Congress News : प्रणिती शिंदेंनी प्रतिनिधीत्व केलेल्या मतदारसंघावर काँग्रेसचा पुन्हा डोळा; सर्वाधिक 22 उमेदवार उतरविले रिंगणात

Solapur, 04 January (विठ्ठल सुतार) : सोलापूर महापालिका निवडणुकीआधीच पक्षफुटीनंतर काँग्रेसला उमेदवार मिळणार का, अशी शंका असतानाच खासदार प्रणिती शिंदे आणि शहराध्यक्ष चेतन नरोटे यांनी जुळवाजुळव करत तब्बल 50 जागांवर उमेदवार दिले. यामध्ये दोघांचे अर्ज बाद झाले असून, 102 पैकी 48 जागांवर उमेदवार निवडणूक रिंगणात आहेत. यामध्ये दोन माजी महापौर, एक माजी स्थायी समिती अध्यक्षांसह 13 माजी नगरसेवकांचा समावेश आहे. विशेष म्हणजे प्रणिती शिंदे यांनी प्रतिनिधीत्व केलेल्या सोलापूर शहर मध्य मतदारसंघात काँग्रेसने सर्वाधिक 22 उमेदवार दिले आहेत.

माजी महापौर आरिफ शेख, संजय हेमगड्डी, स्थायी समितीचे माजी सभापती शिवलिंग कांबळे यांना काँग्रेसने (Congress) संधी दिली आहे. यामध्ये शेवटच्या क्षणी माजी नगरसेविका फिरदोस पटेल यांनी काँग्रेसला सोडचिठ्ठी देत एमआयएममध्ये प्रवेश केला, तर माजी नगरसेवक बाबा मिस्त्री यांनी संधी मिळूनही निवडणूक न लढवण्याचा निर्णय घेतला आहे. स्थायी समितीचे माजी सभापती केदार उंबरजे यांनी ऐनवेळी काँग्रेसचा हात सोडत भाजपसोबत राहण्याचा निर्णय घेतला.

सोलापूर शहर मध्यवर पुन्हा लक्ष

महाविकास आघाडीतील प्रमुख पक्ष असलेल्या काँग्रेसने इतर घटक पक्षांना ५२ जागा दिल्या आहेत. सोलापूर (Solapur) शहर मध्य मतदारसंघात सर्वाधिक २२, दक्षिण सोलापूर मतदारसंघात १४, तर शहर उत्तर मतदारसंघात १२ उमेदवार दिले आहेत.

सोलापूर शहर उत्तरमधील तीन प्रभागांत उमेदवार दिले नाहीत. एकूण आठ प्रभागांत काँग्रेसचा उमेदवार नाही. प्रभाग क्रमांक २, ५, ६, ७, १३ या ठिकाणी काँग्रेसने उमेदवार दिला नाही. सात प्रभागांत एकच उमेदवार, तर सात प्रभागांत दोन उमेदवार दिले आहेत. दोन प्रभागांत तीन, तर पाच प्रभागांत चार उमेदवार दिले आहेत.

प्रणिती शिंदेंवरच प्रचाराची भिस्त

महापालिका निवडणुकीत अनेक मातब्बरांनी पक्षाला रामराम ठोकल्याने प्रचाराची सर्व जबाबदारी आता खासदार प्रणिती शिंदे यांच्यावरच असणार आहे. माजी केंद्रीय मंत्री सुशीलकुमार शिंदे यांच्याही शहरात सभा होणार आहेत. प्रत्यक्षात ग्राउंडवर शहराध्यक्ष चेतन नरोटे, माजी महापौर आरिफ शेख, संजय हेमगड्डी, प्रवक्ते अशोक निंबर्गी, माजी परिवहन सभापती विजय हत्तुरे यांनाही प्रचाराची धुरा सांभाळावी लागणार आहे.