Shivsena Politic's : शिवसेनेचे टार्गेट आता अतुल भोसले अन्‌ पृथ्वीराज चव्हाणांचा मतदारसंघ; पक्षप्रवेशाबाबत शंभूराज देसाईंनी फोडला मोठा बॉम्ब

Karad, 11 July : स्थानिक स्वराज्य संस्थांच्या आगामी निवडणुकांच्या पार्श्वभूमीवर शिवसेना नेते तथा कॅबिनेट मंत्री शंभूराज देसाई यांनी मोठे विधान केले आहे. माजी मुख्यमंत्री पृथ्वीराज चव्हाण आणि भाजपचे आमदार अतुल भोसले यांच्या मतदारसंघासह सातारा जिल्ह्यातील दिग्गज नेते लवकरच शिवसेनेत प्रवेश करणार आहेत, त्यांची नावे लवकरच जाहीर करण्यात येतील, असा बॉम्ब मंत्री देसाई यांनी फोडला आहे.

पालकमंत्री शंभूराज देसाई (Shambhuraj Desai) हे आज साताऱ्याच्या दौऱ्यावर आले आहेत. मुंबईहून ते विमानाने कऱ्हाड (जि. सातारा) येथील विमानतळावर उतरले. कराडहून दौलतनगरला (ता. पाटण) जाण्यापूर्वी देसाई यांनी माध्यमांशी बोलताना सातारा जिल्ह्यातील अनेक दिग्गज नेते लवकरच शिवसेनेत प्रवेश करतील, असे स्पष्ट केले आहे.

कऱ्हाड दक्षिण (Karad South) विधानसभा मतदारसंघासह सातारा जिल्ह्यातील अनेक दिग्गज मंडळी शिवसेनेत प्रवेश करणार आहेत. माझी त्यासंदर्भात सध्या चर्चा सुरु आहे. सध्या पावसाळी अधिवेशन सुरू आहे, या अधिवेशनामुळे मला पक्षनेतृत्वाशी बोलता आले नाही, लवकरच त्याबाबत नेतृत्वाशी चर्चा करण्यात येईल, असेही देसाई यांनी स्पष्ट केले आहे.

शंभूराज देसाई म्हणाले, सातारा जिल्ह्यातील अनेक दिग्गज शिवसेनेत प्रवेश करणार आहेत. उपमुख्यमंत्री एकनाथ शिंदे यांच्याशी चर्चा केल्यानंतर प्रवेश करणाऱ्यांची नावे जाहीर करण्यात येतील. कारण मला माझा पक्ष वाढवायचा आहे.

स्थानिक स्वराज्य संस्थांच्या निवडणुकीत काय करायचे, त्याबाबत मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि अजित पवार हे काय निर्णय देतील, तो आम्ही पुढे घेऊन जाणार आहोत. महायुती म्हणून स्थानिक स्वराज्य संस्थांच्या निवडणुका आम्ही लढवणार आहोत. शिवसेनेच्या वरिष्ठांच्या सुचनेनुसार पालकमंत्री म्हणून सातारा जिल्ह्यातील सर्व पक्षांच्या प्रमुखांची बैठक घेऊन त्यासंदर्भात निर्णय घेण्यात येईल, असेही देसाई यांनी स्पष्ट केले.