
Sangli News : गेल्या महिन्यात हिंदू एकता सभेच्या व्यासपीठावर आमदार सुरेश खाडे यांनी मिरजचा उल्लेख ‘मिनी पाकिस्तान’ म्हणून केला होता. आता त्यांचे हेच वक्तव्य त्यांच्यासाठी अडचणीचे कारण ठरू शकते. त्यांचे हे वक्तव्य शहराप्रती द्रोह असून, देशाचे सार्वभौमत्व व एकात्मतेला धोका निर्माण करणारे असल्याने त्यांच्या वर गुन्हा दाखल करण्याची मागणी आता करण्यात आली आहे.
खाडे यांनी मिरजेचा उल्लेख ‘मिनी पाकिस्तान’ असा केला होता. याप्रकरणी त्यांनी आपल्याच मतदार आणि मतदारसंघाचा अपमान केल्याची जनभावना याआधीच मतदार संघात उमटली होती. त्यानंतर आता त्यांच्यावर देशद्रोहाचा गुन्हा दाखल करून सखोल चौकशीसाठी उच्चस्तरीय समिती स्थापन करावी, अशी मागणी सामाजिक कार्यकर्ते तानाजी रुईकर यांनी केली आहे.
याबाबत राष्ट्रपतींपासून सर्व घटनात्मक पदांवरील व्यक्तींना रुईकर यांनी निवेदन दिले आहे. मिरज शहर पोलिसांनाही निवेदन देऊन गुन्हा दाखल करण्याची मागणी रुईकर यांनी केली आहे.
रुईकर यांनी दिलेल्या निवेदनात म्हटले आहे की, ‘मिरज विधानसभा मतदारसंघ हा सर्वधर्म समभावाचे प्रतीक आहे. मिरजेत धार्मिक सलोखा असताना फक्त राजकीय आकसाने प्रेरित होऊन आमदार सुरेश खाडे यांनी ‘मिनी पाकिस्तान’ असे संबोधले. असे वक्तव्य करणे आणि उल्लेख करणे हे मिरज शहर व देशाचा अपमान आहे. मिनी पाकिस्तान म्हणणे म्हणजे देशद्रोहच आहे.
हिंदू, मुस्लिम समाजात तेढ निर्माण करण्याच्या उद्देशाने असे वक्तव्य खाडे यांनी केले आहे. यानंतर मतदारसंघात त्यांनी जाहीर माफी मागावी असे जाहीर आवाहन करण्यात आले होते. पण खाडे यांनी माफी मागितली नाही. त्यामुळे त्यांच्यावर गुन्हा दाखल करण्याची मागणी राष्ट्रपती, पंतप्रधान व मुख्यमंत्र्यांकडे मेलद्वारे केली आहे. निवेदनाची दखल घेण्याची मागणी रुईकर यांनी केली आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.