Rajan Patil Supporter : अनगरची निवडणूक लागताच राजन पाटील समर्थकांचा थेट अजितदादांवरच हल्ला; ‘हे तर कटकारस्थान, सुडबुद्धीचे राजकारण....’

1. अनगरच्या ६५ वर्षांच्या इतिहासात पहिल्यांदा नगराध्यक्ष पदासाठी निवडणूक लागली आहे, कारण राष्ट्रवादीच्या उज्ज्वला थिटे यांनी उमेदवारी दाखल केली असून त्यामुळे प्राजक्ता पाटील यांची बिनविरोध निवड थांबली.

2. राजन पाटील समर्थकांनी उपमुख्यमंत्री अजित पवार यांच्यावर सुडबुद्धीने निवडणूक लावल्याचे आरोप केले, तसेच अनगरची बिनविरोध परंपरा खंडित करण्यामागे त्यांचा कट असल्याचा दावा केला.

3. समर्थकांचे म्हणणे आहे की अजित पवार यांना भाजपचा बिनविरोध नगराध्यक्ष नको होता, म्हणूनच ही निवडणूक मुद्दाम लावण्यात आली असून थिटे यांना लोकांचा पाठिंबा नाही.

Solapur, 18 November : अनगरच्या 65 वर्षांच्या इतिहासात नगरपंचायतीच्या नगराध्यक्षपदासाठी पहिल्यांदाच निवडणूक लागली आहे. माजी आमदार राजन पाटील यांच्या सूनबाई प्राजक्ता अजिंक्यराणा पाटील यांच्या विरोधात राष्ट्रवादी काँग्रेस पक्षाकडून उज्ज्वला थिटे यांनी उमेदवारी दाखल केली आहे, त्यामुळे संतप्त झालेल्या राजन पाटील समर्थकांनी थेट उपमुख्यमंत्री अजित पवार यांच्यावर हल्लाबोल केला आहे.

अनगर (Angar) ग्रामपंचायतीचे नगरपंचायतीमध्ये रुपांतर झाल्यानंतर पहिल्यांदाच होणाऱ्या नगराध्यक्षाच्या निवडणुकीसाठी उज्ज्वला थिटे यांनी राष्ट्रवादीकडून उमेदवारी अर्ज भरला आहे, त्यामुळे राजन पाटील यांची सून प्राजक्ता पाटील यांची बिनविरोध निवड होऊ शकलेली नाही, त्यामुळे चिडलेल्या ग्रामस्थांनी आपला राग अजित पवारांवर काढला आहे.

बिनविरोधची परंपरा खंडीत केलेली आहे. राजन पाटील हे भाजपमध्ये गेल्यानंतर राज्यात केवळ अनगरची नगरपंचायत बिनविरोध होते की काय, अशी भीती अजित पवारांना (Ajit Pawar) वाटायला लागली. त्यांनी कटकारस्थान करून अनगरमधील बिनविरोधची परंपरा खंडीत केली आहे, असा आरोप भाऊराव गणपत इंगळे यांनी केला.

अनगरमध्ये दहशत असती तर एवढे लोक राजन पाटील (Rajan Patil) यांच्यासाठी एकत्र आले असते का, असा सवाल एका ज्येष्ठ नागरिकाने केला. दरम्यान, भाजपची नगरपंचायत बिनविरोध होऊ नये, यासाठी अजित पवार यांच्या राष्ट्रवादीने हे निवडणूक लावली आहे, असे एका समर्थकाने सांगितले.

अनगर नगरपंचायतीची निवडणूक सुडबुद्धीतून लावण्यात आलेली आहे. उज्ज्वला थिटे उमेदवारी अर्ज भरायला आल्या होत्या, त्यामागे कोणी समर्थक तुम्हाला दिसले का. त्यामुळे थिटे यांच्या पाठीशी किती लोक आहेत, हे सर्वांच्या लक्षात आलेच असेल. हा सूडबुद्धीने अजितदादांनी केलेला खेळ आहे, असा आरोप एका समर्थकाने केला आहे.

अनगर नगरपंचायतीची निवडणूक बिनविरोध व्हावी, अशी गावातील सर्व ग्रामस्थांची इच्छा होती. मात्र, माझी नगरपरिषद बिनविरोध होत नाही. पण राजन पाटलांची नगरपंचायत बिनविरोध होते, हे सूडबुद्धीचे राजकारण अजित पवारांकडून केले गेले आहे. अनगर गाव बदनाम करण्याचा प्रयत्न त्यांनी केलेला आहे. माजी आमदार बाबूराव पाटील यांच्यापासून सुरू असलेली बिनविरोधची परंपरा मोडीत काढायची आणि अनगरला बदनाम कसं करायचं, एवढंच कारस्थान अजित पवार यांनी केलेले आहे, असा दावा पाटील समर्थकाने केलेला आहे.

बिहारच्या निवडणुकीत राष्ट्रवादी काँग्रेस पक्षाची जी अवस्था झाली, त्याकडे त्यांनी लक्ष द्यायला पाहिजे. पण त्यांनी अनगर नगरपंचायत निवडणुकीकडे लक्ष दिलेले आहे. अजित पवारांच्या अनगरमध्ये बिहारपेक्षा बिकट परिस्थिती होईल. उज्ज्वला थिटे यांना पाचपेक्षा जास्त मतं पडणार नाहीत.

भाजपचा नगराध्यक्ष बिनविरोध होऊ द्यायचा नव्हता. भाजपचा विजयी अनगरमधून सुरू होणार होता, तो त्यांना होऊ द्यायचा नव्हता. त्यांनी पहाटेची पंरपरा चालू ठेवलेली आहे. भाजपची नगरपंचायत बिनविरोध होऊ द्यायची नाही, यासाठी त्यांनी अट्टाहास केला आहे, असा आरोप राजन पाटील समर्थकांनी अजित पवारांवर केला.

1. अनगरमध्ये पहिल्यांदा निवडणूक का लागली?

– कारण राष्ट्रवादीच्या उज्ज्वला थिटे यांनी उमेदवारी भरल्याने बिनविरोधची परंपरा तुटली.

2. राजन पाटील समर्थक अजित पवारांवर कोणते आरोप करत आहेत?

– त्यांनी सुडबुद्धीने बिनविरोध निवडणूक रोखण्यासाठी कट केला असल्याचा आरोप आहे.

3. प्राजक्ता पाटील यांची बिनविरोध निवड का झाली नाही?

– उज्ज्वला थिटे यांनी उमेदवारी भरल्यामुळे त्यांची बिनविरोध निवड थांबली.

4. समर्थकांचा थिटे यांच्या पाठिंब्याबाबत काय दावा आहे?

– थिटे यांना अत्यल्प लोकांचा पाठिंबा असल्याचा समर्थकांचा दावा आहे.