Amit Thackeray : फडणवीससाहेब, एक दिवस प्रचार सोडा अन्‌ सोलापुरात या म्हणजे निवडणुका कुठे गेल्यात ते कळेल

Solapur, 04 January : मुख्यमंत्री देवेंद्र फडणवीस यांना माझी विनंती आहे की, एक दिवस प्रचार सोडा आणि प्लीज सोलापुरातील बाळासाहेब सरवदे यांच्या कुटुंबीयांना भेटा. निवडणुका कुठच्या पातळीला नेऊ ठेवल्या आहेत, हे तुम्हाला कळेल. ते मोठे नेते आहेत, ते महाराष्ट्राचे मुख्यमंत्री त्यांनी आपले राज्य कोठे चालले आहे, हे त्यांनी पाहिले पाहिजे, अशी अपेक्षा महाराष्ट्र नवनिर्माण सेनेचे नेते अमित राज ठाकरे यांनी व्यक्त केली आहे.

सोलापुरातील जोशी गल्लीतील महाराष्ट्र नवनिर्माण विद्यार्थी सेनेचे (MNS) शहराध्यक्ष बाळासाहेब सरवदे यांचा उमेदवारी अर्ज माघारी घेण्याच्या कारणावरून खून झाला आहे. याप्रकरणी भाजप उमेदवारासह चौघांना अटक करण्यात आलेली आहे. मनसेचे नेते अमित ठाकरे यांनी आज सोलापुरात येऊन सरवदे कुटुंबीयांचे सांत्वन केले. त्यानंतर माध्यमांशी बोलताना त्यांनी सरकारवर निशाणा साधला आहे. सरवदे यांच्या मुलांच्या शिक्षणाचा खर्च करणार असल्याचे अमित ठाकरे यांनी स्पष्ट केले आहे.

अमित ठाकरे (Amit Thackeray) म्हणाले, मुख्यमंत्री देवेंद्र फडणवीस, उपमुख्यमंत्री एकनाथ शिंदे यांनी सोलापुरातील सरवदे कुटुंबीयांची परिस्थिती बघितली पाहिजे. अशा पद्धतीने निवडणुका होणार असतील तर निवडणुकाच नको, असे म्हणायची वेळ सध्या आली आहे. आम्ही सर्व उमेदवारी अर्ज परत घेतो, तुम्हीच जिंका. निवडणुका जिंकण्यासाठी खून होण्याची परिस्थिती तुम्ही आणून ठेवली आहे.

एखाद्याच्या मृत्यूवर मी कधीही राजकारण करत नाही. आजही मी ते करायला आलो नाही. पण तुम्ही हे राज्य कोठे नेऊन ठेवलं आहे. ते कधीतरी जाणून घेणार आहेत का नाही. आपल्या सर्वांमधील माणूस जागा झाला पाहिजे आणि सोलापुरातील घटनेचा विचार केला पाहिजे, अशी अपेक्षा ठाकरेंनी व्यक्त केली.

ठाकरे म्हणाले, बाळासाहेब सरवदे यांच्या खूनप्रकरणी मी मुख्यमंत्री देवेंद्र फडणवीस यांची भेट घेणार आहे. त्यांनी मला फक्त दहा मिनिटेच द्यावीत. मला सोलापुरात पोलिस आयुक्तांना वैगेरे कोणाला भेटायची गरज नाही. सोलापुरातील सर्व परिस्थिती मला फडणवीस यांच्यासमोर मांडायची आहे.

एक आई, बायको आणि दोन मुली आज बाळासाहेब सरवदे यांच्या अस्थिचे विसर्जन करून आलेल्या आहेत. कशासाठी निवडणुकीसाठी. ह्याची उत्तरं मला मिळालीच पाहिजे आणि बाळासाहेब सरवदेंना न्याय मिळालाच पाहिजे. सध्याची परिस्थिती मी सहन करू शकणार नाही. तुमचे नगरसेवक बिनविरोध होऊ द्या. पण खुनापर्यंत तुम्ही कसे पोचता, असा सवालही अमित ठाकरेंनी उपस्थित केला.