग्रामसेवक अडचणीत : गंभीर आरोप करत महिला तलाठ्याची पोलिसांत धाव

Solapur News, 09 Sep : राज्याचे उपमुख्यमंत्री अजित पवार आणि आयपीएस अंजना कृष्णा यांच्या फोनवरील संभाषणाचा व्हिडिओ व्हायरल झाल्यामुळे माढा तालुक्यातील कुर्डू येथील मुरूम उपसा प्रकरण राज्यभरात चर्चेचा विषय बनलं आहे.

याच प्रकरणावरून राज्यातील राजकारण देखील असतानाच आता सोलापूर जिल्हाधिकारी कार्यालयाकडून या प्रकरणी धक्कादायक माहिती समोर आणली आहे. ती म्हणजे तहसीलदारांची परवानगी न घेता जवळपास अर्धा एकर क्षेत्रातील 120 ब्रास मुरुम बेकायदेशीर पद्धतीने उपसा करून त्याची चोरी केल्याचा प्रकार उघडकीस आला आहे.

या प्रकरणी आता कुर्डू गावच्या सरपंच कुंताबाई अंबादास चोपडे आणि ग्रामसेवक मोहन धोंडिराम पवार या दोघांविरोधात मुरुम चोरीचा गुन्हा दाखल करण्यात आला आहे. सरपंच आणि ग्रामसेवकाने मिळून मुरुम उपसा केल्याची तक्रार गावच्या तलाठी प्रिती शिंदेंनी पोलिसांत दिली.

या तक्रारीनंतर केलेल्या तपासात कुर्डू येथे तहसीलदारांची किंवा इतर कोणतीही शासकीय परवानगी न घेता बेकायदेशीर मुरुम उपसल्याचं उघडकीस आलं आहे. तर बेकायदेशीर मुरूम उपसा केला जात असल्यामुळेच ती कारवाई रोखण्यासाठी आयपीएस अंजना कृष्णा त्या ठिकाणी गेल्या होत्या.

मात्र, यावेळी संबंधितांवर कारवाई करू नये यासाठी अंजना कृष्णा यांना उपमुख्यमंत्री अजित पवार यांनी फोन केल्याचं आता स्पष्ट झालं आहे. दरम्यान, गावातील रस्ता करण्यासाठी हा मुरुम लागत होता. मात्र ज्या दोन रस्त्यासाठी मुरूम उपसल्याचा दावा केला जात होता. त्या रस्त्यासाठी दिलेली वर्कऑर्डरची मुदत ही आधीच संपल्याची माहिती सोलापूर जिल्हाधिकारी कार्यालयाने दिली आहे.

त्यामुळे आता कुर्डू गावात झालेला मुरूम उपसा करण्यासाठी कोणत्याही प्रकारची शासकीय परवानगी घेतली नसल्याचं स्पष्ट झांलं आहे. दरम्यान, कुर्डू गावातील मुरूम उपसा दरम्यान झालेल्या वादा दरम्यान अण्णा ढाणे, बाबा जगताप यांत्यासह गावातील 15 ते 20 जणांवर सरकारी कामात अडथळा आणणे तसंच हाणामारी व बेकायदेशीर जमाव जमवल्या प्रकरणी गुन्हा दाखल करण्यात आला आहे.