Dilip Walse Patil :‘कोण बनेगा करोडपती’च्या स्टाइलमध्ये वळसे-पाटलांची शेतकऱ्यांना ऑफर; उशिरा ऊस द्या, जादा भाव घ्या!

Pune News : राज्यात यावर्षी भीषण दुष्काळाची परिस्थिती असून, तापमानात वाढ होत असल्याने पाण्याचे मोठ्या प्रमाणात बाष्पीभवन होत आहे. यामुळे साखर कारखान्यांसमोर मोठ्या अडचणी निर्माण झाल्या असून, अनेक साखर कारखान्यांचा गळीत हंगाम १०० दिवसांच्या आतच संपण्याची शक्यता वर्तवली जात आहे.

मराठवाड्यात तर दुष्काळी परिस्थितीमुळे कारखाने सुरू होतील की नाही, अशी शंका निर्माण झाली आहे. अशा या कठीण आणि आव्हानात्मक परिस्थितीतही आंबेगाव तालुक्यातील पारगाव येथील भीमाशंकर सहकार कारखान्याने योग्य नियोजन करून तब्बल १० लाख मेट्रिक टन ऊस गाळपाचे उद्दिष्ट ठेवले आहे.

भीमाशंकर कारखान्याच्या २७ व्या गळीत हंगामाचा बॉयलर प्रज्वलन व गव्हाण पूजन सोहळा राज्याचे माजी गृहमंत्री, सहकार मंत्री तथा कारखान्याचे संस्थापक दिलीपराव वळसे-पाटील आणि वारकरी संप्रदायातील संत, महंतांच्या प्रमुख उपस्थितीत पार पडला. या कार्यक्रमात बोलताना वळसे-पाटील यांनी शेतकऱ्यांसाठी एक आगळीवेगळी आणि आकर्षक ऑफर जाहीर केली.

कशी आहे ‘केबीसी’ स्टाईल ऑफर?

यंदा दुष्काळामुळे ऊस उत्पादन घटण्याची शक्यता असून, गाळप हंगाम लवकरात लवकर संपण्याची दाट शक्यता आहे. हा हंगाम जास्त दिवस टिकावा आणि शेतकऱ्यांचेही हित जपले जावे, यासाठी भीमाशंकर कारखान्याने उसाच्या एफआरपी दरावर भरघोस वाढीव रक्कम देण्याची घोषणा केली आहे. सध्या उसाची एफआरपी ३ हजार २७३ रुपये इतकी आहे. यावर शेतकऱ्यांना उसाच्या टप्प्यानुसार वाढीव दर मिळणार आहेत.

जानेवारीमध्ये ऊस गाळपासाठी देणाऱ्या शेतकऱ्यांना एफआरपीच्या रकमेवर १०० रुपये अधिक मिळणार आहेत. फेब्रुवारीमध्ये ऊस देणाऱ्या शेतकऱ्यांना २०० रुपये जादा दिले जातील. मार्च महिन्यात ऊस पुरवठा करणाऱ्या शेतकऱ्यांना थेट ३०० रुपये जादा मिळणार आहेत.

या अनोख्या घोषणेमुळे “जितका उशिरा ऊस द्याल, तितका जादा भाव मिळवाल,” अशी ‘कोण बनेगा करोडपती’ स्टाईलची ही ऑफर सध्या पंचक्रोशीत आणि शेतकरी वर्गात चर्चेचा मोठा विषय ठरत आहे.

या पद्धतीमुळे केवळ कारखान्याचे गाळप दिवस वाढण्यास मदत होणार नाही, तर प्रत्येक शेतकऱ्याच्या शेतातील उसाची योग्य रिकव्हरी काढून त्यानुसार अचूक भाव देणे शक्य होईल, असा विश्वासही दिलीप वळसे-पाटील यांनी यावेळी व्यक्त केला.