कऱ्हाड दक्षिणमध्ये काँग्रेसला मोठा धक्का – नाना पाटील व बंडानाना जगताप यांनी शंभूराज देसाई व उपमुख्यमंत्री एकनाथ शिंदे यांच्या उपस्थितीत शिवसेनेत प्रवेश केला, त्यामुळे काँग्रेसचा बालेकिल्ला आणखी कमकुवत झाला.
भाजप व शिवसेनेचे इनकमिंग जोरात – मागील काही वर्षांत भाजपने काँग्रेस–राष्ट्रवादीतील अनेक नेत्यांना घेऊन संघटन मजबूत केले असून आता शिंदे गटानेही तीच मोहीम वेगात सुरू ठेवली आहे.
झेडपी–पंचायत समिती निवडणुकांवर परिणामाची शक्यता – काँग्रेसमधील सातत्यपूर्ण फूट, भाजप–शिवसेनेचे वाढते वर्चस्व आणि राष्ट्रवादीतील अंतर्गत मतभेद यामुळे आगामी स्थानिक स्वराज्य निवडणुकांमध्ये काँग्रेस अडचणीत येण्याचे संकेत आहेत.
Karad, 29 November : पालकमंत्री शंभूराज देसाई यांच्या मार्गदर्शनाखाली कऱ्हाड दक्षिणमधील कॉँग्रेसचे नेते पहिलवान नाना पाटील, माजी जिल्हा परिषद सदस्य बंडानाना जगताप यांनी उपमुख्यमंत्री एकनाथ शिंदे यांच्या उपस्थितीत शिवसेनेत प्रवेश केला, त्यामुळे कॉँग्रेसला खिंडार पडले आहे. आगामी जिल्हा परिषद, पंचायत समिती निवडणुकीसाठी कॉँग्रेसला ही धोक्याचीच घंटा मानली जात आहे.
दरम्यान, पहिलवान नाना पाटील यांच्यासाठी उपमुख्यमंत्री अजित पवार (Ajit Pawar) यांच्या नेतृत्वाखालील राष्ट्रवादीने फिल्डिंग लावली होती. मात्र, उंडाळकर गट नाराज होण्याच्या भीतीने राष्ट्रवादीने पाटील यांच्याकडे दुर्लक्ष केले. मात्र, शिवसेनेने सावज हेरून काँग्रेस नेत्यांना आपल्या गोटात खेचण्यात यश मिळविले आहे.
कऱ्हाड दक्षिण (Karad South) विधानसभा मतदारसंघ स्वातंत्र्यानंतर कॉँग्रेसचा बालेकिल्ला होता. या मतदारसंघावर ज्येष्ठ नेते (कै.) यशवंतराव मोहिते, माजी सहकारमंत्री (कै.) विलासराव पाटील-उंडाळकर आणि माजी मुख्यमंत्री पृथ्वीराज चव्हाण यांनी अनेक वर्षे प्रतिनिधित्व केले. सातारा जिल्ह्यात खासदार शरद पवार यांच्या राष्ट्रवादी कॉँग्रेस पक्षाचे वर्चस्व राहिले, तरीही कऱ्हाड दक्षिण हा कॉँग्रेसचा बालेकिल्ला या नेत्यांनी राखला होता. त्यानंतर राजकीय समीकरणे बदलत गेली.
मागील विधानसभा निवडणुकीत कॉँग्रेसला बालेकिल्ला उद्ध्वस्त करून भाजपचे डॉ. अतुल भोसले हे आमदार झाले. त्याचबरोबर राष्ट्रवादी कॉँग्रेसमध्येही फूट पडल्याने आता भाजपचा बालेकिल्ला बनला आहे. कॉँग्रेस, राष्ट्रवादीच्या अनेकांचे इनकमिंग करून भाजपने बाजी मारली असली, तरी उपमुख्यमंत्री शिंदे यांच्याही शिवसेनेने अनेकांना पक्षाची दारे खुली केली आहेत.
सातारा जिल्ह्याचे पालकमंत्री देसाई यांच्या मार्गदर्शनाखाली कऱ्हाड दक्षिणमधील कॉँग्रेसचे नेते पहिलवान नाना पाटील, माजी जिल्हा परिषद सदस्य बंडानाना जगताप यांनी उपमुख्यमंत्री शिंदे यांच्या प्रचार सभेच्या व्यासपीठावर येऊन शिवसेनेत प्रवेश केला. त्यामुळे दक्षिणमध्ये कॉँग्रेसला पुन्हा खिंडार पडले असून, आगामी जिल्हा परिषद, पंचायत समिती निवडणुकीसाठी कॉँग्रेसला ही धोक्याचीच घंटा मानली जात आहे.
