Kolhapur Politics : मंडलिक गटानं गावगाड्यातील वातावरण तापवलं, मुश्रीफ-घाटगे गटाविरोधात बॅनरबाजी

Kolhapur News, 09 Oct : कोल्हापूर जिल्ह्यामधील कागल विधानसभा मतदारसंघातील लढत अधिक लक्षवेधी होताना दिसत आहे. मतदारसंघातील राजकीय डावपेच दिवसेंदिवस बदलताना दिसत आहेत.

अशातच आता महायुतीचे नेते माजी खासदार संजय मंडलिक यांचे सुपुत्र यांनी पालकमंत्री हसन मुश्रीफ आणि शाहू ग्रुपचे अध्यक्ष समरजित सिंह घाटगे यांच्या विरोधात मेळावा घेत उमेदवारीवर दावा केला.

महायुतीकडून आपल्याला उमेदवारी द्यावी आणि आता पालकमंत्री हसन मुश्रीफ (Hasan Mushrif) यांनी थांबावे असं जाहीर आव्हान देत वीरेंद्र मंडलिक यांनी महाविकास आघाडीसह महायुतीचे संभाव्य उमेदवारांना टक्कर देण्याचा प्रयत्न सुरू केला आहे.

मंगळवारी मेळावा पार पडल्यानंतर कार्यकर्त्यांसह वीरेंद्र मंडलिक (Virendra Mandalik) यांनी महाविकास आघाडीच्या संभाव्य उमेदवारापेक्षा महायुतीचेच उमेदवार पालकमंत्री हसन मुश्रीफ यांच्यावर रोष असल्याचे दाखवून दिले. मंडलिक यांनी आपल्या उमेदवारीची घोषणा केल्यानंतर गावागावातील मंडलिक प्रेमी आता मुश्रीफ आणि घाटगे यांच्या विरोधात उघड उघड रस्त्यावर उतरलेले आहेत.

कागल (Kagal) विधानसभा मतदारसंघातील गाव गाड्यावरील वातावरण आतापासून तापायला सुरुवात झाली आहे. कागल विधानसभा मतदारसंघातील गटाच्या कार्यकर्त्यांनी थेट पालकमंत्री मुश्रीफ आणि समरजित घाटगे यांच्या विरोधात बॅनरबाजी केली आहे.

काय काय केलंय तुम्ही? हे विसरणार नाही आम्ही

हसन साहेब..., समरजितराजे काय काय केलंय तुम्ही? हे विसरणार नाही आम्ही. अशी बॅनरबाजी करत थेट आव्हान दिलं आहे. येणारे विधानसभा निवडणुकीच्या पार्श्वभूमीवर मंडलिक गटाकडून दबाव तंत्र वापरले जात आहे. या बॅनरबाजीमुळे विधानसभा मतदारसंघातील राजकीय वातावरण पुन्हा एकदा उफाळण्याची शक्यता आहे.