BJP MLA : भाजप आमदार बनला 'सिंघम', इचलकरंजीतला बेकायदेशीर दारू अड्डा केला उद्ध्वस्त; प्रशासनालाही धारेवर धरले

Kolhapur News: कोल्हापूर जिल्ह्यातील इचलकरंजीमध्ये भाजपच्या आमदारांनी सिंघम रूप धारण केले. सातत्याने नागरिकांच्या तक्रारी आल्यानंतर स्वतः दखल घेत इचलकरंजी शहरातील एका ठिकाणी बेकायदेशीर सुरू असलेला दारूचा अड्डा उद्ध्वस्त केला. इतकेच नव्हे तर वारंवार तक्रार करून सुद्धा दुर्लक्ष करणाऱ्या प्रशासकीय अधिकाऱ्यांशी देखील आमदार राहुल आवाडे (Rahul Awade) यांनी चांगलीच कानउघडणी करत वरिष्ठ स्तरावर कारवाई करण्याचा इशारा दिला आहे.

इचलकरंजी शहर परिसरातील कुडचे मळा येथे एका पत्र्याच्या खोलीत बेकायदेशीर रित्या दारू अड्डा सुरू आहे. त्याचा परिसरात राहणाऱ्या नागरिकांना नाहक त्रास सहन करावा लागत होता. वारंवार या परिसरातील नागरिकांनी प्रशासनाकडे दाद मागितल्यानंतरही त्यासंदर्भात दखल घेतली जात नव्हती. दरम्यान परिसरातील नागरिकांनी थेट आमदार राहुल आवाडे यांची भेट घेत संबंधित दारू अड्डा हा बंद करावा अशी मागणी केली.

नागरिकांचा संताप आणि रोष पाहून आमदार आवाडे यांनी क्षणाचाही विलंब न लावता थेट गाडीवर बसून कुडचे मळा गाठला. घटनास्थळी पत्रांच्या शेडात अनेक तळीराम दारू ढोसत असल्याचे त्यांच्या निदर्शनास आले. त्यांनी त्या संदर्भात तात्काळ संताप व्यक्त करत सर्वांना हाकलून लावले. तर कार्यकर्त्यांनी तिथे असणाऱ्यांना अनेकांना प्रसाद दिला.

भाजप (BJP) आमदार आवाडे यांनी तात्काळ प्रशासनाशी संपर्क साधून संबंधित अधिकाऱ्याला धारेवर धरले. वारंवार सांगूनही आपण कारवाई करत नसाल तर तुमची वरिष्ठ स्तरावर तक्रार करू. तक्रार देऊन ही आपण ते बंद करत नसाल तर हे बरोबर नव्हे. असले धंदे परत चालणार नाही. पोलीस अधिकाऱ्यांनी त्यांच्यावर ॲक्शन घेतले आहे असे सांगताच, आमदार आवाडे यांनी त्यांना खडेबोल सुनावले.

तुम्ही त्यांच्यावर गुन्हा नोंद केला का? तुम्ही नेमकी काय कारवाई केली? हे मला सांगा. ते विचारताच पोलीस अधिकाऱ्यांची भंबेरी उडाली. मात्र, आवाडे यांनी घेतलेल्या या भूमिकेमुळे मात्र पोलीस दलाची तारांबळ उडाली. शिवाय नागरिकांकडूनही समाधान व्यक्त होत आहे.