पक्ष प्रवेशाचा सिलसिला
कऱ्हाड दक्षिणचे आमदार डॉ. भोसले यांनी भाजपची ताकद वाढवण्यासाठी प्रयत्न सुरू केले. त्याअंतर्गत त्यांनी पहिल्या टप्प्यात कॉँग्रेसला खिंडार पाडण्याचे काम सुरू केले. माजी मुख्यमंत्री चव्हाण यांचे समर्थक असलेले मलकापूरचे माजी नगरसेवक त्यांनी फोडून भाजपमध्ये घेतले. त्यानंतर त्यांनी पक्ष प्रवेशाचा सिलसिला सुरूच ठेवला.
माजी मुख्यमंत्री चव्हाण यांचे विश्वासू सहकारी माजी उपनगराध्यक्ष मनोहर शिंदे यांनाच आमदार डॉ. भोसले यांनी भाजपमध्ये घेतले. त्याचबरोबर माजी सहकारमंत्री बाळासाहेब पाटील यांचे समर्थक असलेले माजी नगरसेवक, शिंदे सेनेचे नेते राजेंद्र यादव यांचे समर्थक असलेल्या माजी नगरसेवकांना निवडणुकीच्या तोंडावरच गळाला लावले. त्यामुळे कऱ्हाडमध्ये भाजप विरोधात त्या दोन्ही नेत्यांनी एकत्र येत आघाडीच्या माध्यमातून भाजपविरोधात पॅनेल उभे केले आहे. त्यांच्यासोबत राष्ट्रवादी काँग्रेसचे अॅड. उदयसिंह पाटील- उंडाळकरही सहभागी झाले आहेत.
कॉँग्रेसने मात्र कऱ्हाड नगरपालिकेसाठी हाताच्या चिन्हावर स्वतंत्र उमेदवार दिले आहेत. भाजपने इतर पक्षातील इनकमिंग केल्याने आगामी नाराज झालेले इतर पक्षातील नेत्यांचा जिल्हा परिषद, पंचायत समितीलाही नगरपालिकेचाच ट्रेंड राहील, अशी चिन्हे आहेत.
राष्ट्रवादी प्रवेशाची चर्चा...
आमदार डॉ. अतुल भोसले यांच्या माध्यमातून सध्या भाजपचे वर्चस्व असलेल्या कऱ्हाड दक्षिण मतदारसंघात उपमुख्यमंत्री अजित पवार यांच्या राष्ट्रवादी काँग्रेस पक्षानेही मोर्चेबांधणी सुरू केली आहे. त्यांना ॲड. उंडाळकर यांचा गट मिळाल्याने तेथे राष्ट्रवादी काँग्रेसची ताकद वाढली आहे.
दिवाळीदरम्यान दक्षिणमधील काँग्रेसचे स्थानिक नेते पहिलवान नानासाहेब पाटील यांनी उपमुख्यमंत्री पवार यांच्या राष्ट्रवादी काँग्रेसचे खासदार नितीन पाटील यांचा पाहुणचार केला होता. या वेळी पक्षाचे जिल्हाध्यक्ष बाळासाहेब सोळसकर यांनी पक्ष प्रवेशासंदर्भात पहिलवान पाटील यांच्याबरोबर चर्चा केल्याची चर्चा होती. मात्र, त्यांच्या प्रवेशाने ॲड. उंडाळकर गटातील कार्यकर्ते नाराज होऊन ते दुसराच निर्णय घेतील, अशीही भीती होती. त्यामुळेच राष्ट्रवादी कॉँग्रेसने सावध भूमिका घेतली. त्यातूनच पहिलवान पाटील यांनी उपमुख्यमंत्री शिंदे यांच्या शिवसेनेत थेट प्रवेश केल्याची चर्चा आहे.
1) नाना पाटील आणि जगताप कोणत्या पक्षात गेले?
→ दोघांनीही उपमुख्यमंत्री शिंदे यांच्या उपस्थितीत शिवसेनेत प्रवेश केला.
2) काँग्रेसला यामुळे काय परिणाम होईल?
→ कऱ्हाड दक्षिणमध्ये काँग्रेसला मोठे खिंडार पडून स्थानिक निवडणुका धोक्यात येऊ शकतात.
3) राष्ट्रवादीने नाना पाटील यांना घेतले नाही, कारण काय?
→ त्यांना घेतल्यास ॲड. उंडाळकर गट नाराज होईल अशी भीती होती.
4) झेडपी व पंचायत समिती निवडणुकांवर कसा परिणाम होऊ शकतो?
→ भाजप–शिवसेनेचे इनकमिंग पाहता नगरपालिका ट्रेंडप्रमाणेच काँग्रेसला अडचण निर्माण होऊ शकते.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.
